قاراعاندىداعى فەرروقورىتپا زاۋىتىنىڭ سەگىز جۇمىسشىسى كەنەتتەن پەشتەن شىققان جالىننىڭ سالدارىنان قاتتى كۇيىك الىپ, اۋرۋحاناعا جەتكىزىلگەن. قاراعاندى وبلىسىنىڭ دەنساۋلىق ساقتاۋ باسقارماسى ولاردىڭ ءبىرى 22 شىلدەدە قايتىس بولدى دەپ مالىمدەدى, دەپ حابارلايدى Egemen.kz.
دارىگەرلەر سەگىز ناۋقاستىڭ التاۋىنىڭ جاعدايىن وتە اۋىر دەپ باعالاعان.
«دارىگەرلەردىڭ بارلىق كۇش-جىگەرىنە قاراماستان, قاراعاندى فەرروقورىتپا زاۋىتىنىڭ زارداپ شەككەن قىزمەتكەرلەرىنىڭ ءبىرىن قۇتقارۋ مۇمكىن بولمادى. 1993 جىلى تۋعان ازاماتتىڭ دەنەسىنىڭ 85 پايىزىن كۇيىك شالعان. وسى ۋاقىت ىشىندە ناۋقاس وتە اۋىر جاعدايدا بولدى. مارقۇمنىڭ جاقىن تۋىستارىنا قايعىرىپ كوڭىل ايتامىز», دەلىنگەن وبلىستىڭ دەنساۋلىق ساقتاۋ باسقارماسىنىڭ حابارلاماسىندا.
ايتا كەتەيىك, جەرگىلىكتى دارىگەرلەرگە كەڭەس بەرۋ جانە كومەك كورسەتۋ ءۇشىن قاراعاندىعا جەتەكشى شەتەلدىك ماماندار كەلگەن. اتاپ ايتقاندا, كومپانيا رەسەيدەن كومبۋستولوگ مامانداردىڭ كەلۋىن جانە يزرايل مەن تۇركيا ماماندارىنىڭ ونلاين-كونسۋلتاتسيالارىن ۇيىمداستىرعان.
ەسكە سالايىق, 20 شىلدەدە № 1 زاۋىت پەشىندە كەنەتتەن جالىن شىعىپ, سالدارىنان كاسىپورىننىڭ 8 قىزمەتكەرى زارداپ شەككەن بولاتىن. ولار ءارتۇرلى اۋىرلىقتاعى دەنە جاراقاتتارىن العان.
فەرروقورىتپا زاۋىتىندا بولعان وقيعا بويىنشا قىلمىستىق كودەكستىڭ 156-بابىنىڭ 2-بولىگى «ابايسىزدا دەنساۋلىققا اۋىر زيان كەلتىرۋگە اكەپ سوققان ەڭبەك قاۋىپسىزدىگى ەرەجەلەرىن بۇزۋ» بويىنشا سوتقا دەيىنگى تەرگەۋ باستالعان.