فرانتسيادا ءوتىپ جاتقان پاريج جازعى وليمپياسىنىڭ جەتىنشى كۇنى مارەسىنە جەتتى. جارىس جولىنا شىققان سپورتشىلارىمىزعا بۇل كۇنى دە جۇلدە بۇيىرعان جوق.
الدىمەن بوكستاعى باتىراشتىق ارەكەت جايىندا. ۇلتتىق قۇرامانىڭ كاپيتانى اسلانبەك شىمبەرگەنوۆتىڭ (71 كگ) العاشقى جەكپە-جەگىندە-اق يوردانيالىق بوكسشىعا ەسە جىبەرۋى كوپ جايتتى اڭعارتادى. ودان كەيىن اسا اۋىر سالماقتاعى قامشىبەك قوڭقاباەۆتىڭ ءھام ماحمۇد سابىرحاننىڭ (57 كگ) دا ءبىرىنشى جەكپە-جەگىندە يسپانيالىق قارسىلاستارىنان اسا الماۋى وراسان سىن. قامشىبەك قوڭقاباەۆ 2019 جىلى ءدال وسى يسپان بوكسشىسى ايۋب ءدريسسيدى رەسەيدىڭ ەكاتەرينبۋرگ قالاسىندا وتكەن الەم چەمپيوناتىنىڭ ەكىنشى اينالىمىندا سۇلاتىپ ءتۇسىرىپ, نوكاۋتپەن جەڭگەن ەدى. ارادا وتكەن بەس جىل ىشىندە قارسىلاسى ءوزىنىڭ دەڭگەيىن قالاي كوتەرگەنىن ايگىلەي الدى. 92 كگ سالماق دارەجەسىندە جازعى وليمپيا ويىندارىنىڭ شيرەك فينالىنا جەتكەن ايبەك ورالبايدى قانى كۋبالىق ازەربايجان بوكسشىسى دومينگەسكە انىق ەسە جىبەردى دەپ ايتقان ارتىق بولار. جەرلەسىمىز قارسىلاسىن قانشا تىقسىرعانىمەن دە تورەشىلەر قارسىلاستىڭ ۇپايىن ارتىق جازدى. باسقانى قايدام, ەڭ الدىمەن بوكسشى مۇحامەدسابىر بازارباي ۇلىنا اۋىر ءتيدى بۇل قىساستىق. ءوزى جازعى وليمپيا ويىندارىنىڭ جولداماسىن سوڭعى ىرىكتەۋدە يەلەندى. ەل ىشىندەگى «وت پەن سۋدان وتكىزگەن» ىرىكتەۋى تاعى بار. 63,5 كگ سالماقتا وليمپيادا دۋىنا قوسىلعان مۇحامەدسابىر بازارباي ۇلىنىڭ وبال-ساۋابى وليمپيا ويىندارىنىڭ تورەشىلەرىنە. بوكسشىمىز ىرىكتەۋ كەزەڭىندەگى ەكى جەكپە-جەگىن دە تاماشا وتكەردى, تالاسسىز جەڭىسكە جەتتى. ال شيرەك فينالدا گرۋزين لاشا گۋرۋليدىڭ قاباعىنان قانىن سورعالاتا ساباعان. بىراق تورەشىلەر «تۇيەنى دە كورمەستىڭ» كەبىن كەلتىردى. قارسىلاسىنىڭ قاباعىن جەرلەسىمىز سوققىسىمەن ەمەس, باسىمەن قاعىپ جارىپ جىبەردى دەيتىندەر دە تابىلدى. بىراق مۇحامەدسابىر قاساقانا «مۇيىزدەسە», رينگتەگى رەفەري جەكپە-جەكتى الدەقاشان توقتاتار ەدى. امال قانشا, بەسىنشى بوكسشىمىز جازعى وليمپيا دوداسىن ورتا جولدان اياقتادى.
الەم چەمپيونى, افينا وليمپياداسىنىڭ كۇمىس جۇلدەگەرى گەننادي گولوۆكين باسقاراتىن ۇلتتىق وليمپيادا كوميتەتى جەرلەسىمىزدىڭ جەڭىلىسىنە سەبەپكەر بولعان تورەشىلەردىڭ ۇستىنەن شاعىم تۇسىرگەنىن مالىمدەدى.
«ۇلتتىق وليمپيادا كوميتەتى مۇحامەدسابىر بازارباي ۇلىنىڭ جەكپە-جەگىنە قاتىستى شاعىم ءتۇسىردى. ءبىز تورەشىلەردىڭ شەشىمىمەن كەلىسپەيمىز جانە PBU-دان (Paris boxing Unit) تۇسىنىكتىمە تالاپ ەتتىك. بۇدان حوك تا حاباردار. مۇحامەدسابىر بازارباي ۇلى 2024 جىلعى وليمپيادانىڭ جارتىلاي فينالىنا جولداما بەرەتىن ماڭىزدى كەزدەسۋدە جەڭىسكە جەتكەنى تالاسسىز ەدى. وتكەن جەكپە-جەكتىڭ ناتيجەسىن قايتا قاراۋ مۇمكىن ەمەستىگىن دە تۇسىنەمىز. الايدا ءبىز ءىرى حالىقارالىق جارىستاعى تورەلىك ءادىل ءارى تازا بولعانىن قالايمىز», دەدى قازاقستان ۇوك باس حاتشىسى جانار وتەشەۆا.
ۇلتتىق وليمپيادا – كوميتەت بۇعان دەيىن دە بوكسشىلارىمىزدىڭ جەكپە-جەگىنە قازىلىق ەتكەن تورەشىلەردىڭ شەشىمىنە نارازىلىق تانىتىپ ەسكەرتۋ جاساعان ەدى. وسىنداي ادىلەتسىزدىك سالتانات قۇرعاندىقتان دا بوكس جازعى وليمپيا ويىندارىنىڭ باعدارلاماسىنان سىزىلىپ قالۋى مۇمكىن دەگەن كۇماننىڭ بۇلتى قويۋلانىپ كەلە جاتقانداي.
دزيۋدو كۇرەسىنەن دوداعا قوسىلعان كاميلا بەرلىقاش تا (+78 كگ) جازعى وليمپيا ويىندارىن العاشقى اينالىمنان اياقتادى. موڭعول بالۋانى ادياسۋرەن امارسايحانعا ەسە جىبەردى. بۇل كۇرەس تۇرىنەن پاريج جازعى وليمپيا ويىندارىنا 8 بالۋان (5 ەر, 3 ايەل) بارعان-دى, بۇيىرعان مەدال – 1 التىن, 1 قولا. سپورتشىلارىمىز ەندى كوماندالىق تارتىسقا تۇسەدى.
100 مەترگە باتتەرفلياي ادىسىمەن جۇزۋدە وتانداسىمىز ادىلبەك مۋسين ءوز توبىندا 5-ورىن العانىمەن, جالپى ناتيجەدە 29-ساتىعا تۇراقتاپ, جارتىلاي فينالدىق كەزەڭگە جەتپەدى. ادىلبەك ءۇشىن دە جازعى وليمپيا ويىندارى اياقتالدى.
اكادەميالىق ەسكەك ەسۋدەن ۆلاديسلاۆ ياكوۆلەۆ ە توبىندا قارا ءۇزىپ كەلگەنىمەن, جالپى ەسەپتەگى ناتيجەسىندە 25-ساتىنى مىسە تۇتتى.