پاۆلودار قالاسىندا كونستيتۋتسيا مەرەكەسىنە وراي, سونىمەن قاتار دۇنيەجۇزىلىك كوشپەندىلەر ويىنى قارساڭىندا ەلىمىز بويىنشا العاش رەت 100 كۇيشى ءبىر مەزەتتە «ورتەكە» كۇيىن ورىندادى.
رەكورد پاۆلودار قالاسى, ورتالىق جاعالاۋ, «Ertis Promenade» ساحناسىندا 30 تامىز كۇنى ورىندالدى. قازاقستان رەكوردىن ورناتۋعا قالاداعى «مۋزىكالىق كوللەدج دارىندى بالالارعا ارنالعان مۋزىكالىق مەكتەپ-ينتەرنات» كەشەنى, قۇرمانعازى اتىنداعى بالالار مۋزىكا مەكتەبى, «جىگەر» بالالار-جاسوسپىرىمدەر كلۋبىنىڭ ونەرپازدارى قاتىستى.
- كۇيشىلىك ونەردە جۇرگەن شەبەر دومبىراشىلار «ورتەكەنى» كونەدەن بەرى شەبەر بيلەتە بىلگەن. ەكىنشى جاعىنان بالالارعا ارنالعان شىعارمالاردى دارىپتەۋ ءۇشىن تاپتىرماس ونەر ءتۇرى. حالقىمىزدىڭ تابيعاتقا جاقىندىعىن, جابايى جانۋارلارعا دەگەن قامقورلىعىن تانىتاتىن ەرەكشەلىگى دە بار. ءبىلىم بەرۋ ۇيىمدارى ونەرلى بالالاردىڭ باسىن قوسىپ, ورتەكەلەردى بيلەتە وتىرىپ, «قاراجورعا», «سالكۇرەڭ», «سەكىرتپە» كۇيلەرىن ساحنادا ءساتتى ورىنداپ شىقتى, - دەيدى دارىندى بالالارعا ارنالعان مۋزىكالىق مەكتەپ-ينتەرنات كەشەنىنىڭ باسشىسى سەرىك قاسىمحانوۆ.
قازاقستان رەكوردتار كىتابىنىڭ رەسمي وكىلى قۋاندىق قۇدايبەرگەنوۆ پاۆلودارلىقتاردى جاڭا رەكوردپەن قۇتتىقتاپ, اتالعان وقۋ ورىندارىنىڭ وكىلدەرىنە سەرتيفيكاتتار تابىس ەتتى.
ورتەكە– قازاقتىڭ حالىق ءبيى. ونىڭ قۋىرشاق تەكە, جەكە ءبيشى جانە بيشىلەر توبى ورىندايتىن تۇرلەرى بار. بىرىنشىسىندە ۇستەل ۇستىنە ورناتىلعان قۋىرشاق-تەكەنىڭ اياعى, موينى, دەنەسى قوزعالمالى ەتىپ جاسالادى دا, جىڭىشكە جىپتەر ارقىلى دومبىراشىنىڭ ساۋساقتارىنا بايلانادى. «ورتەكە» - كۇيشىلىك ونەردەگى تارتىمدىلىق ءارى كورنەكىلىك ءۇشىن قولدانىلاتىن جانر.