گرانت يەلەرى انىقتالدى

94 مىڭنان اسا گرانت ءبولىندى

مەملەكەتتىك گرانتتار رەسپۋبليكالىق كوميسسيا وتىرىسىنىڭ قورىتىندىسى بويىن­شا تاعايىندالدى. كوميسسيا قۇرامىندا پارلامەنت دەپۋتاتتارى, مۇددەلى مەم­لەكەتتىك ورگانداردىڭ, بiلiم سالاسى كاسiپ­وداقتارىنىڭ, ۇلتتىق كاسiپكەر­لەر پالاتاسىنىڭ, جوعارى وقۋ ورىندارى اس­سوتسياتسياسىنىڭ, قوعامدىق ۇيىم­داردىڭ وكىلدەرى بولدى.

ءبىر گرانتتىق ورىنعا ەڭ ۇلكەن كون­كۋرس «ستوماتولوگيا» ماماندىعىندا بول­­­دى. اتالعان سالا بويىنشا ءبىر ورىنعا 35 ­تا­­لاپكەر تالاسقان. ءارى قاراي «حا­لىق­ارا­­­­لىق قاتىناستار جانە ديپلو­ما­تيا» ما­مان­­دى­عى بويىنشا ءبىر ورىنعا ­11 ادام ۇمىت­كەر بولدى. ودان سوڭ «دەنە شىنىقتىرۋ مۇعالىمدەرىن دايارلاۋ», «اۋدارما ءىسى» جانە «پسيحولوگيا» سىن­­دى ماماندىققا قۇجات تاپسىرعان تا­لاپ­­كەرلەردىڭ سانى جىل­داعىدان ەرەكشە جوعارى بولعان.

گرانتقا ۇمىتكەرلەر اراسىندا بالى تەڭ بولعان جاعدايدا باسىم قۇقىققا يە ­­­22 مىڭنان اسا تالاپكەر تىركەلگەن. ­ولار­­­­­دىڭ ىشىندە «التىن بەلگى» يە­لەرى, حالىقارا­­­­لىق جانە رەسپۋبليكا­لىق وليمپيادا­لار­دىڭ جەڭىمپازدارى, وقۋ ۇزدىكتەرى بار. ­سون­داي-اق گرانتتاردى ۇي­لەستىرۋ بارى­سىندا الەۋمەتتىك وسال ساناتتاعى با­لالاردىڭ كۆوتالارى ەس­­­كەرىلدى. جوعا­رى وقۋ ورىندارىنا قۇجات­­­تاردى تاپسىرۋ ­25 تامىزعا دەيىن جالعاسادى.

ايتا كەتەيىك, گرانتتاردىڭ باسىم بو­لىگى ينجەنەرلىك جانە تەحنيكالىق باعىت­تارعا بولىنگەن. مەملەكەت باسشىسى­نىڭ تاپسىرماسىمەن العاش رەت ءىشىنارا وقۋ اقىسى بار سارالانعان گرانتتار ەنگىزىلدى. «پەداگوگيكالىق عىلىمدار» جانە «الەۋمەتتىك عىلىمدار, جۋرناليس­تيكا جانە اقپارات» باعىتتارى بويىن­شا 150 سارالانعان گرانت بولىن­گەن. سونداي-اق «سەرپىن» باعدارلاماسى ارقىلى تۇسۋ­شىلەرگە 3 903 گرانت ءبولىندى. گرانتتار تىزىمىندە 5000 حالىق تىعىز قونىستانعان جانە باتىس وڭىرلەردىڭ جاس­تارىن جەتەكشى جوعارى وقۋ ورىندارىندا وقىتۋ ءۇشىن ماقساتتى ءبىلىم بەرۋ گرانتى بار.

جالپى گرانت سانى – 94 مىڭنان استام. ونىڭ ىشىندە 78 مىڭ گرانت – باكالاۆ­­ريات ستۋدەنتتەرىنە, 13 مىڭ گرانت ما­گيست­را­تۋراعا بەرىلسە, 3 مىڭ گرانت بو­لاشاق دوك­تو­رانتتارعا قاراستىرىلعان.

گرانت 4 جىلدا تۇڭعىش رەت توقسان تو­عىز پايىز يگەرىلسە, سۋ تاسقىنىنان زارداپ شەككەن ءوڭىر تالاپكەرلەرىنە 15 382 گرانت بەرىلگەن.

قازاقستاندا اشىلىپ جاتقان شەتەل­دىك جوعارى وقۋ ورىندارىنىڭ فيليال­دارى ءۇشىن 1 890 گرانت بولىنگەن. ودان بولەك, بيىل 5 000 نىسانالى گرانت ءجۇز پايىز, اۋىل شارۋاشىلىعى مەن ۆەتەريناريا باعىتىنداعى گرانتتار تولىق يگەرىلگەن.

«گرانت كۋالىگى grant.testcenter.kz سايتىندا قولجەتىمدى. ءارى قاراي تالاپكەرلەر 25 تامىزعا (قوسا العاندا) دەيىن گرانت نەمەسە اقىلى نەگىزدە وقۋعا ءتۇسۋ ءۇشىن جوعارى وقۋ ورىندارىنا قۇجاتتا­رىن تاپسىرۋ كەرەك», دەدى عىلىم جانە جوعا­رى ءبىلىم ءمينيسترىنىڭ كەڭەسشىسى رۋسلان ەمەلباەۆ. ايتا كەتەرلىگى, بيىل 104 121 تۇلەك گرانتقا ءوتىنىم بەرگەن. بۇل – وتكەن جىلمەن سالىستىرعاندا 10 000 ادامعا ارتىق كورسەتكىش.

ۇلتتىق تەستىلەۋ ورتالىعى ديرەك­­تو­رى­نىڭ ورىنباسارى ناۋجان ديدار­بە­كو­ۆا­­­­نىڭ ايتۋىنشا, تامىز ايىنىڭ سوڭىنا ­دەيىن بەينەجازبالارعا تالداۋ جۇرگىزى­لەدى.

«اكادەميالىق ادالدىق ەرەجەلەرى ءبىز ءۇشىن وتە ماڭىزدى. بيىلعى ۇلتتىق بىرىڭعاي تەستىلەۋدە ەرەجە بۇزۋشىلىققا بايلانىستى, اتاپ ايتساق, تىيىم سالىن­عان زاتتاردى الىپ كەلۋگە تىرىسقان, ءبىر-بىرىمەن سويلەسكەن, قاعاز الماسقان 600-گە جۋىق تالاپكەردىڭ ناتيجەسى جو­يىل­دى. ۇلتتىق تەستىلەۋ ورتالىعى 31 تا­مىز­عا دەيىن بەينەجازبالارعا تالداۋ جۇ­ر­­گىزەدى. سونىڭ ناتيجەسىندە قازىر 40-تان استام تالاپكەردىڭ ناتيجەسى جو­يىلدى. تامىزدىڭ سوڭىنا دەيىن گرانت­قا تۇسكەن بالالاردىڭ ەرەجە بۇزعانى انىقتالسا, سايكەسىنشە ولار گرانتىنان ايىرىلادى», دەدى ن.ديداربەكوۆا.

گرانت الۋ مۇمكىندىگى ءالى دە بار

عىلىم جانە جوعارى ءبىلىم ءمينيسترى ساياسات نۇربەك مەملەكەتتىك گرانت جەڭىپ الا الماعان تۇلەكتەرگە قوسىمشا گرانت الۋدىڭ توعىز جولىن ۇسىنىپ, ءۇمىت ۇز­بەۋگە شاقىردى. ونىڭ ايتۋىنشا, بيىل مەملەكەتتىك گرانتتىڭ ءبىر بولىگى سۋ تاس­قىنىنان زارداپ شەككەن ءوڭىردىڭ تۇلەك­تەرىنە بولىنگەن.

«كەيىنگى ۋاقىتتا ەلىمىزدە ورىن العان سۋ تاسقىنى بۇكىل ەلگە ورتاق سىناق بول­دى. وسى جاعدايعا بايلانىستى ءبىز جوعارى ءبىلىم الۋعا گرانتتاردىڭ از عانا بولىگىن زارداپ شەككەن ءوڭىر تۇلەكتەرىنە بولدىك. سانى كوپ تە ەمەس, 5 112 گرانت. 20 مىڭ­نان استام تۇلەك سۋ باسقان وڭىردەن بىتىرسە, سونىڭ 10 مىڭنان استام تۇلەگى وزدەرىڭىزبەن بىردەي جالپى كونكۋرسپەن ءوتتى. ءبىز ونى ءادىل جانە اشىق تۇردە بولۋگە بار كۇش-جىگەرىمىزدى سالدىق. بيىلعى كونكۋرسقا قاتىسۋشىلار سانى وتكەن جىل­مەن سالىستىرعاندا 11 مىڭعا كوپ, سون­دىقتان باسەكەلەستىك تە وتە جوعارى بولدى.

سۋ تاسقىنىنان زارداپ شەككەن ايماق­تار ءۇشىن كۆوتا قاراستى­رىل­عا­نى­مەن, سول ايماق­تاردىڭ تالاپكەرلەرى جالپى كونكۋرس بويىنشا گرانت ۇتىپ الدى. گرانت العانداردىڭ تەك 1 130-ى نەمەسە 1,7%-ى مۇمكىندىكتى پايدالاندى. بۇل ايماقتاردى قولداۋ ءۇشىن تالاپكەرلەرگە دايىندالۋ جانە كونكۋرسقا قۇجاتتا­رىن تاپسىرۋ ءۇشىن مەرزىمى كەڭەيتىلدى, كونكۋرسقا ەڭ جاقسى ۇبت ناتيجەسى بار سەرتيفيكاتىن ۇسىنۋ مۇمكىندىگى بەرىلدى», دەپ مالىمدەدى ساياسات نۇربەك. ءمينيستردىڭ ايتۋىنشا, بيىل جوعا­رى بالل جيناعان 10 مىڭنان استام تالاپ­كەر گرانت الا الماعان.

«كەشەگى اتا-انالار مەن بالالاردىڭ قۋانىش جاسىن كورىپ, ءبىز دە بىرگە قۋان­دىق. بىراق وكىنىشكە قاراي, گرانت الا الماعان تۇلەكتەر مەن وتباسىلاردىڭ مۇ­ڭىندا دا ءبىز بىرگەمىز. كوپتەگەن ادام مينيسترلىككە, ماعان حابارلاسىپ, جازىپ جاتىر, ال وسى ناتيجەنى سابىرمەن قابىلداعاندار دا بار ەكەن. جوعارى بالل جيناعان 10 مىڭ­نان استام ادام گرانت الا المادى. ونىڭ ىشىندە 7 مىڭنان استامى شىعارماشى­لىق ماماندىقتار بويىنشا ەكەنىن ايتۋ قا­جەت. مىسالى, دەنە شىنىقتىرۋ مۇعالىمدە­رىن دايارلاۋ بويىنشا 1 ورىنعا 11 ادام, ءسان جانە ديزاين بويىنشا 9 ادام, ال ستوماتولوگياعا ءبىر ورىنعا 35 ادامنان كەلدى», دەدى ول.

گرانت تىزىمىنەن ءوز ەسىمىن تاپپاعان تالاپ­كەرلەرگە مينيستر توعىز ءتۇرلى ىق­تيمال مۇمكىندىكتى اتاپ ءوتتى.

– ايتايىن دەگەنىم, ءۇمىت ۇزبەڭىز­دەر! گرانت الۋ مۇمكىندىكتەرى ءالى دە بار. بىرىنشىدەن, ءۇش مىڭعا جۋىق تالاپكەر گرانتتان باس تارتۋى مۇمكىن, ولار كەلەسى جوعارى بالل جيناعان تا­لاپ­كەرلەرگە بەرىلەدى. ەكىنشىدەن, جەر­گىلىكتى اتقارۋشى ورگانداردىڭ ياعني اكىم­دىك گرانتتارى بار. ۇشىنشىدەن, «KazEnergy» قاۋىمداستىعىنىڭ گرانتتارىن قوسىڭىز. تورتىنشىدەن, ح.ا.ياساۋي اتىنداعى حالىقارالىق قازاق-تۇرىك ۋني­ۆەرسيتەتىندە ءبىلىم الۋ ءۇشىن تۇركيا رەس­پۋبليكاسىنىڭ 500 گرانتى دا بار. بە­سىنشىدەن, جۇمىس بەرۋشىلەردىڭ گرانت­­تارى تاعى بار. التىنشىدان, تۇر­كىستانداعى حالىقارالىق تۋريزم جانە قو­ناقجايلىلىق ۋنيۆەرسيتەتى 800 ماق­ساتتى گرانت ۇسىنادى. جەتىنشىدەن, «قا­زاقستان حالقىنا» قورى 850 گرانت بولەدى. سەگىزىنشىدەن, رەكتورلاردىڭ ­گرانتى, مى­سالى «تۇران-استانا» ۋني­ۆەرسيتەتى «التىن بەلگى» يەلەرىنە قو­سىمشا گرانتتار ءبولىپ جاتىر.توعى­زىنشىدان, سەس­سيا قورىتىندىسى بو­يىنشا بوس گرانت الۋ مۇمكىندىگى جانە بار. گرانت الا الماعان تۇلەكتەردى وسى جوعارى­داعى مۇمكىندىك­تەر­دى بارىن­شا پايدالان­ۋعا شاقىرامىز, – دەپ ءسوزىن تۇيىندەدى ­مينيستر.

ءماجىلىستىڭ الەۋمەتتىك-مادەني دامۋ كوميتەتىنىڭ توراعاسى, دەپۋتات اسحات ايماعامبەتوۆ تە ءبىلىم گرانتىنا يە بولا الماعان تالاپكەرلەرگە كەڭەس بەردى.

«كەيبىر تالاپكەرلەر ءتۇرلى سەبەپ بو­يىنشا جەڭىپ العان گرانتتارىنان باس تارتادى. ولاردىڭ سانى دا از بولمايدى. ول گرانتتار دا قايتا تاعايىندالادى. ءتىپتى ەشتەڭە بولماسا, ۋنيۆەرسيتەتكە اقىلى تۇردە ءتۇسىپ, كەيىن جاقسى وقىپ, GPA جوعارى بولسا, ءبىلىم الۋ كەزىندە بوساعان بوس گرانتتى ۇتىپ الۋعا بولادى.

ودان بولەك, «Gap year» ارقىلى ءبىر جىل دايىندالىپ, قايتادان ۇبت تاپسىرىپ, گرانت جەڭىپ الۋعا بولادى. ول – مەنىڭ ءوز باسىمنان وتكەن وقيعا. بۇل دا – جاقسى شەشىم. تاعى ءبىر ۇسىنىس: كوللەدجگە تۇسۋگە بولادى. كوللەدجدە گرانت كوپ, قاجەتتى ماماندىقتار بويىنشا كوللەدج بىتىرگەندەر نارىقتا تاپشى. كەرەك بولسا, كەيىن ءارى قاراي جوعارى وقۋ ورنىنا ءتۇسىپ, قىسقا مەرزىمدە جوعارى ءبىلىم الىپ شىعۋعا دا بولادى. مۇمكىندىك وتە كوپ. ءبارى الدا. تولىق مالىمەت الۋ ءۇشىن ۋنيۆەرسيتەتتەردىڭ قابىلداۋ كوميسسيا­سىنا جولىعۋ كەرەك», دەپ جازدى اسحات ايماعامبەتوۆ.