سەناتتىڭ الەۋمەتتىك-مادەني دامۋ جانە عىلىم كوميتەتىنىڭ دەپۋتاتتارى پارلامەنت مەن ۇكىمەتتىڭ بىرلەسكەن كەڭەسىنىڭ وتىرىسىنا قاتىستى. وندا مەملەكەت باسشىسىنىڭ «ادىلەتتى قازاقستان: زاڭ مەن ءتارتىپ, ەكونوميكالىق ءوسىم, قوعامدىق وپتيميزم» اتتى قازاقستان حالقىنا جولداۋى تالقىلاندى. شاراعا قاتىسۋشىلار الدا تۇرعان ساياسي جانە ەكونوميكالىق رەفورمالارعا جان-جاقتى توقتالدى. اتاپ ايتقاندا, ەلىمىزدە اتوم ەلەكتر ستانساسىن سالۋ جونىندەگى جالپىحالىقتىق رەفەرەندۋمعا باسا نازار اۋدارىلدى, دەپ حابارلايدى Egemen.kz.
سەنات كوميتەتىنىڭ توراعاسى نۇرتورە ءجۇسىپ 2024 جىلعى جولداۋ پرەزيدەنتتىڭ الدىڭعى جولداۋلارى مەن سايلاۋالدى تۇعىرناماسىنا ەنگىزىلگەن رەفورمالار باعىتىنىڭ جالعاسى ەكەنىن اتاپ ءوتتى. سەناتور ءوز سوزىندە پرەزيدەنت ازاماتتاردىڭ ءومىر ءسۇرۋ ساپاسىن جاقسارتۋ جونىندەگى جۇيەلى ەكونوميكالىق وزگەرىستەرگە نازار اۋدارعانىن جەتكىزدى. مەملەكەت باسشىسى ايقىنداعان بارلىق توعىز باسىم باعىت وسى نەگىزگى مىندەتتى شەشۋدى كوزدەيدى.
«مەملەكەت باسشىسىنىڭ جولداۋىندا جۇزگە جۋىق باستاما مەن ۇسىنىس قامتىلعان. سونىڭ ەڭ ماڭىزدىسىنىڭ ءبىرى – اەس قۇرىلىسى تۋرالى جالپىحالىقتىق رەفەرەندۋم وتكىزۋ كۇنىن بەلگىلەۋ – قوعامدا كوپتەن بەرى ايتىلىپ كەلە جاتقان تاقىرىپ. رەفەرەندۋم «حالىق ۇنىنە قۇلاق اساتىن مەملەكەت» تۇجىرىمداماسى مەن ادىلەتتى قازاقستان يدەياسىنىڭ تاعى ءبىر ناقتى كورىنىسى بولماق. مەملەكەت باسشىسى ينتەرنەت-الاياقتىق, اسكەردەگى ءتارتىپ, ەسىرتكى بيزنەسىنە قارسى كۇرەس, پەداگوگ جانە مەديتسينا كادرلارىنىڭ جەتىسپەۋشىلىگى سياقتى قوعامدى الاڭداتاتىن بىرقاتار وزەكتى ماسەلەلەرگە دە ەرەكشە نازار اۋداردى. جاساندى ينتەللەكتى دامىتۋ جانە وسى تەحنولوگيالاردى قازاقستاننىڭ تسيفرلىق پلاتفورماسىنا ەنگىزۋ دە جولداۋدىڭ ماڭىزدى كەزەڭى, بۇل ءوز كەزەگىندە تسيفرلىق تەحنولوگيالار بەلسەندى قولدانىلاتىن جانە دامىعان ەلگە اينالۋعا كومەكتەسەدى. جالپى, جولداۋ وزەكتى ماسەلەلەردى شەشۋگە جانە ەلىمىزدىڭ ستراتەگيالىق دامۋ ماقساتتارىنا قول جەتكىزۋگە باعىتتالعان. ءبىز دەپۋتاتتىق كورپۋس رەتىندە پرەزيدەنتتىڭ بارلىق تاپسىرمالارىنىڭ ورىندالۋىن زاڭنامالىق تۇرعىدان جان-جاقتى قامتاماسىز ەتۋگە مىندەتتىمىز», دەدى نۇرتورە ءجۇسىپ.
سونىمەن قاتار, Nazarbayev University الاڭىندا وتكەن جيىنعا قاتىسۋشىلار مەملەكەت باسشىسىنىڭ ەل وڭىرلەرىنىڭ الەۋمەتتىك-ەكونوميكالىق دامۋى سالاسىنداعى تاپسىرمالارىن جۇزەگە اسىرۋ ماسەلەلەرىن دە تالقىلادى.