سەنات دەپۋتاتى نۇرتورە ءجۇسىپ «وقجەتپەس» ەمدەۋ-ساۋىقتىرۋ كەشەنىنىڭ قىزمەتىمەن تانىستى. سەناتور كىتاپحانانىڭ ماتەريالدىق-تەحنيكالىق بازاسى مەن كىتاپ قورى تۋرالى مالىمەت الىپ, مەكەمە باسشىلىعىمەن جانە قىزمەتكەرلەرىمەن اڭگىمەلەستى.
جۇزدەسۋدە اقمولا وبلىسىندا دەنساۋلىق ساقتاۋ سالاسىنىڭ وزەكتى ماسەلەلەرىن شيپاجاي ۇجىمىمەن بىرگە تالقىلادى. سونداي-اق ول مەديتسينا جانە ەمدەۋ-ساۋىقتىرۋ سالاسىندا جۇرگىزىپ جاتقان رەفورمالارى تۋرالى ايتىپ بەردى. اتاپ ايتساق, مەديتسينالىق قىزمەتتەردىڭ ساپاسىن ارتتىرۋ, الەۋمەتتىك كەپىلدىكتەردى جاقسارتۋ, سونداي-اق مەديتسينا قىزمەتكەرلەرىنىڭ ءرولى مەن مارتەبەسىن ارتتىرۋعا باعىتتالعانى تۋرالى مالىمەتتەرگە جان-جاقتى توقتالدى. سەناتور ۇجىممەن اڭگىمە بارىسىندا ازاماتتاردىڭ وقىرماندىق ساۋاتىن ارتتىرۋ ماسەلەسىنە دە جەكە توقتالدى.
– دەپۋتاتتىق كورپۋس جانە جەكە ءوزىم ەل حالقىنىڭ وقىرماندىق ساۋاتىنا, كىتاپحانالاردى ءتيىستى كىتاپتارمەن جابدىقتاۋعا ەرەكشە نازار اۋدارىپ وتىرمىز. ۇكىمەت اتىنا جولداعان دەپۋتاتتىق ساۋالدارىمدا كىتاپحانا سالاسىنداعى پروبلەمالاردى بىرنەشە رەت كوتەردىم. اتاپ ايتقاندا كىتاپحاناشىلار جالاقىسىنىڭ تومەن بولۋى جانە وسى سالا قىزمەتكەرلەرىنىڭ الەۋمەتتىك كەپىلدىكتەرىنىڭ جوقتىعى كوڭىلگە كىربىڭ ۇيالاتادى, – دەپ اتاپ ءوتتى نۇرتورە ءجۇسىپ.
كەزدەسۋ بارىسىندا مەكەمەنى ەمدەۋ-ساۋىقتىرۋ ماقساتىندا قاجەتتى جابدىقتارمەن قامتاماسىز ەتۋ, ەمدەۋ ىسىنە بىلىكتى مامانداردى تارتۋ سىندى بىرقاتار وزەكتى ماسەلە تالقىلاندى.