بىلتىر مەملەكەت باسشىسى قازاقستان حالقىنا ارناعان جولداۋىندا ەلىمىز جاساندى ينتەللەكتىنى دامىتۋعا باسا نازار اۋدارۋعا ءتيىس ەكەنىن ايتا كەلىپ: «جەتەكشى حالىقارالىق كومپانيالارمەن ىنتىماقتاستىق ورناتۋ كەرەك. بىلىكتى ماماندار دايارلاۋىمىز قاجەت. كەمىندە ءۇش بەلگىلى جوعارى وقۋ ورنى جاساندى ينتەللەكت سالاسىنا قاجەتتى كادر دايارلاۋمەن جانە زەرتتەۋلەر جۇرگىزۋمەن اينالىسۋى كەرەك», دەگەن ەدى.
مىنە, وسى باعىتتا عىلىم جانە جوعارى ءبىلىم مينيسترلىگى بىرقاتار جوبانى قولعا الدى. سونىڭ ءبىر دالەلى – ق.ساتباەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتى مەن د. سەرىكباەۆ اتىنداعى شىعىس قازاقستان تەحنيكالىق ۋنيۆەرسيتەتىنىڭ بازاسىندا تسيفرلىق ۋنيۆەرسيتەتتەردىڭ مودەلى ازىرلەنىپ, ول قاناتقاقتى رەجىمىندە ىسكە قوسىلدى. سونداي-اق تسيفرلىق ەكونوميكاعا بەيىمدەلگەن مامانداردىڭ الەۋەتىن دامىتۋ ءۇشىن «Google», «Nvidia», «Coursera», «01 Edu System» جانە «Huawei» سياقتى ترانسۇلتتىق كومپانيالارمەن ىنتىماقتاستىق ورنادى. ماسەلەن, بيىل 15 وتاندىق جوعارى وقۋ ورنى جاساندى زەردە بويىنشا «Google» كۋرسىن ەنگىزدى. 12 000 ستۋدەنت «Generative AI» جوباسىنا قاتىسادى. سونىمەن قاتار اباي اتىنداعى قازاق ۇلتتىق پەداگوگيكالىق ۋنيۆەرسيتەتى جانە ق.جۇبانوۆ اتىنداعى اقتوبە وڭىرلىك ۋنيۆەرسيتەتى «Google for Education» قاناتقاقتى جوباسىنا قاتىسۋدى كوزدەپ وتىر. ال «NVIDIA-مەن» ىنتىماقتاستىققا كەلسەك, «DLI» جوباسىنا 12 ۋنيۆەرسيتەت قاتىسسا, 12 ادام «NVIDIA سەرتيفيكاتىن الدى. ءبىر وقىتۋشى «DLI» سەرتيفيكاتىنا يە بولدى.
ىنتىماقتاستىقتى دامىتۋ جانە وقىتۋدىڭ يننوۆاتسيالىق تەحنولوگياسىن قولدانۋ ماقساتىندا «Coursera», «Huawei Technologies Kazakhstan» «LLP», «Binance Kazakhstan» سياقتى اتاعى جەر جارعان كومپانيالارمەن كەلىسسوز جۇرگىزىلىپ, مەموراندۋمعا قول قويىلدى. 35 جوعارى وقۋ ورنى بازاسىندا «Huawei ICT Academy» قۇرىلدى, ەندى وندا «Huawei» سەرتيفيكاتتالعان كۋرسى وتەدى. «Binance Kazakhstan» قولداۋىمەن 22 جوعارى وقۋ ورنىنىڭ اقپاراتتىق-كوممۋنيۋاتسيالىق تەحنولوگيالار فاكۋلتەتىنىڭ 350-گە جۋىق وقىتۋشىسى بلوكچەين-تەحنولوگيا بويىنشا ءبىلىمىن جەتىلدىردى. «Coursera»-نىڭ 102-گە جۋىق كۋرسى قازاق جانە ورىس تىلدەرىنە اۋدارىلدى.
بيىل 93 جوعارى وقۋ ورنىنىڭ ستۋدەنتىنە 40 مىڭ ليتسەنزيا ءبولىندى. قىسقاسى, وتاندىق ستۋدەنتتەرگە الەمنىڭ جەتەكشى ۋنيۆەرسيتەتتەرى مەن پروفەسسورلارىنىڭ 20 مىڭنان استام ونلاين كۋرسى مەن AI بويىنشا 4 200 كۋرسى قولجەتىمدى بولىپ وتىر. Iت باعىتىندا ستۋدەنتتەردى «OpenSearch» جوباسىنا تارتۋ جانە سالالىق دەڭگەيدەگى تاجىريبە جيناۋ ءۇشىن عىلىم جانە جوعارى ءبىلىم مينيسترلىگى مەن «Amazon» كومپانياسى اراسىندا مەموراندۋمعا قول قويىلدى.
قازىر اتالعان مينيسترلىك «01 EduSystem» كومپانياسىمەن يننوۆاتسيالىق باعدارلامالاۋ مەكتەپتەرىن اشۋ اياسىندا ءوزارا ىنتىماقتاستىق بويىنشا جۇمىس جۇرگىزۋ ۇستىندە. بۇل جوبا ەلىمىزدىڭ 20 وڭىرلىك جوعارى وقۋ ورنىندا ىسكە اسىرىلسا, ش.ەسەنوۆ اتىنداعى كاسپي تەحنولوگيالار جانە ينجينيرينگ ۋنيۆەرسيتەتىندە قاناتقاقتى جوبا رەتىندە جۇرگىزىلەدى. سونداي-اق وقىتۋدىڭ جاڭا ءتۇرى – ونلاين وقۋ ەنگىزىلدى. ايتقانداي, جوعارى وقۋ ورىندارىنداعى تسيفرلىق ەكوجۇيە دە كۇشەيتىلدى. بارلىق ۋنيۆەرسيتەت «LMS» («Platonus», «Univer», «Moodle» جانە ت.ب.) پلاتفورماسىنا قوسىلدى.
قورىتا كەلگەندە, بۇگىندە ەلىمىزدەگى 17 جوعارى وقۋ ورنىندا 15 ءبىلىم بەرۋ باعدارلاماسى بويىنشا 2000-نان اسا ستۋدەنت جاساندى ينتەللەكت سالاسىندا وقيدى. ەندى وسى سالاعا بىلىكتى ماماندار دايارلاۋ ءۇشىن «بولاشاق» باعدارلاماسى ارقىلى جىل سايىن 100 ستيپەنديا ءبولۋ جوسپارلانىپ وتىر.