ەلدەگى كوروناۆيرۋس بويىنشا احۋال باقىلاۋدا - مينيسترلىك

دەنساۋلىق ساقتاۋ مينيسترلىگىنىڭ مالىمەتىنشە,  كوروناۆيرۋس ينفەكتسياسىنا مونيتورينگ جۇرگىزۋ 2022 جىلدان بەرى جرۆي جانە تۇماۋ بويىنشا قولدانىستاعى ەپيدقاداعالاۋ جۇيەسىنە ەنگىزىلگەن.

«مونيتورينگ قازىرگى تاڭدا ەلدە رەسپيراتورلى ۆيرۋستار, سونىڭ ىشىندە كۆي اينالىمى دا بايقالاتىنىن كورسەتتى. وسى جىلدىڭ باسىنان بەرى كۆي بويىنشا 1 290 جاعداي تىركەلدى. قايتىس بولعاندار جوق», دەلىنگەن ءباسپاسوز حابارلاماسىندا.

بۇل رەتتە جرۆي, ۆيرۋستى پنەۆمونيا جانە كۆي جۇقتىرىپ اۋرۋحاناعا تۇسكەندەر جوق. بۇل كۆي بويىنشا دەرت اعىنى جەڭىل تۇردە ءوتىپ جاتقانىنىڭ بەلگىسى.

«سونىمەن سەكۆەنيرلەۋدىڭ سوڭعى دەرەكتەرىنە سايكەس, قازاقستاندا الەمدەگىدەي 100 پايىز جاعدايدا وميكرون شتاممىنىڭ ءتۇرلى نۇسقالارى اينالىستا ءجۇر», دەلىنگەن حابارلامادا.

ايتا كەتەيىك, باس سانيتارلىق دارىگەردىڭ مىندەتىن اتقارۋشى تۇماۋ, جرۆي جانە كوروناۆيرۋس ينفەكتسياسىنىڭ الدىن الۋ شارالارى تۋرالى قاۋلىعا قول قويعان. وندا مەديتسينالىق ۇيىمدار بەتپەردەلەر مەن انتيسەپتيكتەردى قولدانۋى كەرەكتىگى جانە بەلگىلەرى بار ناۋقاستاردى قابىلداۋ ءۇشىن كىرە بەرىستە سۇزگىلەر بولۋى كەرەكتىگى ايتىلعان.

ەسكە سالا كەتەيىك, 2024 جىلدىڭ التى ايىندا قازاقستاندا پنەۆمونيانىڭ 49 704 جاعدايى تىركەلگەن, بۇل وتكەن جىلدىڭ سايكەس كەزەڭىمەن سالىستىرعاندا 19,2 پايىزعا كوپ.