پەتروپاۆلدا الاياقتىقتىڭ جاڭا ءتۇرى بەلەڭ الدى. پوليتسيا قىزمەتكەرلەرى قالا تۇرعىندارىن الداپ سوققان كۇدىكتىنى ۇستادى, دەپ حابارلايدى Egemen.kz.
ىشكى ىستەر مينيسترلىگىنىڭ حابارلاۋىنشا, تامىز ايىنىڭ باسىندا پەتروپاۆل قالاسىنىڭ پوليتسيا باسقارماسىنا ينتەرنەت-الاياقتىق تۋرالى وتىنىشپەن 22 جاستاعى جىگىت پەن قىز جۇگىنگەن. ولاردىڭ ەشقانداي نەسيەلەرى بولماعان. الايدا, لومباردقا قارىز ەكەندەرى تۋرالى sms-حابارلامالار العان.
«وسىدان ءبىر اي بۇرىن جابىرلەنۋشىلەرگە بەيتانىس جاس جىگىت جاقىنداپ كەلىپ, تەلەفوندارىن بەلگىلى ءبىر دەرەكقور ارقىلى تەكسەرۋدى ۇسىنعان. ونىڭ كومەگىمەن گادجەتتىڭ ۇرلانباعان ەكەنىن راستاۋعا بولادى دەپ تۇسىندىرگەن. جابىرلەنۋشىلەر وزدەرىنىڭ تەلەفوندارى مەن جەكە كۋالىكتەرىن سۋرەتكە تۇسىرۋگە, سونداي-اق IMEI-كودتارىن جازىپ الۋعا مۇمكىندىك بەرگەن. الاياقتار بەيتانىس تەلەفوننىڭ «بازادا تىركەلمەگەنىن» ايتقان. كەيىن جابىرلەنۋشىلەر ولاردىڭ قۇرىلعىلارى ونلاين-رەجيمدە قارىز بەرەتىن لومباردتىڭ كەپىلى بولعانىن بىلگەن. كەلتىرىلگەن زالال ءار جاعدايدا 35 مىڭ تەڭگەنى قۇرادى», دەلىنگەن حابارلامادا.
جەدەل-ىزدەستىرۋ ءىس-شارالارىنىڭ ناتيجەسىندە وبلىستىق پوليتسيا دەپارتامەنتى كريمينالدىق پوليتسيا باسقارماسىنىڭ جانە پەتروپاۆل قالاسىنىڭ «Cyberpol» توبىنىڭ قىزمەتكەرلەرى كۇدىكتىنى انىقتاعان. ول 18 جاستاعى پەتروپاۆل قالاسىنىڭ تۇرعىنى بولىپ شىقققان. كۇدىكتى 13 تامىزدا جۇماباەۆ كوشەسىنىڭ بويىندا ۇستالعان.
«اتالعان دەرەكتەر بويىنشا سوتقا دەيىنگى تەرگەۋ جۇرگىزىلىپ, كۇدىكتىنىڭ باسقا دا قىلمىسقا قاتىسى بار-جوعى تەكسەرىلىپ جاتىر. قۇپيا دەرەكتەرىڭىزدى ەشكىمگە بەرمەۋىڭىزدى سۇرايمىز. بارىنشا ساق بولىڭىزدار», دەپ ەسكەرتتى سقو پوليتسيا دەپارتامەنتى كريمينالدىق پوليتسيا باسقارماسىنىڭ باستىعى يۆان تەرزيدي.