قوسشى قالالىق سوتى ادام دەنساۋلىعىنا ابايسىزدا اۋىر زيان كەلتىرۋگە اكەپ سوققان, نەمقۇرايدىلىق سالدارىنان كاسىبي مىندەتتەرىن تيىسىنشە ورىنداماعانى ءۇشىن «103» قىزمەتى بويىنشا شاقىرۋلاردى قابىلدايتىن فەلدشەرگە قاتىستى قىلمىستىق ءىستى قارادى, دەپ حابارلايدى Egemen.kz اقمولا وبلىستىق سوتىنىڭ ءباسپاسوز قىزمەتىنە سىلتەمە جاساپ.
وبلىستىق سوتتىڭ حابارلاۋىنشا, «103» قىزمەتىنىڭ ديسپەتچەرى پاتسيەنت «ۋ.»-دان شاقىرۋدى قابىلداپ, «ارتەريالىق گيپەرتەنزيامەن ەسەپتە تۇرعان, كەۋدەدە اۋىرسىنۋ, جەدەلدىكتىڭ 1-ساناتىنداعى شاقىرۋ» حابارلاماسىمەن ونى قوسشى قالاسىنا جولداعان.
«قوسشىدا فەلدشەر «س.» شاقىرۋدى قابىلداي وتىرىپ, 1-ءشى ساناتتان 4-ءشى ساناتقا اۋىستىرعان, پاتسيەنتتىڭ شاعىمىن بۇرمالاپ «جوعارى تەمپەراتۋرا, 1 اپتادان استام اۋىرادى, قاتتى جوتەل» دەپ كورسەتىپ, ەمحاناعا جولداعان. ەمحانانىڭ فەلدشەرى «ا.» پاتسيەنت «ۋ.»-عا 4-ءشى سانات بويىنشا مەديتسينالىق كومەك رەتىندە تەكسەرىس جۇرگىزىپ, ينەكتسيا جاساپ كەتكەن. «ۋ.» مەديتسينالىق كومەككە قاناعاتتاندىرىلماي استانا قالاسىنىڭ اۋرۋحاناسىنا ءوز بەتىنشە بارۋعا ءماجبۇر بولدى. اۋرۋحانادا وعان «جۇرەكتىڭ يشەميالىق اۋرۋى. ميوكارد ينفاركتىسى. ستەنتتەۋ. كارديوگەندى شوك. كلينيكالىق ولىمنەن كەيىنگى جاعداي» دياگنوزى قويىلدى», دەلىنگەن حابارلامادا.
سوتتا «س.»-ءتىڭ كىناسى ساراپتامالاردىڭ قورىتىندىلارىمەن, جابىرلەنۋشى مەن كۋاگەرلەردىڭ ايعاقتارىمەن, فەلدشەرگە شاقىرۋدىڭ جەدەلدىگى ساناتىن وزگەرتۋگە تىيىم سالاتىن نورماتيۆتىك قۇقىقتىق اكتىلەرمەن جانە ءىستىڭ باسقا ماتەريالدارىمەن راستالعان.
جازا تاعايىنداۋدا سوت ابايسىزدا جاسالعان اۋىرلىعى از قىلمىستىڭ جاسالعانىن, سوتتالۋشىنىڭ جۇكتىلىگى (22 اپتادان استام مەرزىمدە) بولۋى جەڭىلدەتەتىن جاعداي رەتىندە, اۋىرلاتاتىن ءمان-جايلاردىڭ بولماۋىن جانە بۇرىن سوتتىلىعى جوق ەكەنىن ەسكەرگەن.
سوت ۇكىمىمەن «س.»-عا مەديتسينالىق قىزمەت كورسەتۋ قۇقىعىن ايىرا وتىرىپ, پروباتسيالىق باقىلاۋ بەلگىلەنىپ 1 جىل 6 ايعا باس بوستاندىعىن شەكتەۋ تاعايىندالعان.
سونىمەن قاتار سوت وبلىستىق دەنساۋلىق ساقتاۋ باسقارماسى اتىنا ءتيىستى شارالار قابىلداۋ ءۇشىن جەكە قاۋلى شىعارعان. جەكە قاۋلىمەن سوت جەدەل مەديتسينالىق جاردەم قىزمەتكەرلەرىنىڭ ابايسىزدا پاتسيەنتتىڭ دەنساۋلىعىنا اۋىر زيان كەلتىرەتىن مەديتسينا سالاسىنداعى نورماتيۆتىك قۇقىقتىق اكتىلەردى ورەسكەل بۇزۋشىلىعىنا نازار اۋدارعان.
سونداي-اق سوت ۇكىمدى وبلىستىق جەدەل مەديتسينالىق جاردەم ستانتسياسى, اقمولا قوسالقى ستانتسياسى جانە قوسشى قالاسىنىڭ ەمحاناسى قىزمەتكەرلەرى ۇجىمدارىنىڭ قاتىسۋىمەن جاريا ەتكەن.
سوت اكتىلەرى زاڭدى كۇشىنە ەنگەن جوق.