ۇزىلمەي تۇرعان قارا جاۋىن ديقان قاۋىمىنىڭ ادىمىن اشتىرماي قويدى. قازىر ەگىستىك جەرى ءسال قۇرعاعان شارۋاشىلىقتار وراققا بىردەن كىرىسۋ ءۇشىن كومبايندارىن تاناپ تۇبىنە ءتوندىرىپ قويىپتى.
تامىز ايىندا جاۋىن ۇزىلگەن جوق. ءداننىڭ ساباقتا كەبۋى وسى ارالىقتا ورتاشا ەسەپپەن تاۋلىگىنە 12–16%-دى قۇرايدى دەلىنگەن ەدى. ال جەلدىڭ ەكپىنى سەكۋندىنا 15–20 مەترگە دەيىن نەمەسە ودان دا كوپ بولسا جاۋىنشاشىن ەگىس القاپتارىندا ەگىننىڭ قۇلاۋىنا اكەلۋى مۇمكىن دەلىنگەن. ايتەۋىر, جوعارىدا ايتقانىمىزداي, ونداي قاتەر بولا قويعان جوق.
جەمازىق دايىنداۋ ءىسى دە قۇلاشتى كەڭ جازا الماي وتىر. ون مەترلىك جاتكالارمەن ورىلىپ قالعان قالىڭ ءشوپ تاناپتارى كوپ جەرلەردە كەبە الماي, سۋدان قارايىپ كەتكەن. ءسال عانا مۇمكىندىك بولسا, شارۋالار ولاردى جيناپ الۋعا اسىعادى.
وبلىستىق اۋىل شارۋاشىلىعى جانە جەر قاتىناستارى باسقارماسىنىڭ باسشىسى مەيرام مەڭدىباەۆتىڭ ايتۋىنشا, قوراداعى مالدى كۇتۋ ءۇشىن وبلىسقا 940 مىڭ توننا ءشوپ, 234,6 مىڭ توننا پىشەندەمە, 278,1 مىڭ توننا سۇرلەم, 818 مىڭ توننا جەم, 1 مىڭ تونناداي سابان كەرەك.
2024–2025 جىلعى قىس ماۋسىمىندا قورادا تۇرىپ كۇتىلەتىن قارا مال سانى – جوبامەن 312 مىڭ, قوي-ەشكى – 401 مىڭ, جىلقى – 150 مىڭ تۇياق. سونىڭ ىشىندە ءۇي شارۋاشىلىعىنداعى اۋلالاردىڭ ءىرى ءمۇيىزدى قارا سانى – 125 مىڭ, قوي-ەشكى – 299 مىڭ, جىلقى – 80 مىڭ تۇياق. مەيرام مەڭدىباەۆتىڭ سوزىنشە, بيىل اۋىل شارۋاشىلىعى مينيسترلىگى ءشوپتىڭ قالىڭ شىققانىن ەسكەرىپ, ءبىر جارىم جىلدىق قور دايىنداۋدى مىندەتتەگەن. بۇل – 1 ملن 400 مىڭ توننا ءشوپ. اۋا رايى مۇمكىندىك بەرسە, وسىنشا ءشوپ كولەمىن دايىنداۋعا بولادى. بيىلعى ىلعالدىڭ مولدىعىنان ءشوپتىڭ ءوسۋى ىرعىن بولدى, تەك سونىڭ قارايىپ, ءشىرىپ كەتپەي, البارعا امان ءۇيىلۋىن ايت.
«بيىل ءشوپتىڭ قالىڭ وسكەنى سونداي, 1 گەكتاردان 12–15 تسەنتنەرگە دەيىن ءشوپ شابىلدى. بۇرناعى جىلدارى مۇنداي كورسەتكىش 5–7 تسەنتنەردەن اسپايتىن. قازىردىڭ وزىندە جينالعان ءشوپ كولەمى بەلگىلەنگەن نورمانى ورىنداپ تاستادى. ءۇي قوجالىقتارىندا دا ءشوپ جەتكىلىكتى مولشەردە جينالدى. بارلىق 47 مىڭ ءۇي قوجالىعىنىڭ بارىندە ءبىر قىسقا جەتەتىن ءشوپ ءۇيىلدى», دەيدى م.مەڭدىباەۆ.
ايتا كەتەر جايت, قازىر 1 توننا ءشوپتىڭ باعاسى – 12–14 مىڭ تەڭگە. ال بىلتىر وسى ۋاقىتتا ءشوپ باعاسى 25 مىڭ تەڭگەگە جەتكەن ەدى. جەمازىق, سونىڭ ىشىندە ءشوپ باعاسى تومەن بولسا, ەت پەن ءسۇتتىڭ باعاسى دا تۇراقتى بولار دەگەن ءۇمىت بار. سوندىقتان شارۋالاردىڭ بيىلعى ارزان ءشوپتى مولىراق قامتىپ قالعانى جاقسى.
قازىر كەي اۋدانداردىڭ (مىسالى, ەسىل, شال اقىن) شارۋاشىلىقتارى سۇرلەم دايىنداۋعا دا كىرىسكەن. كۇننىڭ اشىقتىعىن پايدالانىپ, بۇل ىسكە باسقا اۋداندار دا كىرىسكەنى بەلگىلى بولىپ تۇر. ال ۇلكەن وراق قىزۋ ءجۇرىپ كەتسە, سابان پىشەندەمە مەن ساباننىڭ دا مول بولارى ءسوزسىز.
سولتۇستىك قازاقستان وبلىسى