پرەمەر-ءمينيستردىڭ ورىنباسارى تامارا دۇيسەنوۆا جانە «AMANAT» پارتياسىنىڭ حاتشىسى ەلدار جۇماعازيەۆ جامبىل وبلىسىنا بارىپ, «قارىزسىز قوعام» جوباسى اياسىنداعى اتقارىلىپ جاتقان جۇمىسپەن تانىستى, دەپ حابارلايدى Egemen.kz.
بيىل ءساۋىر ايىندا پارتيا باستاماسىمەن جامبىل وبلىسى مەركى اۋدانىندا «اگروساۋات» اگروبىلىكتىلىك ورتالىعى اشىلدى. وندا ەگىن, قۇس جانە مال شارۋاشىلىعىن جۇرگىزۋگە قاتىستى تەوريالىق جانە تاجىريبەلىك كۋرستاردى اقىسىز نەگىزدە وقىتۋ جۇمىسى ۇيىمداستىرىلدى. تامارا دۇيسەنوۆا بۇل باستامانى جوعارى باعالاپ, ونى ارى قاراي كەڭىنەن تاراتۋ مۇمكىندىگىن قاراستىرۋ قاجەت ەكەنىن ايتتى.
«بانكتەرگە قارىزدانعان, ەسەپشوتى بۇعاتتالعان ادامداردى «قارىزسىز قوعام» جوباسى اياسىندا وقىتىپ, ولاردىڭ ءوز كاسىبىن اشۋىنا جانە بەرەشەگىنەن قۇتىلۋىنا مۇمكىندىك جاسالىپ جاتىر. بۇل جوبانى جالعاستىرامىز. بۇل ءۇشىن وقۋ كورپۋستارى اشىلادى. سول كورپۋستا ءىرى كاسىپكەرلەر تاجىريبە جۇزىندە دە وقىتۋدى موينىنا الىپ, وزگە وڭىرلەرگە تاراتۋىن قاراستىرامىز. تىعىرىققا تىرەلگەندەرگە «AMANAT» پارتياسى دەمەۋشىلەرمەن بىرگە تاۋارلىق نەسيە بەرىپ, ءونىمىن ساتۋعا كومەكتەسەدى», دەدى تامارا دۇيسەنوۆا.
بۇل رەتتە ۆيتسە-پرەمەر تاۋارلىق نەسيە بەرۋ مەحانيزمىن جەتىلدىرۋ قاجەت ەكەنىن ايتىپ, تاۋارلىق نەسيە بەرۋشى مەن الۋشى اراسىندا ساقتاندىرۋ ەنگىزۋدى ۇسىندى.
«قارىزسىز قوعام» جوباسىنىڭ اۆتورى, «AMANAT» پارتياسىنىڭ حاتشىسى ەلدار جۇماعازيەۆ بارلىق اۋىلعا سكرينينگ جاسالعانىن, مەركى اۋدانىندا 9 باعىتتا كاسىپ باستاۋعا بولاتىنىن جەتكىزدى. جاڭادان اشىلعان «اگروساۋات» ورتالىعىندا نەسيە تولەۋ مەرزىمىن 90 كۇننەن استام كەشىكتىرگەندە باسىمدىق بەرىلەدى.
«سەبەبى ولار «اۋىل اماناتى» سەكىلدى مەملەكەتتىك باعدارلاماعا قاتىسا المايدى, نەسيە بەرىلمەيدى, «قارا تىزىمگە» ەنگەن. ولاردىڭ سانى ەلىمىزدە 1,5 ميلليوننان استى, بۇل ۇلكەن الەۋمەتتىك ماسەلە دەپ ەسەپتەيمىز. سوعان بايلانىستى «اۋىل اماناتى» مەن «قارىزسىز قوعام» باعدارلامالارىن ۇشتاستىرۋدى ۇيعاردىق. مىسالى ءبىر قاتىسۋشىنىڭ موينىندا 8 نەسيە بار, وعان قارجىلاي نەسيە بەرىلمەگەسىن, 5 كۇن وقىتىپ, تامشىلاپ سۋارۋ جۇيەسى, پلەنكا جانە 10 مىڭ كوشەت تۇرىندە تاۋارلى نەسيە بەردىك. وسىلاي قولداۋ كورسەتپەسەك, وزدىگىنەن قارىزىنان قۇتىلا المايدى», دەپ ءتۇسىندىردى ە. جۇماعازيەۆ.
جوبا قاتىسۋشىلارى وندىرگەن ونىمدەردى ساتۋ جانە وڭدەۋ ماسەلەسى دە جولعا قويىلعان. بورىشكەر تاپقان تابىستىڭ 50 پايىزى كەشىككەن نەسيەنى جابۋعا جۇمسالادى, 25 پايىزى تاۋارلى نەسيەنى جابۋعا جانە قالعان 25 پايىزى – وزىنە قالادى.
ء«بىزدىڭ ويىمىزشا, قارىزىن وتەي الماي جۇرگەندەرگە «اۋىل اماناتى» باعدارلاماسى اياسىندا تاۋارلى نەسيە بەرىلۋى كەرەك. سوسىن ونىمدەردى وڭدەيتىن كاسىپورىندار كەرەك. قازىر ءونىم كۇيىندە ساتىلىپ جاتىر, قوسىمشا قۇنىن وتەيتىندەي تاۋار ءوندىرىپ جاتقان جوقپىز. سوعان بايلانىستى وسى جوبا اياسىندا كورشىلەس ت. رىسقۇلوۆ اۋدانىندا قۇلپىناي, تاڭقۋراي وڭدەيتىن تسەح اشتىق. ەڭ باستى ماسەلە – تەحنولوگيالىق تالاپتاردى ساقتاي وتىرىپ, تاۋار ءوندىرۋ جانە تابىس تابۋ», دەدى پارتيا حاتشىسى.
بۇگىندە «اگروساۋات» وقۋ ورتالىعىندا 130 ادام ءدارىس الىپ, ولار مال شارۋاشىلىعى, قۇس شارۋاشىلىعى, قۇلپىناي ەگۋ, تاڭقۋراي ەگۋ سەكىلدى ءتۇرلى باعىتتاردى تاڭدادى.
«مۇندا ەش ىرىكتەۋ جۇرگىزىلمەيدى, ورتالىق تۋرالى ەستىگەن, وقۋعا نيەتتى ادامدار كەلەدى جانە ارنايى توپ قۇرىلادى. تىڭداۋشىلار بىردەن كاسىپ باستاپ كەتپەيدى, ءوز باعىتتارىن, نەگە يكەمى بارىن ناقتىلايدى. بۇگىندە قۇلپىناي باعىتى بويىنشا كووپەراتيۆ قۇرىلدى, دجەم, توساپ جاسايتىن كىشىگىرىم تسەح اشىلدى. تىزبەك تولىق جابىلدى دەۋگە بولادى. ەندى تىگىن تسەحى, جارتىلاي فابريكات سەكىلدى باسقا دا باعىتتاردى قولعا الامىز, جوبانىڭ اۋقىمىن كەڭەيتەمىز. ساراپشى سۇيەمەلدەگەن جۇمىستاردىڭ ناتيجەلى بولاتىنىن كورىپ وتىرمىز», دەدى «اگروساۋات» وقۋ ورتالىعىنىڭ جەتەكشىسى ايمان اقىنبەكوۆا.
«قارىزسىز قوعام» جوباسىنىڭ قاتىسۋشىسى, «اگروساۋات» ورتالىعىنىڭ تۇلەگى تالانتبەك سوكۋشباەۆ مۇگەدەكتىگى بار بالا تاربيەلەپ وتىر. بالا كۇتىمىنە بايلانىستى نەسيە الۋعا تۋرا كەلگەن جانە شالعايعا جۇمىس ىستەۋگە شىعا الماعان.
«بۇعان دەيىن وزگە قالالاردا ۆاحتادا جۇمىس ىستەدىم, ساۋدا-ساتتىقپەن اينالىستىم, زاۋىتتاردا ەڭبەك ەتتىم. بالا وسكەن سايىن ۇيدەن شىعۋ قيىندادى, سوندا كورشىمنىڭ جەرىن جالعا الىپ تاڭقۋراي ءوسىرۋدى باستادىم. ارينە العاشىندا وڭاي بولمادى, الاتىن ءونىم اۋا رايىنا تىكەلەي بايلانىستى. بيىل كوكتەمدە جوبا تۋرالى ەستىپ, قۇلپىناي باعىتىنا جازىلدىم. ورتالىق كەرەكتى جابدىقتاردىڭ ءبارىن اكەپ بەرەدى. وسىلايشا, مول ءونىم الىپ, بىرتىندەپ قارىز تولەپ جاتىرمىن. اۋىلدا جۇمىس كوپ, تەك ىستەيتىن ادام جوق. كەيدە ەڭبەك قولى جەتىسپەيدى», دەدى جوبا قاتىسۋشىسى ت.سوكۋشباەۆ.
سونىمەن قاتار تامارا دۇيسەنوۆا مويىنقۇم, شۋ جانە مەركى اۋداندارىنا بارىپ, مال شارۋاشىلىعىن ورىستەتۋگە, اسىرەسە تۇيە شارۋاشىلىعىن جۇرگىزۋگە قولايلى ورتا بار ەكەنىن اتاپ ءوتتى. الايدا مۇنداعى شارۋالار ازىرگە ەت پەن شۇبات وندىرۋمەن شەكتەلىپ وتىر.
ء«ۇش اۋدانداعى 200-دەن استام تۇيە وسىرەتىن ازاماتتاردى باسقا وبلىستان كەلگەن كومپانيالارمەن كەزدەستىردىك. وندا تۇيە باعۋ, ءسۇت الۋ, ءسۇتتى قايتا وڭدەۋ ماسەلەلەرىن قاراستىردىق. ەگەر دە وسى وبلىس ازاماتتارى قالاسا, الماتىلىق كاسىپورىن شۇباتتان ۇنتاق جاسايتىن تسەح اشۋعا دايىن. سول كومپانيا ارى قاراي قىتايعا ءونىم ەكسپورتتاۋ ماسەلەسىن قاراستىرادى. بۇل – اۋىلداعى جۇمىسىن جاڭا باستاعان قوسالقى شارۋاشىلىقتارعا ۇلكەن مۇمكىندىك», دەدى ت. دۇيسەنوۆا.
سونىمەن بىرگە «قارىزسىز قوعام» جانە «اۋىل اماناتى» جوبالارى ارقىلى جەكە شارۋاشىلىعىن دامىتىپ, قارىزىنان قۇتىلعان تابىستى كەيستەر كورسەتىلدى جانە بارلىق قاتىسۋشىلارمەن كەزدەسۋ ءوتتى.
«اگروساۋات» – ازاماتتاردىڭ قارجىلىق ساۋاتىن ارتتىرۋعا باعىتتالعان «قارىزسىز قوعام» جوباسىنىڭ قيسىندى جالعاسى بولماق. جاڭا ورتالىقتا جيدەك ءوسىرۋ, قانت قىزىلشاسىن ەگۋ, جەم-ءشوپ, ءسۇتتى ءىرى قارا, ەتتى ءىرى قارا, قۇس شارۋاشىلىعى سەكىلدى شارۋاشىلىقتار اشىپ, 150 ادامدى قارىز دەڭگەيىنەن شىعارۋ ماقساتى قويىلعان. قارا تىزىمنەن شىققان تۇرعىندار ارى قاراي مەملەكەتتىڭ بيزنەستى قولداۋ باعدارلامالارىنا, «اۋىل اماناتى» باعدارلاماسىنىڭ 2,5 پايىزدىق نەسيەسىنە جۇگىنە الادى.
«قارىزسىز قوعام» جوباسى بىلتىر 2 مامىردا باستالعان بولاتىن. بيىل پرەزيدەنت تاپسىرماسىمەن ەلىمىزدىڭ بارلىق 20 وڭىرىندە, ونىڭ ىشىندە استانا, الماتى, شىمكەنت قالالارىندا حالىقتى قارجىلىق ساۋاتقا جاپپاي وقىتۋ جۇمىسى ۇيىمداستىرىلدى.
«قارىزسىز قوعام» جوباسىنا دەمەۋشىلىك كورسەتەتىن بانكتەر سانى ارتىپ كەلەدى. اتاپ ايتقاندا, Freedom Bank, بانك تسەنتر كرەديت, Halyk Bank, Altyn Bank, Bereke Bank, ەۋرازيالىق بانك, Forte Bank, Home Credit, Jusan, Nurbank, Bank RBK جوبانىڭ سەرىكتەسى اتاندى.
وقۋ كۋرسىنىڭ قاتىسۋشىلارىنا ىڭعايلى بولۋ ءۇشىن www.qogamfin.kz ونلاين-پلاتفورماسى ازىرلەندى. سايت ارقىلى وقۋعا جازىلىپ, پايدالى ماتەريالدار مەن بەينە ساباقتاردى جۇكتەپ الۋعا بولادى.