قازىر ويناي وتىرىپ, ويلاۋعا جەتەلەيتىن زياتكەرلىك سايىستار كوپشىلىككە كەڭىنەن تانىمال. زاماناۋي ءارى كرەاتيۆتى ويلايتىن جاستاردى بىرىكتىرەتىن كوڭىلدى كۋيز ويىندارىنىڭ ءتۇر-ءتۇرى بار. سولاردىڭ اراسىندا «IQas» جوباسىنىڭ ورنى ەرەكشە. سۇراقتارى قازاقى تانىمعا نەگىزدەلگەن. كەز كەلگەن قاتىسۋشى جاۋابىن تابا الاتىنداي لوگيكاعا قۇرىلعان.
بۇل توپتىق ويىنعا قاتىسۋشىلار 8-10 ادامنان كوماندا بولىپ تىركەلىپ, الدىن الا جازىلادى. جارىس «كىرىسپە», «قيسىن», «مەديا», «بايلانىس», «كۇردەلى», «تاۋەكەل» دەگەن التى كەزەڭنەن تۇرادى. سايكەسىنشە, ءار كەزەڭنىڭ سۇراقتارى دا ءارتۇرلى.
ويىننىڭ ۇيىمداستىرۋشىسى مەرەي ەرمۇحاننىڭ ايتۋىنشا, بۇل زياتكەرلىك سايىستىڭ ماقساتى – جاستاردىڭ وي-ءورىسىن, ءبىلىمىن جەتىلدىرۋ, بوس ۋاقىتىن ءتيىمدى وتكىزۋگە جاردەمدەسۋ.
– «IQas» 2022 جىلى «ەلارناداعى» تەلەجوبادان باستالعان ەدى. 2023 جىلى ۇجىمدار اراسىنداعى ليگاعا اينالدى. الايدا قازىر ۇجىمدار ويىنى جوبامىزدىڭ تەك ءبىر بولشەگى عانا. ءبىلىمپازدار باسەكەسى استانادا وسىمەن ون ءتورتىنشى رەت ءوتىپ وتىر. جارىستى جۇيەلى تۇردە ەكى اپتا سايىن ۇيىمداستىرامىز. جالپى, جوبانىڭ اتاۋىندا وزىندىك ءمان بار. بىرىنشىدەن, مۇنى اقىلدىلار ايقاسى دەپ تۇسىنسەك بولادى. ەكىنشىدەن, «IQas» دەگەندەگى «IQ» اقىل-وي قابىلەتىنىڭ كورسەتكىشىن بىلدىرەدى. سوندا «اقىلىڭ ساعان اس بولسىن, ازىق بولسىن» دەگەن ماعىنا جاتىر مۇندا.
– بايقاپ وتىرمىز, ءبىر ويىندا جالپى سانى قىرىق ءتورت سۇراق بولادى ەكەن. قيىن ساۋالدىڭ قيۋىن كەلىستىرۋ دە وڭاي ەمەس. سونىڭ ءبارىن قانشا ۋاقىتتا قۇرايسىز؟
– مەن سىزگە قىزىق ايتايىن. كەيبىر سۇراق 15 سەكۋندتا دايىن بولادى. ويلانىپ, تولعانىپ, ءۇش جىل قۇراعان سۇراقتارىمىز دا بار. ساۋالىمىزدى بارىنشا تاريحي-مادەني باعىتتا قويۋعا تىرىسامىز.
– وسىعان دەيىنگى ويىنداردا تىركەلگەن رەكوردتىق كورسەتكىش بار ما؟
– جاقىندا 23 كوماندا قاتىسقان سايىس بولدى. ءار توپتا كەمى بەس ادامنان بولسا, ولاردىڭ قانشالىق كوپ بولعانىن ءوزىڭىز ەلەستەتە بەرىڭىز. دەمەك قوعام تاراپىنان قىزىعۋشىلىق جوعارى. ودان بولەك, ءبىر ويىندا 54 ۇپايدان 51 ۇپاي العان توپتار دا بولدى. بۇل – ءبىزدىڭ باسەكەگە تۇراقتى قاتىسقان ويىنشىلاردىڭ ناتيجەسى.
– بىلۋىمىزشە, «Quiz» ويىندارىنىڭ يگىلىگىن قاتىسۋشىلار عانا كورمەيدى. «تۇتىنۋشى بار جەردە, تابىس بار» دەگەندى ەسكەرسەك, بۇل ينتەللەكتۋالدى سايىستى بيزنەستىڭ ءبىر بولشەگى دەۋگە دە كەلەتىن سەكىلدى؟
– ءيا, ءاربىر قاتىسۋشى تاراپىنان 2000-3000 تەڭگە كولەمىندە جارنا تولەنەدى. وسى قارجىدان تولىقتاي وتەتىن ورنى, ديپلومدارى, سىيلىقتار, فوتو جانە ۆيدەو ءتۇسىرىلىم وتەلەدى. بىراق ۇيىمداستىرۋشىلار «Quiz» ويىندارىن تابىس ءۇشىن وتكىزبەيدى. بۇل جەردە كوبىنە شىعارماشىلىق, رۋحاني ازىق باستى نىسانادا. كەيدە ستۋدەنتتەردى تەگىن قاتىستىرامىز. ءبىرىنشى رەت كەلگەندەردەن دە اقى سۇرامايمىز. ءبىزدىڭ جوباعا قىزىققان ءاربىر ازامات ءوزىنىڭ وبلىسىندا, قالاسىندا ءدال وسى قازاقشا ينتەللەكتۋالدى ويىندى فرانشيزا ارقىلى ۇيىمداستىرسا بولادى. ماسەلەن, قازىر اتىراۋ قالاسى قولعا الدى. ەندى الداعى ۋاقىتتا الماتى, اقتوبە, تۇركىستان سەكىلدى قالالاردا «IQas»-تىڭ ەسىگىن ايقارا اشساق دەگەن ويىمىز بار. ماقساتىمىز – قازاقى ينتەللەكتۋال ورتانى قالىپتاستىرۋ, – دەيدى مەرەي ەرمۇحان.