«الاش ساقاسى» الشىسىنان ءتۇستى

فرانتسيا پرەزيدەنتى ەممانيۋەل ماكرون وت­كەن جىلى ەلىمىزگە ساپارىندا ەل پرەزيدەنتى قاسىم-جومارت توقاەۆپەن بىرگە اسىق اتقا­نىن كوردىك. وسى كورىنىس اسىق اتۋدى بالانىڭ ويىنى تۇرىندە كورەتىن سانامىزعا سىلكىنىس تۋدىردى. ناسيحاتى كەمشىن ۇلتتىق سپورتىمىزدىڭ وسى ءتۇرىن قازاق كۇرەسى سياقتى دەڭگەيگە كوتەرۋگە نە كەدەرگى دەگەن سۇراق كوكەيىمىزدە تۇردى. سونىڭ ناتيجەسى بولار, وسى ناۋرىزدا «كوشپەلىلەردىڭ اسىق سپورتى» حالىقارالىق فەدەراتسيا­سى قۇرىلىپ, اسىق اتۋ سايىسى قىر­كۇيەك ايىندا استانادا وتەتىن دۇنيەجۇزىلىك كوشپەلىلەر ويىندارى باعدارلاماسىنا دا ەندى.

«الاش ساقاسى» رەسپۋبليكالىق چەمپيوناتىنا قاتىسۋشىلاردى اقتوبە وبلىستىق ىشكى ساياسات باس­قارماسىنىڭ باسشىسى الىبەك باي­نەشوۆ قۇتتىقتاپ, اسىق اتۋ فەدەراتسياسىنىڭ اتقارۋشى ديرەكتورى ازامات ماناپوۆ ءتۋر­نيردى ۇيىمداستىرعان جومارت سابىر­جان ۇلى مەن اسىق اتۋ فەدەراتسياسى اقتوبە فيليالىنىڭ جە­تەكشىسى ابىلقايىر سوتقاروۆقا العىسىن جەتكىزدى. «قازاق كۇرەسى» فەدە­راتسياسىنىڭ تۇڭعىش پرەزيدەنتى ەرعالي مۇحيتدينوۆ پەن سىر وڭىرىندە «قازاقستان بارىسىن» ۇيىمداستىرعان سادىق مۇستافاەۆ «الاش ساقاسىن» «قازاقستان بارىسى» دەڭگەيىنە جەت­كىزۋگە كۇش سالۋعا شاقىردى. وسىدان كەيىن قاراعاندى وبلىسىنان كەلگەن ۇلتتىق ساناتتاعى تورەشى امانگەلدى نۇرمۇحانوۆ سۋ تاسقىنىنان زارداپ شەككەن كوپبالالى انا ەلۆيرا نۇر­جاۋعانقىزىنا سايىسقا قاتىسۋشىلار اتىنان قارجىلاي كومەك تابىستادى.

اسىق اتۋ – ادامنىڭ سۇرمەرگەندىك قىرىن انىقتايتىن, سابىرلىلىققا ۇيرەتەتىن ويىن. وزا شاپقان سايىپ­قىرانداردى جومارت سابىر­جان­ ۇلى باستاعان تورەشىلەر انىقتاي ءبىلدى. 30 قاتىسۋشىنىڭ اراسىنان تۇركىستان وبلىسىنىڭ اسىقشىسى اماندوس ايتقۇلوۆ وزا شىعىپ «الاش ساقاسىن» يەلەندى. ەكىنشى ورىنعا اقتوبە وبلىسىنىڭ مەرگەنى عارىشبەك ق ۇلىبەك لايىقتى دەپ تانىلسا, ءۇشىنشى ورىن پاۆلودار وبلىسىنان كەلگەن جومارت نۇرلانوۆ پەن قۋانىش قابىلداعا بۇيىردى. تۋريزم جانە سپورت مينيسترلىگىنىڭ سپورت جانە دەنە شىنىقتىرۋ ىستەرى كوميتەتى اماندوس ايتقۇلوۆقا التىن بەلبەۋ مەن 300 مىڭ تەڭگە جانە باپكەرىنە 100 مىڭ تەڭگە سىياقى بەردى. عارىشبەك ق ۇلىبەك سايىستان كۇمىس بەلبەۋ تاعىپ, 200 مىڭ تەڭگە يەلەنىپ قايتسا, ونىڭ باپكەرىنە 75 مىڭ تەڭگە بەرىلدى. ءۇشىنشى ورىنعا ىلىككەن جومارت نۇرلانوۆ پەن قۋانىش قابىلدا 100 مىڭ تەڭگەدەن سىياقى الىپ, قوس قولا بەلبەۋگە قول جەتكىزدى. ولاردىڭ قوس باپكەرى 50 مىڭ تەڭگەدەن سىياقى الدى.

تۇڭعىش سايىسقا دەمەۋشىلىك ەتكەن «قازحروم» تۇك» اق باس ديرەكتورى سەرگەي پروكوپەۆكە ازامات ماناپوۆ فەدەراتسيا اتىنان العىسحات پەن «التىن ساقا» توسبەلگىسىن, جومارت سابىرجان ۇلى ارنايى قۇيىل­عان ساقانى سىيعا تارتتى. كورەر­مەندەردىڭ ىستىق ىقى­لاسىنا قاراعاندا, الداعى ۋاقىتتا «الاش ساقاسى» ەل اراسىندا كەڭىنەن تانىمال بولادى دەگەن سەنىم بار.

اقتوبە وبلىسى