كولىك پوليتسەيلەرى قۇنى 370 ملن تەڭگەدەن اساتىن فەرروقورىتپانى ۇرلاعان قىلمىستىق توپتىڭ جولىن كەستى, دەپ حابارلايدى Egemen.kz كولىكتەگى پوليتسيا دەپارتامەنتىنىڭ ءباسپاسوز قىزمەتىنە سىلتەمە جاساپ.
كولىكتەگى پد باستىعى باقىتجان مالىباەۆتىڭ مالىمەتىنشە, كولىكتەگى پوليتسيا دەپارتامەنتىنىڭ جان-جاقتى تەرگەۋىنىڭ ارقاسىندا باس كولىك پروكۋراتۋراسىنىڭ ۇيلەستىرۋىمەن سەمەي جانە اياگوز ستانتسيالارى اراسىنداعى ۋچاسكەدە جۇك پويىزدارىنان بىرنەشە رەت فەرروقورىتپا ۇرلىعىن جاساعان توپتىڭ قىلمىستىق ارەكەتى توقتاتىلعان.
ونىڭ ايتۋىنشا, بۇل جۇك «قازحروم» تۇك» اق قۇرامىنا كىرەتىن اقسۋ فەرروقورىتپا زاۋىتىنا تيەسىلى بولعان. جۇك قىتاي ارقىلى جاپونيا مەن ۇندىستانعا جىبەرىلگەنى انىقتالدى.
«كومپانياعا كەلتىرىلگەن زالال سوماسى 370 ملن تەڭگەدەن استى. اباي وبلىسى جارما اۋداندىق سوتىنىڭ شەشىمىمەن كۇدىكتىلەر كىنالى دەپ تانىلىپ, 5 جىلدان 6 جىلعا دەيىن باس بوستاندىعىنان ايىرىلدى», دەدى پوليتسيا پولكوۆنيگى.
ۇكىم زاڭدى كۇشىنە ەنگەن جوق.