تۇراقتى دامۋدىڭ نەگىزى

پرەزيدەنت الداعى ۋاقىتتا شۇعىل قولعا الىنىپ, اتقارىلۋعا ءتيىس توعىز جۇمىس باعىتىن اتاپ ايتتى. ونىڭ قاي-قايسىسى بولسىن, ەلدىڭ ەرتەڭى ءۇشىن وزەكتى, ۋاقىت سۇرانىسىنان تۋىنداپ وتىرعان كۇن تارتىبىندەگى ماسەلەلەر. ماسەلەن, اقشا-نەسيە ساياساتى مەن فيسكالدى ساياساتتىڭ اراسىنداعى ۇيلەسىمسىزدىك, ينۆەستيتسيالىق احۋالدى جانە بيزنەس جۇرگىزۋگە قاجەتتى جاعدايدى جاقسارتۋ, ەلىمىزدىڭ ونەركاسىپ الەۋەتىن تولىق پايدالانۋ, ينفراقۇرىلىمعا قاتىستى وزەكتى ماسەلەلەردىڭ ءبارى دە الداعى ۋاقىتتا جاڭاشا قارقىنمەن قولعا الىنىپ, ءوز شەشىمىن تاپپاق.

جوعارىدا ايتقانىمداي, پرەزيدەنت ق.توقاەۆ ەلدىڭ ءال-اۋقاتىن كوتەرۋگە ۇنەمى ءجىتى كوڭىل ءبولىپ كەلەدى. سونداي-اق ۇلت دەنساۋلىعىن نىعايتۋ مەن الەۋمەتتىك قولداۋ جۇيەسىن جاڭعىرتۋدىڭ ماڭىزدىلىعىن اتاپ ءوتتى. جولداۋدا 2025 جىلدان باستاپ «الەۋمەتتىك ءامياندى» ەنگىزۋ ارقىلى الەۋمەتتىك قولداۋ تەتىكتەرىن قايتا قاراۋ مىندەتى قويىلىپ وتىر. بۇل حالىقتىڭ مۇقتاج توپتارىنا بارىنشا اتاۋلى جانە ناقتى كومەك كورسەتۋگە مۇمكىندىك بەرمەك. شىن مانىندەگى مۇقتاج جاندار مەملەكەت تاراپىنان تۇراقتى قولداۋ تابادى. بۇل ءوز كەزەگىندە الەۋمەتتىك ادىلەتتىلىكتى ارتتىرىپ, ءومىر ءسۇرۋ ساپاسىن جاقسارتادى.

سونىمەن قاتار, جولداۋدا مەملەكەتتىك باسقارۋدىڭ تيىمدىلىگىن ارتتىرۋعا دا كوپ كوڭىل بولىنگەن. بۇعان بيۋروكراتيالىق پروتسەدۋرالاردى قىسقارتۋ جانە باسقارۋدىڭ بارلىق دەڭگەيىندە زاماناۋي باسقارۋ ادىستەرىن ەنگىزۋ كىرەدى. تسيفرلاندىرۋ جانە يننوۆاتسيالاردى ەنگىزۋ مەملەكەتتىك اپپارات جۇمىسىنىڭ تيىمدىلىگىن ايتارلىقتاي ارتتىرماق.

پرەزيدەنت ۇسىنعان قۇجاتتىڭ ءاربىر بولىمىندە تسيفرلاندىرۋ قۇرالدارى ارقىلى سالالىق ساياساتتى ىسكە اسىرۋ تيىمدىلىگىن ارتتىرۋ ماسەلەسى قوزعالعانىن ايتا كەتۋ كەرەك. ولار سالىقتىق اكىمشىلەندىرۋدى تسيفرلاندىرۋ, جولدارعا ينتەللەكتۋالدى جۇيەلەردى ەنگىزۋ, بىرىڭعاي مەديتسينالىق اقپاراتتىق جۇيە قۇرۋ, «ەلەكتروندى ۇكىمەت» پلاتفورماسىنا جاساندى ينتەللەكت تەحنولوگيالارىن ەنگىزۋ سىندى تىڭ باستامالار.

جولداۋدا كوتەرىلگەن تاعى ءبىر ماڭىزدى باعىت – قوعامدا زاڭدىلىق پەن ءتارتىپتى نىعايتۋ ماسەلەسى. تىنىشتىعى كەتكەن ەلدە دامۋ دا, وركەندەۋ دە بولمايدى. بىرلىگى جاراسقان, قاۋىپسىز قوعامدا عانا بيزنەس گۇلدەنىپ, ەكونوميكانىڭ ءوسۋى قارقىن الادى. بۇل ءبىزدىڭ مەملەكەتتىك ساياساتىمىزدىڭ باسىم باعىتتارىنىڭ ءبىرى بولىپ قالا بەرەدى. ازاماتتاردىڭ قۇقىقتارىن قورعاۋعا جانە قوعامنىڭ ءاربىر مۇشەسىنىڭ جاۋاپكەرشىلىگىن ارتتىرۋعا باعىتتالعان ناقتى جانە ءادىل ەرەجەلەردى ەنگىزۋ – تۇراقتى دامۋدىڭ نەگىزى.

اتوم ەلەكتر ستانساسىن سالۋ – ەلىمىزدە كوپتەن كوتەرىلىپ جۇرگەن تاقىرىپتاردىڭ ءبىرى. جاقىن تاريحتا بولعان ءتۇرلى اپاتتاردى قاپەرگە العان ەل تۇرعىندارى بۇرىن اەس ماسەلەسىنە ۇركە قاراعان بولسا, سوڭعى جىلدارى ەنەرگيا تاپشىلىعىنىڭ انىق بىلىنە باستاۋىنا بايلانىستى بۇل قۋات كوزىنىڭ كەرەك ەكەنىن ءتۇسىندى. ءتۇرلى ساراپشىلار قازىر حالقىمىزدىڭ باسىم بولىگى اەس قۇرىلىسىن قولدايتىنىن ايتادى. دەگەنمەن پرەزيدەنت ق.توقاەۆ «حالىق ۇنىنە قۇلاق اساتىن مەملەكەت» تۇجىرىمداماسىن نەگىزگە الا وتىرىپ, رەسپۋبليكالىق رەفەرەندۋم وتكىزۋگە شەشىم قابىلدادى. بۇل ەلگە كەرەك ماسەلە, سوندىقتان ول تۋرالى سوڭعى شەشىمدى دە حالىقتىڭ ءوزى قابىلداۋعا ءتيىس. ەندەشە ازاماتتارىمىز بەلسەندىلىك تانىتىپ, 6 قازان كۇنى ءبىر كىسىدەي رەفەرەندۋمعا قاتىسىپ, داۋىس بەرگەندەرى ءجون.

پرەزيدەنتتىڭ كەلەر جىلدى «جۇمىسشى ماماندىقتارى جىلى» دەپ جاريالاۋى – ەلدىڭ بولاشاعىن ويلاعاننان تۋعان باستاما دەسەك ارتىق ەمەس. شىن مانىندە بىزدە قاراپايىم, بىراق قوعامعا ەڭ قاجەتتى ماماندار تاپشى. ەلىمىز دانەكەرلەۋشىدەن باستاپ كران ماشينيسىنە دەيىنگى ساپالى كادرلارعا مۇقتاج. قاسىم-جومارت كەمەل ۇلى 2019 جىلعا دەيىن ورتا بيزنەستىڭ ەكونوميكاداعى ۇلەسىن 15 پايىزعا جەتكىزۋدى مىندەت ەتىپ قويدى. ال بۇل مەجەگە ءبىزدى جوعارىدا اتالعان جۇمىسشى ماماندار جەتكىزەرى انىق. سوندىقتان مەملەكەت باسشىسىنىڭ بۇل باستاماسى دا ەل ومىرىنە سەرپىن اكەلىپ, جاستارىمىزدىڭ ءوز بولاشاقتارىن دۇرىس تاڭداۋىنا سەپتىگىن تيگىزەدى دەپ ۇمىتتەنەمىز.

جالپى ايتقاندا, جولداۋدا ايتىلعان ءاربىر وي – ادىلەتتى قازاقستاندى قۇرۋ جولىنداعى ماڭىزدى قادامعا اينالارى حاق. ول ءۇشىن ەلىمىزدىڭ ءار ازاماتى بۇل ۇدەرىستەن شەت قالماي, بولاشاعىمىزدى ءوز قولىمەن جاساۋعا اتسالىسۋعا ءتيىس.

الماس سادۋباەۆ,

اقپارات سالاسىنىڭ ۇزدىگى