سەناتتىڭ كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتىنىڭ دەپۋتاتتارى كەڭەيتىلگەن وتىرىس وتكىزدى. وندا كولىك قۇرالدارىنىڭ قوزعالىسى جانە جولدا ءجۇرۋ قاۋىپسىزدىگىن تسيفرلاندىرۋعا قاتىستى زاڭدار تالقىلاندى, دەپ حابارلايدى Egemen.kz.
ايتا كەتەيىك, قۇجاتتار كولىك قۇرالدارىنىڭ جەكەلەگەن تۇرلەرىنىڭ, ونىڭ ىشىندە موپەدتەردىڭ قوزعالىسىن ۇيىمداستىرۋ جانە ەل اۋماعىندا جول قاۋىپسىزدىگىن تسيفرلاندىرۋ سالاسىندا تۋىندايتىن ماسەلەلەردى قۇقىقتىق رەتتەۋدى قامتاماسىز ەتۋدى كوزدەيدى.
– «جول ءجۇرىسى تۋرالى» زاڭعا «ورتاشا جىلدامدىق» ۇعىمى ەنگىزىلەدى جانە ونى ەسەپتەۋ ءتارتىبى وزگەرەدى. ناقتىراق ايتقاندا, جالپىعا بىردەي پايدالاناتىن حالىقارالىق جانە رەسپۋبليكالىق ماڭىزى بار جولدار ۋچاسكەسىنىڭ ۇزىندىعىن كولىكتىڭ ءجۇرىپ وتكەن جولداعى ۋاقىتقا ءبولۋ ارقىلى ايقىندالاتىن بولادى, - دەپ حابارلادى قر پارلامەنتى سەناتىنىڭ ءباسپاسوز قىزمەتى.
سونىمەن قاتار موپەدتەردى مەملەكەتتىك تىركەۋ مىندەتى دە ەنگىزىلەدى. قولدانىستاعى زاڭناماعا سايكەس جوبالىق جىلدامدىعى ساعاتىنا ەلۋ شاقىرىمنان اساتىن موپەدتەر عانا تىركەۋگە جاتاتىن ەدى, ەندى بارلىق موپەدتەر تىركەۋدەن وتەتىن بولادى.
وعان قوسا, ەرەجەگە «ا1» كىشى ساناتىنداعى جۇرگىزۋشى كۋالىگىمەن موپەدتى باسقارۋ قۇقىعى راستالاتىن تۇزەتۋ ەنگىزۋ كوزدەلىپ وتىر, سونىمەن قاتار «ا» جانە «ۆ» ساناتتارىنىڭ بولۋى دا موپەدتى باسقارۋ قۇقىعىن راستايتىن بولادى.
سەناتورلاردىڭ پىكىرىنشە, وسى جاڭالىقتار جولداعى ءجۇرىس قاۋىپسىزدىگىن جاقسارتۋعا, موپەدتەردى پايدالانۋ قۇقىعىن رەتتەۋدى قامتاماسىز ەتۋگە, جول-كولىك وقيعالارىنىڭ سانىن ازايتۋعا مۇمكىندىك بەرەدى.