قىستىڭ قامىن جاز ويلا

«مىس وندىرەتىن كومپانياعا ايماق تۇرعىندارى ءدان ريزا. پرەزيدەنتتىڭ شاقىرۋىمەن كومپانيا تاسقىننان زارداپ شەككەندەرگە 481 پاتەر الىپ بەرۋ ءۇشىن 8,5 ملرد تەڭگە قاراستىردى. سونداي-اق جاڭا 80 ءۇيدىڭ قۇرىلىسىنا 2,2 ملرد تەڭگە ءبولدى», دەيدى «Qyzyljar Asar» كورپوراتيۆتىك قورىنىڭ جەتەكشىسى قانات وماروۆ.

جاڭادان تۇرعىزىلاتىن كوتە­رى­لىم ستانساسىنا ەلەكتر قۋاتىن ۇزدىكسىز جەتكىزىپ تۇراتىن 3,5 شا­قىرىمدىق جەراستى كابەلى جەر­گىلىكتى بيۋدجەتتەن بولىنەتىن قارا­جات­قا تارتىلماقشى. ستانسا اي­نالاسىنداعى بوگەتتى دە نىعايتۋ جوسپارلانعان. بىلتىر سۋ ەسكى بو­گەت­تەن اسىپ, الىپ سەڭ ستانسانى تالقانداپ كەتكەن. ەندى ونى بارىنشا بيىك ءارى بەرىك قىلىپ ورناتۋ قاجەتتىگى تۋىندادى. سونداي-اق ويقالادا قوسىمشا سورعى ستانساسىن ورناتۋ كوزدەلگەن. قازىر ونىڭ جوبالىق-سمەتالىق قۇجاتتاماسى ازىرلەنىپ جاتىر.

جۋىردا سورعى ستانساسىنىڭ قۇرىلىسىن باقىلاۋعا وبلىس اكىمى عاۋەز نۇرمۇحامبەتوۆ بارىپ,­ جىل اياعىنا دەيىن اياقتالۋى جوسپار­لان­­عان نىساننىڭ قازىرگى احۋالىن كوردى.

«سورعى ستانساسىن قالپىنا كەلتىرۋ مەن جاڭعىرتۋ وبلىس ورتا­لىعى تۇرعىندارىن تازا اۋىزسۋمەن ءۇزىلىسسىز قامتاماسىز ەتۋ ءۇشىن وتە ماڭىزدى. ال قوسىمشا سورعى ورناتۋ – بولاشاقتا بولۋى مۇمكىن تاس­قىننىڭ الدىن الۋعا قاجەت», دەدى ايماق باسشىسى.

پەتروپاۆلدىڭ قىسقا دايىندى­عى­نىڭ ەڭ ۇلكەن كريتەريى – قالا مەن وبلىستى جىلۋ جانە جارىق­پەن قامتاماسىز ەتەتىن جەو-2-ءنىڭ ساقاداي ساي بولۋى. وسى ۋا­قىت­قا دەيىن ونىڭ شۋلى دابىراسى تا­لاي شىعىپ, رەسپۋبليكا تۇر­عىندارىنا تانىمال بولعان. الدىمەن 2022 جىلى ناۋرىزدا ءتۇتىن شىعاراتىن 150 مەترلىك ءبىر مۇرجاسى ورتان بەلىنەن قۇلادى. ول ءبىر ادامنىڭ ءومىرىن قيىپ كەتتى. قالپىنا كەل­تىرىلە باستاعاندا قيسايىپ ءورىلىپ بارا جاتقانى انىقتالىپ, ءتۇپ-ورنىمەن قايتا قۇلاتىلدى. قازىر ىرگەتاسىنان قايتا ءورىلىپ جاتىر. سوعان قاراماستان بىلتىرعى اۋىر قىستا باسقا مۇرجالار سىر بەرمەي, بارلىق قازاندىق قالىپتى جۇمىس ىستەپ, ەشقانداي جامانشىلىققا دۋشار ەتكەن جوق. سولاي دەسەك تە كاسىپورىننىڭ بيىلعى قىسقا دايىندىعى ۇكىمەت پەن جەرگىلىكتى بيلىكتىڭ نازارىندا.

وتكەن ايدا وبلىسقا كەلگەن پرەمەر-ءمينيستردىڭ ءبىرىنشى ورىنباسارى رومان سكليار جىلۋ بەرۋ ماۋسىمىنا دايىندىق بارىسىمەن تانىسۋ ءۇشىن الدىمەن وسى جەو-عا باردى. كاسىپورىن جابدىقتارىنىڭ 57,3%-عا توزعانى, جىلۋ جەلىلەرىنىڭ 77,5%-عا ەسكىرگەنى ەسكەرىلىپ, بيىل وبلىس­تا اۋقىمدى جوندەۋ جۇمىستارى باستالدى. پەتروپاۆل جەو-2-دە ين­ۆەستيتسيالىق جانە جوندەۋ ناۋقانى شەڭبەرىندە اكتسيونەرلەر تاراپىنان 17,6 ملرد تەڭگەگە جۇمىس اتقارۋ جوسپارلانعان. 2027 جىلعا دەيىن 739 كم ەلەكتر جە­لىلەرى مەن 240 قوسالقى ستانسا سالۋ ءۇشىن جىل سايىن 4 ملرد تەڭ­گە­دەن بيۋدجەت قاراجاتىن ءبولۋ جوسپارلانعان.

وبلىستاعى جىلىتۋ ناۋقانىنا دايىندىقتىڭ تاعى ءبىر ۇلكەن قىرى بار. ول – بولۋى مۇمكىن ءورتتىڭ ال­دىن الۋ. وزدەرى وت جاعاتىن جەكە­مەنشىك تۇرعىن ۇيلەردىڭ جىلىتۋ پەشىنىڭ قىسقا دايىندىعى دا ۇنەمى باقىلاۋدا بولۋى كەرەك. ايتپەسە ءتىلسىز جاۋدىڭ ءورىس الۋى وپ-وڭاي. وبلىستىق تجد باستىعىنىڭ ورىنباسارى دميتري ءراستيحيننىڭ ايتۋىنا قاراعاندا, بيىل 240 رەت ءورت شىعىپ, 16 ادامنىڭ ءومىرىن جالماعان ەكەن. كەلتىرىلگەن شىعىن 85 ملن تەڭگەدەن اسقان.

«سول ءورتتىڭ 74%-ى جەكەمەنشىك تۇرعىن ءۇي سەكتورىنىڭ ۇلەسىندە. ءورتتىڭ نەگىزگى سەبەبى – پەش جاساۋ مەن ونى قولدانۋدا جانە ەلەكتر قۇرالدارىن ورناتۋ كەزىندە ءورت قاۋىپسىزدىگىن ساقتاماۋ», دەيدى ول.

ءورتتىڭ الدىن الۋ ءۇشىن تجد قىزمەتكەرلەرى جىل باسىنان بەرى 103 مىڭنان اسا تۇرعىن ءومىر سۇرەتىن 49 مىڭنان استام ۇيگە تەكسەرىس جۇرگىزگەن. سونىمەن قاتار ءورت قاۋىپسىزدىگى تۋرالى 71 مىڭ جادىناما تاراتىلىپتى.

سولتۇستىك قازاقستان وبلىسى