مەملەكەت باسشىسى قاسىم-جومارت توقاەۆتىڭ «Egemen Qazaqstan» گازەتىندە جاريالانعان «ورتالىق ازيا رەنەسسانسى: ورنىقتى دامۋ جانە وركەندەۋ جولى» اتتى ماقالاسىندا ورتالىق ازيا ەلدەرى اراسىنداعى قارىم-قاتىناستىڭ ءمان-ماڭىزى تۋرالى جازىلعان, دەپ حابارلايدى Egemen.kz.
«وڭىردەگى مەملەكەتارالىق قاتىناستار دا تۇبەگەيلى وزگەرىسكە ۇشىرادى. ەلدەرىمىزدىڭ اراسىندا بارلىق دەڭگەيدە سىندارلى ەكىجاقتى جانە كوپجاقتى ديالوگ جولعا قويىلدى, ءوزارا ءتيىمدى ىنتىماقتاستىق دامىپ كەلەدى. وسىعان دەيىن ايماقتاعى قارىم-قاتىناستى جان-جاقتى دامىتۋعا كەدەرگى كەلتىرىپ, قايشىلىق تۋعىزعان ماسەلەلەردى شەشۋ جولىنداعى جەتىستىكتەرىمىزدىڭ ءمان-ماڭىزى زور», دەپ جازدى مەملەكەت باسشىسى.
پرەزيدەنت سۋ-ەنەرگەتيكا سالاسىندا ءوزارا ءتيىمدى شەشىم تابۋعا قاتىستى تابىستاردى جوعارى باعالاعان.
«مەملەكەتتىك شەكارالاردى دەليميتاتسيالاۋعا, شەكاراداعى وتكىزۋ بەكەتتەرىنىڭ جۇمىسىن جەتىلدىرۋگە, كولىك قاتىناسىن كەڭەيتۋگە, جاڭا باعىتتاردى ىسكە قوسۋعا جانە ازاماتتاردىڭ بارىس-كەلىسىن جەڭىلدەتۋگە قاتىستى ماسەلەلەردى كەزەڭ-كەزەڭىمەن شەشۋگە قولايلى جاعداي جاسالىپ وتىر. ءوڭىردىڭ ۇزاقمەرزىمدى قاۋىپسىزدىگىن جانە وركەندەۋىن قامتاماسىز ەتۋ ءۇشىن كۇش بىرىكتىرۋ جولىنداعى ءىس-قيمىلدار دا تۇراقتى تۇردە جۇزەگە اسىرىلىپ كەلەدى. بۇل باعىتتان اينىماسىمىز انىق», دەلىنگەن پرەزيدەنت ماقالاسىندا.
سونداي-اق قاسىم-جومارت توقاەۆ بەس مەملەكەت اراسىنداعى ساياسي, ساۋدا-ەكونوميكالىق جانە مادەني-گۋمانيتارلىق قاتىناستار ناقتى مازمۇنعا يە بولىپ, تەرەڭ ستراتەگيالىق ارىپتەستىك پەن وداقتاستىق دەڭگەيگە كوتەرىلگەنىن جازعان.
«ورتالىق ازيا مەملەكەتتەرى سىرتقى ساياسي قارىم-قاتىناستا ءوزىنىڭ ساليقالى ستراتەگياسىن جاساي الدى. بۇل قادام ەلارالىق جانە وڭىرارالىق مۇددەلەر تەپە-تەڭدىگىن ساقتاپ, ەلدەرىمىزدىڭ جاھاندىق ۇدەرىستەرگە تولىققاندى قاتىسۋىنا جول اشتى. ورتالىق ازيا ەلدەرى تمد, شىۇ, اوسشك, ەىۇ, ەاەو, تمۇ جانە باسقا دا تابىستى ءارى ىقپالدى ۇيىمداردىڭ قۇرىلتايشىسى رەتىندە بەيبىتشىلىكتى جاقتايتىن مەملەكەتتەر ەكەنىن دالەلدەي وتىرىپ, ءوزىنىڭ يدەيالارى مەن جوبالارىن كوپجاقتى قۇرىلىمداردا بەلسەندى تۇردە ىلگەرىلەتىپ كەلەدى. مىنە, وسىنىڭ ءبارى «ورتالىق ازيا بەستىگىن» ەۋرازيا قۇرلىعىنىڭ تورىندە تۇراقتى دامىپ كەلە جاتقان باقۋاتتى ەلدەر دەپ سەنىممەن ايتۋعا مۇمكىندىك بەرەدى.
ورتاق تاريحىمىز, عاسىرلار بويى جالعاسىپ كەلە جاتقان دوستىعىمىز بەن تاتۋ كورشىلىك ءداستۇرىمىز باۋىرلاس حالىقتاردى بۇرىنعىدان دا جاقىنداستىرا تۇسەتىن مىزعىماس تۇعىر بولىپ قالا بەرەتىنى انىق», دەپ جازدى ق.توقاەۆ.
ماقالانىڭ تولىق نۇسقاسىن وقۋ ءۇشىن مىنا سىلتەمەگە وتىڭىز.