20 تامىزدا كولىك ءمينيسترى مارات قاراباەۆ ۇكىمەت بريفينگىندە ەل ازاماتتارىنىڭ نارازىلىعىن تۋدىرعان «InDrive» جانە «ياندەكس.تاكسي» جۇرگىزۋشىلەرىنىڭ 50 شاقىرىمنان استام قاشىقتىققا جۇرۋىنە شەكتەۋ ەنگىزۋ تۋرالى ۇسىنىسقا جاۋاپ بەردى, دەپ حابارلايدى Egemen.kz.
قاراباەۆتىڭ ايتۋىنشا, تاكسي جۇرگىزۋشىلەرىنە تىيىم سالۋ مينيسترلىكتىڭ ۇسىنىسى نەمەسە ەنگىزىلىپ جاتقان تۇزەتۋى ەمەس.
«بۇل مينيسترلىك تاراپىنان جۇرگىزىلىپ جاتقان تۇزەتۋ ەمەس ەدى. 50 نەمەسە 100 كم شەكتەۋ ماڭىزدى ەمەس. اتاپ ايتقاندا, مۇنداي وزگەرىس بولجانباعان. بۇل اگرەگاتورلاردىڭ قىزمەتىن جەتىلدىرۋ بويىنشا جۇمىس توبىنا قاتىسۋشىلاردىڭ ءبىرىنىڭ ۇسىنىستارى بولدى. مۇنداي تۇزەتۋ دايىندالمايدى جانە تالقىلانبايدى», دەپ قوستى ول.
ەسكە سالايىق, 30 شىلدەدە كولىك ءمينيسترى مارات قاراباەۆ «InDrive» جانە «Yandex.Taxi» تاكسي جۇرگىزۋشىلەرىنە 50 شاقىرىمنان استام قاشىقتىققا شەكتەۋ ەنگىزۋ جوسپارلانىپ وتىرعانىن حابارلادى.