تامىز ايىنان باستاپ ەلىمىزدە نە وزگەرەدى

ۋاقىت بەلدەۋىنە قاتىستى وزگەرىس: شەشىم قابىلدانادى

7 ماۋسىمدا ۋاقىتتى اۋىستىرۋ تۋرالى ءوتىنىش 50 مىڭ قول جينادى. ۇكىمەت بىرىڭعاي ۋاقىت بەلدەۋىن ەنگىزۋ قاجەتتىلىگىن باعالاۋ ءۇشىن جۇمىس توبىن قۇردى. جۇمىس توبى قۇجاتتى 40 جۇمىس كۇنى ىشىندە تالداپ, قورىتىندى شىعارۋى كەرەك. ءوتىنىشتى قاراۋ مەرزىمى تامىزدىڭ باسىندا اياقتالادى.

زەينەتاقى جيناعىن الۋ ەرەجەلەرى وزگەرەدى

10 تامىزدا زەينەتاقى جيناعىن الۋ قاعيدالارىن وزگەرتۋ تۋرالى جاڭارتىلعان بۇيرىق كۇشىنە ەنەدى. دەنساۋلىق ساقتاۋ مينيسترلىگى زەينەتاقى جيناعىن پايدالانۋ ەرەجەلەرىنەن قازاقستان اۋماعىندا ورنالاسقان مەديتسينالىق ۇيىمداردا كورسەتىلەتىن ستوماتولوگيالىق قىزمەتتەردى (پروتەز سالۋ, يمپلانتاتسيا) الىپ تاستاۋدى ۇسىنىپ وتىر.

بۇيرىق كۇشىنە ەنسە, 10 تامىزدان باستاپ ازاماتتار وسى ستوماتولوگيالىق قىزمەتتەرگە زەينەتاقى جيناعىن جۇمساي المايدى.

جەكە تۇلعالاردىڭ بانكروتتىق ءتارتىبى

25 تامىزدان باستاپ جەكە تۇلعالار ءۇشىن بانكروتتىق ءراسىمى قولجەتىمدى بولادى. قوستاناي وبلىسى بويىنشا مەملەكەتتىك كىرىستەر دەپارتامەنتى (مكد) حابارلاعانداي, 19 ماۋسىمدا نەسيە بەرۋدەگى تاۋەكەلدەردى ازايتۋ جانە قارىز الۋشىلاردىڭ قۇقىقتارىن قورعاۋ ماسەلەلەرى تۋرالى زاڭعا قول قويىلدى. بۇل قۇجات «ازاماتتاردىڭ تولەم قابىلەتتىلىگىن جانە بانكروتتىعىن قالپىنا كەلتىرۋ تۋرالى» زاڭعا وزگەرىستەر ەنگىزۋدى كوزدەيدى.

اۆتوبۋس قۇنى 

استانادا اۆتوبۋستاردىڭ جولاقىسى قىمباتتايدى. ەلوردادا 1 تامىزدان باستاپ قوعامدىق كولىكتە جول ءجۇرۋ قۇنى 90 تەڭگەدەن 110 تەڭگەگە دەيىن وسەدى.

الماتىدا دا اۆتوبۋس قۇنى 120 تەڭگەگە دەيىن قىمباتتايدى. جاڭا تاريف تامىز ايىنىڭ باسىندا كۇشىنە ەنەدى.

شەتەلدىكتەر قازاقستاندا رۇقساتسىز جۇمىس ىستەي الادى

قازاقستان جۇمىسقا رۇقسات الۋدى تالاپ ەتپەيتىن شەتەلدىكتەردىڭ ءتىزىمىن كەڭەيتتى. اتاپ ايتقاندا, وتباسى مۇشەلەرى مەن اسىراۋىنداعى ادامداردى قوسپاعاندا, ءتىزىم ينۆەستورلىق ۆيزا العان تۇلعالارمەن تولىقتىرىلدى. قاۋلى 2024 جىلعى 10 تامىزدا كۇشىنە ەنەدى.

استانا ۆوكزالىنداعى اۆتوتۇراقتاردىڭ تاريفتەرى

استانا ۆوكزالىنداعى اۆتوتۇراقتاردىڭ تاريفتەرى 5 تامىزدان باستاپ ەلوردادا تەمىرجول ۆوكزالىنداعى اقىلى تۇراقتاردىڭ جاڭا تاريفتەرى ەنگىزىلەدى. اۆتوتۇراقتا 2-6 ساعاتتان كەيىن قولدانىلعان ساعاتىنا 1000 تەڭگەلىك توسقاۋىلدىق تاريف جويىلدى. ەندى ءبىر ساعاتتىق تاريف اۆتوتۇراقتا وتكىزگەن ءاربىر ساعاتى ءۇشىن 200 تەڭگە بولماق.

سۋمەن جابدىقتاۋدىڭ جاڭا تاريفتەرى

1 تامىز بەن 31 جەلتوقسان ارالىعىندا ەلوردادا جاڭا تاريفتەر قولدانىلادى. ەندى استانالىقتار ءۇشىن اۋىز سۋدىڭ ءبىر تەكشە مەترىنىڭ قۇنى ەندى 79,77 تەڭگە (ققس-سىز) بولادى.

شەكتى بالل جيناي الماعاندارعا ۇبت وتەدى

تەستىلەۋ 10-15 تامىز ارالىعىندا وتەدى. عىلىم جانە جوعارى ءبىلىم مينيسترلىگىنىڭ مالىمەتىنشە, ۇلتتىق تەستىلەۋ ورتالىعىنىڭ سايتىندا تىركەلۋ مۇمكىن بولادى. تىركەلۋ كەزىندە تەستىلەۋشىلەر ەمتيحان وتەتىن ورىندى, كۇنى مەن ۋاقىتىن تاڭدايدى.

قازاقستان مەكتەپتەرىنە ءوتىنىش قابىلداۋ اياقتالادى

قازاقستاندا مەكتەپ وقۋشىلارىن ءبىرىنشى سىنىپقا قابىلداۋ ءۇشىن قۇجات قابىلداۋ 31 تامىزعا دەيىن جالعاسادى. وتىنىشتەر ەلەكتروندى فورماتتا eGov.kz ەلەكتروندى ۇكىمەت پورتالى جانە e-Bilimal جۇيەسى ارقىلى قابىلدانادى.

سونداي-اق تەحنيكالىق جانە كاسىپتىك ءبىلىم بەرۋ ۇيىمدارىنا وقۋعا قابىلداۋ مەرزىمى 25 تامىزدا اياقتالۋىنا بايلانىستى ونىنشى سىنىپ وقۋشىلارىنىڭ وتىنىشتەرىن قابىلداۋ مەرزىمى دە 15 تامىزدان 31 تامىزعا وزگەرتىلدى.

كوللەدجدەرگە قابىلداۋ كۆوتالارى وزگەرتىلدى

ءبىلىم ءمينيسترى مىندەتىن اتقارۋشىنىڭ 2024 جىلعى 23 شىلدەدەگى بۇيرىعىمەن تەحنيكالىق, كاسىپتىك جانە ورتا بىلىمنەن كەيىنگى ءبىلىم بەرۋدىڭ باعدارلامالارىن ىسكە اسىراتىن ءبىلىم بەرۋ ۇيىمدارىنا وقۋعا قابىلداۋ كۆوتاسى وزگەرتىلدى.

ەندى كۆوتا:

ءبىرىنشى نەمەسە ەكىنشى توپتاعى مۇگەدەكتەر, بالا كەزىنەن مۇگەدەكتەر, مۇگەدەك بالالار اراسىنان شىققان ازاماتتارعا - 10 پايىز (1 پايىزدى قۇرادى);

بالا كەزىنەن مۇگەدەك بالالاردى تاربيەلەپ وتىرعان وتباسى بالالارىنا, ءبىرىنشى نەمەسە ەكىنشى توپتاعى مۇگەدەكتەرگە - 5 پايىز (1 پ. قۇرادى).

ەل ازاماتتارى قانشا كۇن دەمالادى؟

تامىزدا كونستيتۋتسيا كۇنى اتاپ وتىلەدى. وسىعان وراي ازاماتتاردىڭ دەمالىس كۇنىنە تاعى ءبىر كۇن قوسىلادى. بيىل 30 تامىز كونستيتۋتسيا كۇنى جۇماعا تۋرا كەلىپ تۇر. وسىلايشا اپتاسىنا بەس كۇن جۇمىس ىستەيتىندەر 30, 31 تامىز جانە 1 قىركۇيەك كۇندەرى دەمالادى. ال التى كۇن جۇمىس ىستەيتىندەر 30 تامىزدا دەمالىپ, 31 تامىزدا جۇمىس ىستەيدى جانە 1 قىركۇيەك جەكسەنبى بولۋىنا بايلانىستى قايتا دەمالادى.

اۋا رايى

سينوپتيكتەر مالىمەتىنشە, تامىزدا قازاقستاندا اۋا تەمپەراتۋراسى نورما شاماسىندا, دەگەنمەن ەلدىڭ وڭتۇستىگى مەن وڭتۇستىك-شىعىسىندا نورمادان 1 گرادۋس جوعارى بولادى دەپ كۇتىلەدى.

«شىلدە مەن تامىزدا كوپتەگەن وبلىستا جاۋىن-شاشىن مولشەرى نورما شاماسىندا جانە نورمادان كوپ, ال تامىزدا ورتالىقتا, وڭتۇستىكتە جانە وڭتۇستىك-شىعىستا نورمادان از بولادى دەپ بولجانادى», دەپ جازىلعان مالىمەتتە.