ءبىلىم بايگەسىنىڭ بەرەندەرى

جاس فيزيكتەر

وتكەن اپتادا وزات وقۋشى­لا­رىمىز ISPHO فيزيكادان حالىق­ارالىق عىلىمي وليمپياداسىن­دا بەس بىردەي جۇلدەنى جەڭىپ الدى. رەسەيدىڭ حانتى-مانسيسك قالاسىن­دا وتكەن بايقاۋدىڭ ناتيجەسىندە ءبىز­دىڭ بالالار ەكى التىن, ەكى كۇمىس جانە ءبىر قولا مەدال ولجالاپ, اتالعان سايىسقا قاتىسقان 17 ەلدىڭ اراسىندا جالپىكوماندالىق ەكىنشى ورىندى يەلەندى.

بۇل – ۇلكەن جەتىستىك. وسىنداي ۇزدىك ناتيجە كورسەتكەن قازاقستان كومانداسىنىڭ قۇرامىندا الماتى قالاسىنداعى رەسپۋبليكالىق فيزيكا-ماتەماتيكا مەكتەبىنىڭ تۇلەگى مارعۇلان نۇرساعاتوۆ, الماتى قا­لا­سى «ميراس» حالىقارالىق مەك­تە­بىنىڭ 11-سىنىپ وقۋشىسى دوسجان بيسيمبي, استانا قالاسى دارىندى جاسوسپىرىمدەرگە ارنالعان ء«بىلىم-يننوۆاتسيا» ليتسەيىنىڭ تۇلەگى ءامىر پشەنباەۆ, اقتوبە وبلىستىق دا­رىندى جاسوسپىرىمدەرگە ارنال­عان ء«بىلىم-يننوۆاتسيا» ماماندان­دى­رىل­عان لي­تسەي-ينتەرناتىنىڭ تۇلەگى ارتۋر كيم, استانا قالاسى رەسپۋبليكا­لىق فيزيكا-ماتەماتيكا مەكتەبى­نىڭ 9-سىنىپ وقۋشىسى يلياس قازىم­بەك بار. ولارعا جەتەكشىلىك ەتكەن – سۇلەيمەن دەميرەل اتىن­داعى ۋني­ۆەرسيتەتتىڭ دوتسەنتى, PhD سامات ماق­سۇتوۆ پەن اتالعان جوعا­رى وقۋ ور­نىنىڭ ماگيسترى نازارالي ايتجانوۆ.

وقىرماندارعا تۇسىنىكتى بولۋ ءۇشىن ايتا كەتەيىك, ISPhO – ءار ەكى جىلدا ءبىر رەت بولاتىن, اعىلشىن تىلىندە وتەتىن, تەوريالىق جانە ەكس­پەريمەنتتىك كەزەڭدەردەن تۇراتىن ءىس-شارا. وليمپيادا اياقتالعاننان كەيىن ءبىزدىڭ قۇراما ماسكەۋ فيزيكا-تەحنيكالىق ينستيتۋتىندا وتەتىن وقۋ-جاتتىعۋ جيىندارىنا قاتى­سادى. بۇل ولارعا وسىدان كەيىنگى ءبىلىم بايگەلەرىندە بۇدان دا ۇزدىك ناتيجە كورسەتۋگە كومەكتەسەدى.

ۇزدىك گەوگرافتار

جاقىندا تاعى بىرقاتار وزات ورە­نىمىز حالىقارالىق اقىل-وي جارىسىندا توپ جاردى. 2015 جىلدان بەرى وتكىزىلىپ كەلە جاتقان EgeO – گەوگرافيا­دان ەۋروپالىق وليمپيا­دادا قازاقستان قۇراماسى التى مەدال جەڭىپ الدى.

وقۋ-اعارتۋ مينيسترلىگى حابار­لاعانداي, سەربيانىڭ بەلگراد قالا­سىندا EGeO گەوگرافيادان ەۋرو­پالىق وليمپيادادا قازاقستان قۇ­راماسى التى مەدال جەڭىپ الدى, بۇل وقۋشىلارىمىزدىڭ جوعارى دا­يىندىق دەڭگەيىن كورسەتەدى.

حالىقارالىق ءبىلىم سايىسىندا ەل نامىسىن قورعاعان قازاقستان قۇراماسىندا شىمكەنت قالاسىنداعى حيميا-ماتەماتيكا باعىتىنداعى زياتكەرلىك مەكتەپتىڭ 11-سىنىپ وقۋ­شىسى سىدىقوۆ ارسەن, قوستاناي قالاسىنداعى فيزيكا-ماتەماتيكا باعىتىنداعى زياتكەرلىك مەكتەپتىڭ 9-سىنىپ وقۋشىسى ەنباحتوۆ اندرەي, تالدىقورعان قالاسىنداعى فيزي­كا-ماتەماتيكا باعىتىنداعى زياتكەر­لىك مەكتەپتىڭ 11-سىنىپ وقۋشىسى بولات اقجول, شىمكەنت قالاسى حي­ميا-بيولوگيا باعىتىنداعى زياتكەرلىك مەكتەپتىڭ 11-سىنىپ وقۋ­شىسى سەرىك­­باي قانات, وسكەمەن قالا­سىن­­داعى شىعىس قازاقستان وبلىس­تىق دا­رىن­دى بالالارعا ارنالعان ما­مان­­­­داندىرىلعان ء«بىلىم-يننو­ۆا­تسيا» ليتسەيىنىڭ 9-سىنىپ وقۋشىسى دارىنوۆ ءامىر, جامبىل وبلىسى­نىڭ دارىندى بالالارعا ارنالعان مامان­داندىرىلعان «دارىن» لي­تسەي-ين­تەر­ناتىنىڭ 11-سىنىپ وقۋشى­سى سابىر جومارت بار. ال بايقاۋدا جو­­عارى دايىندىق دەڭ­گەيىن كورسەت­كەن وسى قۇراما كوماندانىڭ جەتەك­شىسى – اباي دۇيسەن, ءوزى دە – رەس­پۋب­ليكالىق جا­نە حالىقارالىق وليم­پيادالاردىڭ جەڭىمپازى.

ماتەماتيكا مىقتىلارى

جاسوسپىرىمدەر اراسىندا وت­كەن JBMO-2024 بالقان ماتەماتي­كا ­وليمپياداسىندا قازاقستان قۇ­را­ماسى 100 پايىز ناتيجە كور­سە­تىپ, جۇل­دەلى ورىندارعا يە بولدى. اتال­عان وليم­پيادا تۇركيانىڭ ان­تاليا قا­لا­سىنداعى بالقان تۇبە­گىندە الەمنىڭ 22 ەلىنەن كەلگەن 135 وقۋ­شى اراسىندا ءوتتى.

قازاقستان قۇراماسىندا استانا قالاسىنداعى ء«بىلىم-يننوۆاتسيا» ليتسەي-ينتەرناتىنىڭ 8-سىنىپ وقۋ­شىسى الياسقار ءسۇلتانالي, ال­ما­تى قالاسىنداعى فيزيكا-ماتەما­تيكا باعىتىنداعى زياتكەرلىك مەك­تەپتىڭ 9-سىنىپ وقۋشىسى ءالي ەركە­بۇلان ۇلى, اتىراۋ وبلىستىق №1 ء«بىلىم-يننوۆاتسيا» ليتسەي-ين­تەر­ناتىنىڭ 9-سىنىپ وقۋشىسى بەردىبەك ورىنباسار, قىزىلوردا وبلىستىق №9 دارىندى بالالارعا ارنالعان ء«بىلىم-يننوۆاتسيا» لي­تسەي-ينتەرناتىنىڭ 9-سىنىپ وقۋ­شىسى ارنۇر انساتوۆ, الماتى قالا­سىنداعى رەسپۋبليكا­لىق فيزيكا-ما­تەماتيكا مەكتەبىنىڭ ­9-سىنىپ وقۋ­شىسى ەريك ليم, قىزىلوردا وبلىس­تىق №9 دارىندى بالا­لارعا ار­نالعان ء«بىلىم-يننو­ۆاتسيا» ليتسەي-ينتەرناتىنىڭ 9-سىنىپ وقۋ­شىسى اسقار مۇحتار ۇلى بار. قۇ­راما كوماندانىڭ جەتەكشىسى – م.ۆ.لو­مونوسوۆ اتىنداعى ممۋ قازاق­ستاندىق فيليالىنىڭ ىرگەلى جانە قولدانبالى ماتەماتيكا كافەد­راسىنىڭ دوتسەنتى, فيزيكا-ماتەماتيكا عىلىمدارىنىڭ كانديداتى انتون ۆاسيلەۆ. وزات وقۋشىلارىمىز بال­قان تۇبەگىندەگى بۇل ءبىلىم بايگەسىنەن التى مەدال ولجالادى.

اۋىل بالالارىنىڭ جۇلدەسى

جاقىندا وتكەن جارىستان اۋىل بالالارى جۇلدەلى ورالدى. انى­عى­راق ايتساق, جەتىسۋ وبلىسىنان شىق­قان اۋىل وقۋشىلارى قىتايدا وتكەن «FIRST Lego League» روبوتتەحنيكا بويىنشا ۇلتتىق چەمپيوناتىندا كۇمىس جۇلدەنى جەڭىپ الدى.

ءبىزدىڭ وقۋشىلار «ونەردەگى ين­نوۆاتسيا» تاقىرىبىندا LEGO-دان ­روبوتتەحنيكا ازىرلەمەلەرىن دايار­لاپ, «فوكۋستار كورسەتۋ» باع­دار­لاماسى ورناتىلعان ينتەراكتيۆتى روبوت­­تار قۇراستىردى. ءۇش كۇنگە سو­زىلعان جارىس قورىتىندىسى بويىنشا قازاقستان قۇراماسى 6-10 جاس ارا­لى­عىنداعى 238 كوماندانىڭ اراسىن­دا كۇمىس جۇلدەگە قول جەتكىزىپ, ەكىن­شى ورىندى يەلەندى.

ەلىمىزدىڭ نامىسىن جەتىسۋ وبلى­سىنداعى اۋىل مەكتەپتەرىنىڭ جانە تالدىقورعان قالاسىنىڭ باستا­ۋىش­ سىنىپ وقۋشىلارى نۇرسۇلتان بەك­سۇلتانوۆ, نۇربولات الينۇر جانە نۇرجان جانتورە قورعادى. ولاردىڭ جەتەكشىسى – البينا قوجانتاي.

اۋستراليادا العان گرانت

وزات وقۋشىلارىمىزدان قۇرال­عان قازاقستاننىڭ قۇراماسى وسى اپتانىڭ باسىندا اۋستراليادا روبو­تتەحنيكادان وتكەن چەمپيو­ناتتا ەكى جۇلدەنى قانجىعاعا بايلادى. ولار «FIRST Tech Challenge» كاتە­گورياسى بويىنشا «Asia Pacific Open Championship» حالىقارالىق چەمپيوناتىنىڭ جەڭىمپازى اتاندى.وقۋ-اعارتۋ مينيسترلىگىنىڭ تا­رات­قان اقپاراتىنا سۇيەنسەك, جا­رىس­قا 11 ەلدەن بارلىعى 400-گە جۋىق بالا قاتىستى. فينالدىق كەزدەسۋدە قازاقستاندىق مەكتەپ وقۋشىلارى ءباا كومانداسىمەن وداقتاسىپ, جە­ڭىسكە جەتۋ ءۇشىن كۇرەستى. ەكى كۇننىڭ قورىتىندىسى بويىنشا وقۋشىلار ەكى ماراپات: Finalist Alliance Captain جانە «Motivate Award» اتالىمىندا ءبىرىنشى ورىندى يەلەندى.

ەلىمىزدىڭ اتىنان ء«بىلىم-يننو­ۆاتسيا» ليتسەيى مەن رەسپۋب­ليكالىق فيزيكا-ماتەماتيكا مەكتەبىنىڭ 11-سىنىپ وقۋشىلارى: دارىن سمايىل, ارنار داۋلەتقۇل, ءادىل تۇرسىن­عالي, ابباس پاحريدين, وسمان اكيپبەك, اسىلحان ىبىراي, ءىلياس ءاشىر­الين, الديار داۋلەت ۇلى, جانايىم سابىرجان, عازيزا كۋنگوجينا قاتىستى.

«العاشقى ەكى كۇندە ءبىز جەڭىلىسسىز العا شىقتىق. ويىننىڭ سوڭعى كۇنى قيىنىراق بولدى, بىراق فينالعا وتتىك. ءبىز روبوت ويىنىندا جاقسى ونەر كورسەتىپ قانا قويماي, قازىلار القاسىنىڭ الدىندا ءوز پورتفوليو­مىزدى قورعاي العانىمىزعا وتە قۋا­نىشتىمىز», دەيدى كوماندا كاپيتانى دارىن سمايل.

ايتا كەتەيىك, اتالعان چەمپيوناتتا جەڭىسكە جەتۋ بۇل بالالارعا الەمدىك جەتەكشى جوعارى وقۋ ورىندارىنا گرانت الۋعا جول اشادى.