الماتى وبلىسىنداعى قاپشاعاي سۋ قويماسى سوڭعى 10 جىلدا العاش رەت 18 ملرد تەكشە مەتردەن ارتىق سۋ جيناپ, 100%-عا تولدى, دەپ حابارلايدى Egemen.kz سۋ رەسۋرستارى جانە يرريگاتسيا مينيسترلىگىنىڭ ءباسپاسوز قىزمەتىنە سىلتەمە جاساپ.
سۋ قويماسى قىتاي اۋماعىنان باستاۋ الاتىن ترانسشەكارالىق ىلە وزەنىنىڭ سۋىن جينايدى. بيىل كوكتەمدە سەكۋندىنا 900 تەكشە مەترگە دەيىن سۋ كەلگەن. ماماندار مۇنىڭ سەبەبىن تيان-شان مۇزدىقتارىنىڭ ەرۋى مەن جاۋىن-شاشىننىڭ كوپ بولۋىمەن بايلانىستىرادى.
«قاپشاعاي سۋ قويماسى سوڭعى رەت 2014 جىلى 100%-عا تولعان بولاتىن. سۋارۋ ماۋسىمى باستالعالى شەڭگەلدى القابىنىڭ 6 مىڭ گەكتار جانە اقدالا القابىنىڭ 28 مىڭ گەكتار جەرىنە سۋ بەرىلدى. بۇگىنگى تاڭدا شارۋالاردىڭ سۇرانىسى بويىنشا سەكۋندىنا 750 تەكشە مەتر سۋ جىبەرىلىپ جاتىر», دەدى بالقاش-الاكول باسسەيندىك ينسپەكتسياسى باسشىسىنىڭ ورىنباسارى مەدەت كەرىمجانوۆ.
قازىر قاپشاعاي سۋ قويماسىندا 16 ملرد 200 ملن تەكشە مەتر سۋ بار. وبلىستا ۆەگەتاتسيا كەزەڭى قىركۇيەكتىڭ سوڭىنا دەيىن جالعاسادى. ودان كەيىن سۋ تاسقىنى كەزەڭىنە دايىندىق باستالادى.
ايتا كەتۋ كەرەك, سۋ رەسۋرستارى جانە يرريگاتسيا مينيسترلىگى قازاقستان مەن قىتاي اراسىنداعى ترانسشەكارالىق وزەندەردىڭ سۋىن ءبولۋ ماسەلەسى بويىنشا ۇكىمەتارالىق كەلىسىم جوباسىن ازىرلەپ جاتىر. ونىڭ ىشىندە ءۇش ءىرى ترانسشەكارالىق وزەن: ەرتىس, ىلە جانە ەمەل بار. بۇگىندە تاراپتار سۋ ءبولۋ ماسەلەسى بويىنشا كەلىسىمنىڭ بىرقاتار بابى بويىنشا ورتاق مامىلەگە كەلدى.