الماتىدا جول ءجۇرۋ اقىسى قىمباتتايدى

ەندى الماتىلىقتار جول اقىسى ءۇشىن 120 تەڭگە تولەيدى. سونىمەن قاتار اۆتوبۋستاردا قولما-قول تولەم جاساۋدى الىپ تاستاۋ جوسپارلانىپ وتىر.

الماتى قالالىق موبيلدىلىك باسقارماسىنىڭ باسشىسى ساعىندىق تەلىباەۆ 2023 جىلعى تامىزدا جول ءجۇرۋ ءتاريفى 11 جىلدا العاش رەت 100 تەڭگەگە دەيىن كوتەرىلگەنىن ەسكە سالىپ, بۇل باعا اۆتوبۋستاردى جوندەۋ سىندى شىعىندى وتەمەيتىنىن ايتتى.

«تاسىمالداۋشىلاردىڭ ناقتى شىعىنى 310 تەڭگەدەن اسادى, كەيبىر مارشرۋتتا 400 تەڭگەدەن اسادى. وسىعان بايلانىستى اكىمدىك الەۋمەتتىك ماڭىزى بار باعىتتاردى سۋبسيديالايدى. قابىلدانعان شارالار 2024 جىلى سۋبسيديالار سوماسىن 7 ميلليارد تەڭگەگە دەيىن تومەندەتۋگە مۇمكىندىك بەرەدى, سونىمەن قاتار قالا تۇرعىندارىن ساپالى, قاۋىپسىز جانە جايلى قوعامدىق كولىك قىزمەتىمەن قامتاماسىز ەتۋگە وڭ اسەر ەتەدى», دەدى ساعىندىق تەلىباەۆ.

ايتا كەتەيىك, قازىر الماتىدا 22 جەكە, 1 كوممۋنالدىق اۆتوبۋس پاركى جولاۋشىلاردى تاسىمالداۋمەن اينالىسادى. ال قوعامدىق كولىكپەن قاتىنايتىندار سانى 1,5 ملن ادامنان اسادى.