ەلىمىزدىڭ بارلىق وڭىرىندە «مەكتەپكە جول» رەسپۋبليكالىق قايىرىمدىلىق اكتسياسى باستالدى. وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتىنىڭ توراعاسى ناسىمجان وسپانوۆا ورتالىق كوممۋنيكاتسيالارى قىزمەتىندە وتكەن بريفينگتە حالىقتىڭ الەۋمەتتىك وسال توپتارىنداعى بالالارعا قاجەتتى كومەك الۋ تۋرالى تولىعىراق ايتىپ بەردى.
اتالعان اكتسيا وقۋ جىلىنا دايىندىق كەزىندە از قامتىلعان وتباسىلاردىڭ بالالارىنا دەمەۋشىلىك كومەك كورسەتۋگە باعىتتالعان. 15 جىل ۋاقىت ارالىعىندا «مەكتەپكە جول» اكتسياسى مىڭداعان بالاعا جاڭا وقۋ جىلىن قۋانىشپەن باستاۋعا كومەكتەستى. وسىنداي يگىلىكتى ءىس-شاراعا ەرىكتىلەر, كاسىپكەرلەر, مەتسەناتتار, ۇكىمەتتىك ەمەس ۇيىمدار جانە بارلىق جاناشىر ازاماتتار قاتىسا الادى. كەيىنگى ءۇش جىلدا ماتەريالدىق كومەك كولەمى بارلىق وڭىردە 2,5 ەسەگە ارتتى. ناقتىراق ايتساق, 17 مىڭنان, 43,4 مىڭ تەڭگەگە ءوسىپ وتىر. بۇل مەملەكەتتىك قولداۋدىڭ ارتقانىن جانە الەۋمەتتىك وسال توپتارداعى بالالار ءۇشىن جاعدايدىڭ جاقسارعانىن كورسەتەدى.
بالالاردىڭ قۇقىقتارىن قورعاۋ كوميتەتىنىڭ توراعاسى ناسىمجان وسپانوۆانىڭ ايتۋىنشا, بيىل 500 مىڭنان استام بالانىڭ اتا-اناسى «جالپىعا بىردەي ءبىلىم بەرۋ» قورى اياسىندا مەكتەپكە دايىندالۋ ءۇشىن ماتەريالدىق كومەك الادى. ولاردىڭ قاتارىندا اتاۋلى الەۋمەتتىك كومەك الاتىن وتباسىلارداعى مەكتەپ وقۋشىلارى مەن جان باسىنا شاققانداعى ورتاشا تابىسى ەڭ تومەنگى كۇنكورىس دەڭگەيىنەن تومەن وتباسىلاردىڭ بالالارى, سونداي-اق جەتىم بالالار مەن توتەنشە جاعدايعا تاپ بولعان وتباسىلاردىڭ بالالارى بار. ماتەريالدىق كومەك كيىم-كەشەك, ونىڭ ىشىندە مەكتەپ فورماسى, اياقكيىم, وقۋ قۇرالدارىن ساتىپ الۋ ءۇشىن بولىنەدى.
«وزدەرىڭىز بىلەتىندەي, جىل سايىن 1 تامىزدان 30 قىركۇيەككە دەيىن ەلىمىزدىڭ بارلىق وڭىرىندە «مەكتەپكە جول» رەسپۋبليكالىق قايىرىمدىلىق اكتسياسى وتكىزىلەدى. «جالپىعا بiردەي ءبىلىم بەرۋ» قورى حالىقتىڭ الەۋمەتتىك وسال توپتارىنداعى بالالارعا قولداۋ كورسەتىپ, وقۋعا قاجەتتى قاراجات بولەدى. بۇدان بولەك, جاڭا وقۋ جىلى قارساڭىندا توتەنشە جاعداي سالدارىنان جاردەم تالاپ ەتەتىن وتباسىلاردان شىققان بالالار قارجىلاي كومەك الادى. وقۋ-اعارتۋ مينيسترلىگى كومەك كورسەتۋ تەتىگىن جاقسارتۋ بويىنشا ءتۇرلى شارا قابىلدادى. ماسەلەن, مەكتەپ فورماسى مەن كەڭسە تاۋارلارىن ساتىپ الۋعا ارنالعان ماتەريالدىق كومەك اتا-انالاردىڭ ەسەپشوتىنا جىبەرىلەدى. وسىلايشا, ءاربىر اتا-انا بالالارىنا بارىنشا ساپالى تاۋار الۋعا تىرىسادى. «جالپىعا مىندەتتى ءبىلىم بەرۋ» قورىنىڭ اياسىندا ءاربىر ءبىلىم الۋشىعا بەرىلەتىن ماتەريالدىق كومەكتىڭ ەڭ تومەنگى مولشەرى − 43 407 تەڭگەنى قۇرايدى. وسىعان وراي بارلىق جۇرەگى كەڭ ازاماتتى, ونىڭ ىشىندە ەرىكتىلەردى, كاسىپكەرلەردى, ۇكىمەتتىك ەمەس ۇيىمداردى جانە باسقا دا مۇددەلى قاتىسۋشىلاردى ءبىزدىڭ قايىرىمدىلىق باستامامىزعا قاتىسۋعا شاقىرامىز», دەدى ن.وسپانوۆا.
بۇگىنگى تاڭدا «جالپىعا بىردەي ءبىلىم بەرۋ» قورى اياسىندا اتا-انالاردىڭ ەسەپشوتتارىنا 77 806 بالانى قامتي وتىرىپ, مەكتەپ كەرەك-جاراقتارى مەن قاجەتتى تاۋارلاردى ساتىپ الۋ ءۇشىن 3,4 ميلليارد تەڭگەدەن استام قاراجات اۋدارىلعان. اتالعان كومەك الۋشىلاردىڭ جالپى سانىنىڭ 15%-ىن قۇرايدى. قازىر وڭىرلەر مەكتەپ قۇرالدارىن ساتىپ الۋ ءۇشىن اتا-انالارىنىڭ نەمەسە ولاردىڭ زاڭدى وكىلدەرىنىڭ ەسەپشوتتارىنا قاراجات اۋدارا باستادى. قاراجات العان اتا-انالار قاجەتتى تاۋاردى ساتىپ العانىن راستايتىن قۇجاتتاردى ۇسىنۋعا ءتيىس. ماتەريالدىق كومەك الۋ ءۇشىن ءاربىر اتا-انا مەكتەپ ديرەكتورىنىڭ اتىنا ءوتىنىش جازادى.
بۇدان بولەك, جاڭا وقۋ جىلى قارساڭىندا مەكتەپ تاۋارلارىنىڭ قولجەتىمدىلىگىن قامتاماسىز ەتۋ ماقساتىندا اكىمدىكتەر مەن «اتامەكەن» ۇلتتىق كاسىپكەرلەر پالاتاسى جارمەڭكەلەر, ونىڭ ىشىندە كوشپەلى جارمەڭكەلەر مەن مەكتەپ كەرەك-جاراقتارىن ساتاتىن اۆتولاۆكالار ۇيىمداستىرادى. وسى تۇستا باعانىڭ نەگىزسىز ءوسۋىن بولدىرماۋ – ماڭىزدى شارت.
ايتا كەتەيىك, اكتسيا بارىسىندا «جەدەل جەلىلەردىڭ», «سەنىم تەلەفوندارىنىڭ», قوعامدىق قابىلداۋ بولمەلەرىنىڭ ۇزدىكسىز جۇمىسى ۇيىمداستىرىلادى. سونداي-اق كومەككە مۇقتاج نەمەسە قولداۋ كورسەتۋگە دايىن جاندار بالالاردىڭ قۇقىقتارىن قورعاۋ كوميتەتىنىڭ 74-25-28 سەنىم تەلەفونىنا نەمەسە «Bala qorǵaý» Telegram چاتىنا جۇگىنە الادى.