تۋريزم جانە سپورت ءمينيسترى ەرمەك مارجىقپاەۆ وليمپيا ويىندارىنىڭ قولا جۇلدەگەرى نازىم قىزايبايدى قۇتتىقتادى, دەپ حابارلايدى Egemen.kz.
ۇلتتىق قۇراما بوكسشىسى نازىم قىزايباي پاريج وليمپياداسىنىڭ جارتىلاي فينالىندا حانچجوۋداعى جازعى ازيا ويىندارىنىڭ جەڭىمپازى, الەم چەمپيونى قىتايلىق ۋ يۋدان جەڭىلىپ قالدى. وسىلايشا ول وليمپيادانىڭ قولا جۇلدەسىن مىسە تۇتتى. ايتا كەتەيىك, بۇل بوكستان قازاقستان قۇراماسىنىڭ ءبىرىنشى مەدالى.«قازاقستان بوكسشىسىن رينگتە كورسەتكەن تاماشا جەكپە-جەگىمەن جانە وليمپيا ويىندارىنىڭ قولا جۇلدەسىمەن شىن جۇرەكتەن قۇتتىقتايمىن! جەكپە-جەكتە تورەشىلەر نازىمنىڭ قولىن كوتەرمەسە دە, وتانداسىمىز شارشى الاڭدا جەڭىس ءۇشىن ايانىپ قالعان جوق. رينگتە ءوز شەبەرلىگىن, جەڭىسكە دەگەن ەرىك-جىگەرىن كورسەتە ءبىلدى. قازاقستان بوكس الەمىندەگى ەڭ ۇزدىك قۇرامالاردىڭ ءبىرى ەكەنىن دالەلدەدى. بۇل جۇلدەدە جاتتىقتىرۋشىلاردىڭ دا ەڭبەگى زور. وسىلايشا, قازاقستان قورجىنى تاعى ءبىر مەدالمەن تولىعىپ وتىر. ءبىز سپورتشىلارىمىزبەن ماقتانامىز. تەك العا!», دەدى تۋريزم جانە سپورت ءمينيسترى ەرمەك مارجىقپاەۆ.