ەلىمىزدە 50 مىڭنان استام ادامدى تارتا وتىرىپ, ەسىرتكى ساتۋ جونىندەگى 55 telegram-ارنانىڭ زاڭسىز قىزمەتى جويىلدى. ولاردىڭ جالپى اينالىمى 48 ملرد تەڭگەنى قۇرادى, دەپ حابارلايدى Egemen.kz قارجىلىق مونيتورينگ اگەنتتىگىنىڭ ءباسپاسوز قىزمەتىنە سىلتەمە جاساپ.
ايتا كەتەيىك, جىل باسىنان بەرى قما ماتەريالدارى بويىنشا ەلدىڭ قۇقىق قورعاۋ ورگاندارىمەن (ۇقك, بپ, ءىىم, سجقىقا) ەسىرتكىنىڭ زاڭسىز اينالىمىنا بايلانىستى 60 قىلمىستىق ىس قوزعالىپ, ونىڭ جارتىسى كونتراباندا فاكتىلەرى بويىنشا بولعان. ونلاين ناركوشوپتارعا قاتىستى تاعى 29 ماتەريال بويىنشا تەكسەرۋ ءىس-شارالارى جۇرگىزىلىپ جاتىر.
«اينالىمنان شامامەن 100 كگ اۋىر ەسىرتكى – كوكاين, كەتامين, مەفەدرون جانە ماريحۋانا, سونداي-اق ولاردى جاساۋ ءۇشىن 1 توننادان استام پرەكۋرسورلار تاركىلەندى», دەلىنگەن قما حابارلاماسىندا.
سونىمەن قاتار قىلمىستاردىڭ الەۋەتتى قاتىسۋشىلارى بولىپ تابىلاتىن 30 مىڭعا جۋىق «دروپتاردىڭ» بانكتىك كارتالارى بۇعاتتالعان. سونداي-اق شىمكەنتتە قازاقستانداعى ەڭ ءىرى مەفەدرون ءوندىرۋ جانە تاراتۋ ارناسى توقتاتىلعان. ەسىرتكى لابوراتورياسى قۇرىلىپ, وندا سينتەتيكالىق ەسىرتكى وندىرۋگە ارنالعان 1 توننادان استام قىشقىل تاركىلەنگەن. ونىڭ وندىرىستىك قۋاتى اي سايىن 50 مىڭ دوزا ەسىرتكى وندىرۋگە مۇمكىندىك بەرەتىنى انىقتالعان.
بۇل رەتتە حالىقارالىق ىنتىماقتاستىق اياسىندا قما اناليتيكالىق مالىمەتتەر نەگىزىندە تمد كەڭىستىگىندە ەسىرتكى تاراتقان ترانسۇلتتىق ينتەرنەت-دۇكەندەردى جويۋ بويىنشا قازاقستان, بەلارۋس جانە رەسەي قارجى بارلاۋشىلارىنىڭ قاتىسۋىمەن ارنايى وپەراتسيا جۇرگىزىلگەن.
ء«ۇش ەلدىڭ اۋماعىندا ءۇش اۋقىمدى ەسىرتكى دۇكەنى جابىلدى, 35 ناركوديلەر ۇستالدى, 1 توننادان استام پسيحوتروپتىق زاتتار جانە كليەنتتەرگە ساتۋعا دايىن 3,5 مىڭ دوزاعا جۋىق سينتەتيكالىق ەسىرتكى تاركىلەندى», دەلىنگەن حابارلامادا.
حالىقارالىق «ەسىرتكى ساتۋشىلاردىڭ» جالپى تابىسى شامامەن 30 ميلليون اقش دوللارىن قۇراعان, ونىڭ 12 ميلليونى كريپتوۆاليۋتادا شىعارىلعان. قما باستاماسى بويىنشا ۇلتتىق بانكتىڭ جانە قنردا قاۋلىلارىنا وزگەرىستەر ەنگىزىلىپ, ءبىر كليەنتكە بىرنەشە بانك كارتاسىن شىعارۋ بويىنشا شەكتەۋلەر بەلگىلەندى جانە ونلاين رەجيمدە ولاردىڭ مونيتورينگى قامتاماسىز ەتىلگەن.
سونىمەن قاتار رەزيدەنت ەمەس جانە كامەلەتكە تولماعاندارعا تولەم كارتوچكالارىن بەرۋ كەزىندە قوسىمشا باقىلاۋ جانە شەكتەۋ شارالارى بەلگىلەندى. ال, جاڭا كليەنتتى تىركەۋ كەزىندە مىندەتتى بيومەتريالىق سايكەستەندىرۋدى جۇرگىزە وتىرىپ, تولەم كارتالارىن شىعارۋ بويىنشا بانكتەردىڭ ىشكى باقىلاۋ شارالارى كۇشەيتىلگەن.
ايتا كەتەيىك, ەسىرتكىنىڭ تارالۋ بەلگىلەرى مەن كريتەريلەرى بارلىق بانكتەرگە جىبەرىلگەن. بۇل ەسىرتكى ساۋداسىنىڭ فاكتىلەرىن ودان ءارى انىقتاۋعا مۇمكىندىك بەرەدى. اتالعان نورمالاردىڭ قولدانىلۋ مەرزىمىنەن باستاپ بىرنەشە كارتا ۇستاۋشىلار سانى 9,5 مىڭنان 3,6 مىڭ كليەنتكە دەيىن قىسقارىپ, 1,5 مىڭ كليەنتكە قاشىقتان قىزمەت كورسەتۋ قولجەتىمسىز بولعانى بەلگىلى بولدى.