اشىلعانىنا نەبارى التى اي بولعان اتىراۋ جاستار تەاترى استانا قالاسىنا گاسترولدىك ساپارمەن كەلدى. كونستيتۋتسيا كۇنى اياسىندا وتكەن ساپار بارىسىندا ونەر ۇجىمى ەلوردالىق كورەرمەنگە مۇقانعالي تومانوۆتىڭ اۆتورلىعى جانە رەجيسسەرلىگىمەن ء«جاننات», بەردىبەك سوقپاقباەۆتىڭ پوۆەسى بويىنشا دايىندالعان «مەنىڭ اتىم قوجا» قويىلىمىن ۇسىندى.
ء«جاننات» – دەسترۋكتيۆتى ءدىني اعىمداردىڭ قاتەرى تۋرالى قويىلىم. وتباسىنىڭ ارقاسۇيەر ازاماتى دۇنيە سالعاننان كەيىن بالاسى ءسۇيىنىش راديكالدى ءدىني ۇيىمنىڭ قاتارىنا قوسىلادى. ساناسىن تۇمان, كوڭىلىن كۇمان تورلاعان جاس جىگىت قازاقى تانىم-تۇسىنىككە قىرىن قاراي باستايدى. اقىرى جاناشىر ادامدار باۋىرلارىنان, ەڭ قورقىنىشتىسى, تۋعان اناسىنان الىستاي باستاعان جىگىتتى وتباسىنا قايتارۋدىڭ امالىن ىزدەيدى.
«قوعامداعى كوپتەگەن ب ۇلىكتىڭ باسى بولىپ وتىرعان ءدىني اعىمداردىڭ يدەولوگياسىنا ونەر ارقىلى قارسى تۇرۋدى كوزدەدىك. تۋرا جولدان تايىپ, وپىق جەگەندەردىڭ جان ازابىن كورگەن جۇرت بۇدان ومىرلىك ساباق الادى دەگەن سەنىمدەمىن», دەيدى جاستار تەاترىنىڭ جەتەكشىسى ءارى قويىلىمداعى انا ءرولىن سومداعان گۇلنۇر قايىرليەۆا.
قويىلىم رەجيسسەرى مۇقانعالي تومانوۆ بۇدان بۇرىن شىڭعىس ايتماتوۆتىڭ «ماڭگۇرت», راقىمجان وتارباەۆتىڭ «باس», يران-عايىپتىڭ ء«سۇيىنباي» درامالارىمەن تانىس. ونىڭ كىرىسكەن جۇمىستارىن ساراپتاي وتىرىپ, شىعارماشىلىق زەرتحاناسىندا ادام جانىن باستى ورىنعا قوياتىنىن بايقايمىز.
«مەن ءاربىر قويىلىمدا ادامنىڭ سىرتقى كەلبەتىنەن بۇرىن جانىنا ۇڭىلۋگە, ىشكى جان دۇنيەسىن اشۋعا باسا ءمان بەرەمىن. كوپشىلىك ادام قازىر ومىرىندە نە بولىپ جاتقانىن ەشكىمگە, ءتىپتى جاقىندارىنا دا بىلدىرمەيدى. مىنە, مەن سونى اشىپ كورسەتۋگە تىرىسامىن. بۇل رەتتە ۇزىن-سونار مونولوگتەر ەمەس, ەموتسيا, پلاستيكالىق شەشىمدەر ارقىلى ىشكى كوڭىل كۇيدى جەتكىزۋ ماڭىزدى. تەاتر دەگەن ۇنەمى وزگەرىپ, دامىپ وتىراتىن قۇبىلىس ءتارىزدى, سوندىقتان ناعىز شىعارماشىلىق ىزدەنىستەر مەن جەتىستىكتەر الدا دەگىم كەلەدى», دەيدى رەجيسسەر.
ال ەكىنشى قويىلىم – بيىل تۋعانىنا 100 جىل تولىپ جاتقان كورنەكتى جازۋشى بەردىبەك سوقپاقباەۆتىڭ پوۆەسى بويىنشا دايىندالعان «مەنىڭ اتىم قوجا» سپەكتاكلى. اكتەرلەردىڭ وبرازى كوپشىلىكتىڭ كوڭىلىندە جاقسى جاتتالعان, ابدوللا قارساقباەۆ تۇسىرگەن فيلمنەن الشاق كەتپەگەن.
بۇدان بولەك, تەاتر رەپەرتۋارىندا «ۇيلەنۋ وڭاي» كومەدياسى مەن «كلەوپاترا» دراماسى بار. تەاتر ديرەكتورى ءامىرجان نۇرلان ۇلىنىڭ ايتۋىنشا, الداعى ۋاقىتتا ۇجىم استاناداعى مۋزىكالىق جاس كورەرمەن تەاترىمەن سەلبەستىك ورناتىپ, بىرلەسە جۇمىس ىستەۋدى جوسپارلاپ وتىر.