دۇنيەجۇزىلىك كوشپەلىلەر ويىندارىندا كوكپاردان ۇلتتىق قۇراما مۇشەلەرى ەكى بىردەي دوداعا كىرەدى. كوكپاردان تارتىسقا تۇسەتىن جىگىتتەر قىرعىزدىڭ كوكبورى سايىسىنان دا باق سىنايدى.
تورتكۇل دۇنيە نازارىن اۋداراتىن ەتنوسپورت الامانىندا قازاق پەن قىرعىزدىڭ كوكپار تارتىسىن اسىعا كۇتۋشىلەر كوپ. سەبەبى ۇنەمى يتجىعىس ءتۇسىپ, ءبىر-ءبىرىنىڭ تاقىمىنداعى سەركەنى الما كەزەك وڭگەرىپ كەتىپ ءجۇر. الەم چەمپيوناتى, حالىقارالىق تۋرنيرلەردە, دۇنيەجۇزىلىك كوشپەلىلەر ويىندارىندا باس جۇلدە ءۇشىن تارتىس ەكى ەلدىڭ كوكپارشىلارى اراسىندا ءوربيتىنى زاڭدى دا.
كوكپاردان ەلىمىزدىڭ ۇلتتىق قۇراماسىندا باس باپكەرى اۋىستى. بۇعان دەيىن كوكپارشىلاردى الەمدىك دودالارعا باپتاپ قوسقان بىلىكتى باپكەر قۋانىشبەك قۇراماەۆتىڭ ورنىنا اقىلباي مانكەەۆ تىزگىن ۇستادى. اقىلباي كوكپارشىنىڭ ەسىم-سويى اتالعاندا, كوپشىلىكتىڭ ەسىنە بۋلليت سەرياسى ورالاتىنى بەلگىلى. ۇلتتىق قۇراما ساپىندا, ەلىشىلىك كوكپار دوداسىنا قاتىسقاندا اقىلباي مانكەەۆ كوبىنە بۋلليتتە قارسىلاسىنان باسىم تۇسەتىن. تاجىريبەلى سپورتشىعا ۇلتتىق قۇرامانىڭ باس باپكەرى لاۋازىمى زور سەنىممەن تاپسىرىلدى.
«V دۇنيەجۇزىلىك كوشپەلىلەر ويىندارىنا كوكپاردان ۇلتتىق قۇراما مۇشەلەرىنىڭ وقۋ-جاتتىعۋ جيىنى الماتى وبلىسىنداعى وليمپيادالىق دايارلاۋ ورتالىعىندا ءوتىپ جاتىر. ورتالىق باسشىلىعى كوكپار الاڭىن دايارلاپ, بارلىق مۇمكىندىكتى تۋدىرىپ وتىر. ازىرگە فيزيكالىق دايىندىقتى, اتتاردى كوكپار تارتىبىنە بەيىمدەپ كەلەمىز. جالپى, كوكپاردان ۇلتتىق قۇرامانىڭ وزىنە تيەسىلى اتتارى بولمايدى. ءار وڭىردەگى اتبەگىلەردەن جالعا الىپ, جۇيرىكتەرىمىزدى تۇگەندەدىك. بالۋاندار بىرنەشە ايماقتان جەتكىزىلگەن 40 اتتى دوداعا ۇيرەتىپ جاتىر. جاتتىعۋ جيىنىنا 29 شاباندوز كەلدى. 12 سپورتشى كوكپاردان, ياعني شەڭبەرگە سالىم سالۋ سايىسى بويىنشا الاڭعا شىقسا, قالعان 12 بالۋانىمىز قىرعىزدىڭ كوكبورى دوداسىنان تارتىسقا تۇسەدى. كوكپارعا قاتىسقان شاباندوز كوكبورى بويىنشا تارتىسقا شىقپايدى. ءبىر ايدان اسا ۋاقىتىمىز بار, جاتتىعۋدى ءالى دە پىسىقتاي تۇسەمىز», دەيدى كوكپاردان ۇلتتىق قۇرامانىڭ باس باپكەرى اقىلباي مانكەەۆ.
مامان كوكپاردان دۇنيەجۇزىلىك كوشپەلىلەر ويىندارىندا توپ جارۋدى كوزدەيتىنىن جەتكىزدى. ال كوكبورى سايىسىندا قىرعىزدىڭ شاباندوزدارى دا, اتتارى دا تەگەۋرىندى ەكەنىن العا تارتتى.
ء«تول سپورتىمىز كوكپاردان ءوز جەرىمىزدە وتەتىن دۇنيەجۇزىلىك كوشپەلىلەر ويىندارىندا چەمپيون اتانۋعا بارىمىزدى سالامىز. ال كوكبورىدەن نەگىزگى قارسىلاس قىرعىز بالۋاندارى وڭايدان ولجا ۇستاتپايدى. ونىڭ ۇستىنە ءبىزدىڭ قۇرامانىڭ بەلدى اتتارى سانالعان «نامىسكوك», «لازەر» سىندى ۇستىندەگى كوكپارشىنىڭ ويىن ايتقىزباي ۇعاتىن, ەستى جۇيرىگىمىز جوق. ايماقتان جيناپ اكەلگەن اتتاردى جەكپە-جەك سىنىنا, بۋلليتكە, جالپى, كوكپاردىڭ ەرەجەسىنە ساي دايارلاۋعا از كۇش كەتپەدى. ەل چەمپيوناتىندا, باسقا دا تۋرنيرلەردە كوكپارشىلاردىڭ مىنگەن اتتارىنىڭ الەۋەتىن سارالاپ ىرىكتەدىك. نەگىزىنەن جامبىل وبلىسىنىڭ «اۋليەاتا» كوكپار كومانداسىنىڭ اتتارىنا نازارىمىز اۋدى. كوكپارشىلار استىنداعى اتىن ءوزىنىڭ ىڭعايىنا يكەمدەپ بەيىمدەپ جاتىر. قىرعىزستان كوكپار قۇراماسىنا شاقىرتۋ العان شاباندوزداردىڭ دا ءتىزىمى بەلگىلى. دۇنيەجۇزىلىك كوشپەلىلەر ويىندارىنا كورشىمىزدەن كىمدەردىڭ كەلەتىنى انىق بولعان سوڭ, ءبىز دە باستى باسەكەلەس قۇرامانىڭ مۇشەلەرىنە قارسى ازىرلىكتى كۇشەيتتىك», دەدى ا.مانكەەۆ.
وقۋ-جاتتىعۋ جيىنىنا شاقىرتۋ العان سپورتشىلاردىڭ باسىم كوپشىلىگى دۇنيەجۇزىلىك كوشپەلىلەر ويىندارىنا العاش رەت قوسىلماق.