اتا-انالارعا بالالاردى ەرتە جاستان كۇتۋ جانە دامىتۋ بويىنشا كونسۋلتاتسيالىق كومەك كورسەتۋ ءۇشىن «بەسكە دەيىن ۇلگەر» ءموبيلدى قوسىمشاسى ىسكە قوسىلادى, دەپ حابارلايدى Egemen.kz.
وقۋ-اعارتۋ مينيسترلىگىنىڭ حابرلاۋىنشا, ءموبيلدى قوسىمشا ۇيدە بالا تاربيەلەپ وتىرعان اتا-انالارعا دەنساۋلىق, تاماقتانۋ, تاربيە, داعدىلاردى قالىپتاستىرۋ مەن دامىتۋ جانە ءوزارا قارىم-قاتىناس قۇرۋ بويىنشا قولجەتىمدى اقپارات ۇسىنادى.
قوسىمشانىڭ مازمۇنى الەمدىك ينستيتۋتتاردىڭ نەيروبيولوگيالىق زەرتتەۋلەرىنىڭ عىلىمي دەرەكتەرى نەگىزىندە ازىرلەنگەن جانە ەلىمىزدىڭ مادەني-تاريحي قۇندىلىقتارى ەسكەرىلگەن.
«قازىرگى ۋاقىتتا قوسىمشا قاراعاندى, شىعىس قازاقستان, قىزىلوردا جانە اقتوبە وبلىستارىنىڭ مەكتەپكە دەيىنگى ۇيىمدارىمەن بىرلەسىپ پيلوتتىق رەجيمدە سىناقتان وتۋدە. ونى تولىق ماسشتابتاۋ قاراشا ايىندا جۇزەگە اسىرىلادى. سونداي-اق ونىڭ مازمۇنى ساباقتارعا ارنالعان يدەيالار مەن پراكتيكالىق كەڭەستەر ۇسىنىلا وتىرىپ, كونسۋلتاتسيالىق ورتالىقتاردا پايدالانىلاتىن بولادى», دەپ اتاپ ءوتتى مەكتەپكە دەيىنگى ءبىلىم بەرۋ دەپارتامەنتىنىڭ ديرەكتورى مانار اداموۆا.
ايتا كەتەرلىگى, ءموبيلدى قوسىمشا مەكتەپكە دەيىنگى ۇيىمداردىڭ كونسۋلتاتسيالىق پۋنكتتەرىندە قولجەتىمدى بولادى. اتا-انالار مەكتەپ جاسىنا دەيىنگى بالالاردى تاربيەلەۋ جانە دامىتۋ ماسەلەلەرى بويىنشا تاۋلىك بويى ادىستەمەلىك جانە پسيحولوگيالىق كومەك الا الادى.