بۇل تۋرالى ادىلەت مينيسترلىگى مالىمدەدى. 15 شىلدەدە ءتيىستى قاۋلى قابىلداندى, دەپ حابارلايدى Egemen.kz.
«2024 جىلدىڭ 15 شىلدەسىندە قازاقستان ۇكىمەتى جاڭا كوميتەتتەر قۇرۋ تۋرالى قاۋلى قابىلدادى. ەندى ادىلەت مينيسترلىگىندە زياتكەرلىك مەنشىك قۇقىعى, ماجبۇرلەپ ورىنداتۋ, تىركەۋ قىزمەتى جانە زاڭ قىزمەتتەرىن ۇيىمداستىرۋ كوميتەتى قۇرىلدى», دەلىنگەن حابارلامادا.
زياتكەرلىك مەنشىك قۇقىعى كوميتەتى شىعارماشىلىق پەن يننوۆاتسيانى دامىتىپ, زياتكەرلىك مەنشىك قۇقىقتارىن قورعاۋ جانە ساقتاۋ ماسەلەلەرىمەن اينالىسادى. بۇل پاتەنت پەن اۆتورلىق قۇقىقتى ءتيىمدى باسقارۋعا, سونداي-اق عىلىم, تەحنولوگيا جانە مادەنيەتتىڭ دامۋىنا جول اشادى.
ماجبۇرلەپ ورىنداتۋ كوميتەتى سوت ورىنداۋشىلارى ءىس-ارەكەتىنىڭ زاڭدىلىعىن ساقتاۋ, حالىقپەن تىعىز جۇمىس ىستەۋ, ازاماتتاردىڭ بۇزىلعان قۇقىقتارىن جەدەل قالپىنا كەلتىرۋ بويىنشا جۇمىس ىستەيدى. سونداي-اق اتقارۋشىلىق ءىس جۇرگىزۋدى جاڭعىرتۋعا باسىمدىق بەرەدى.
تىركەۋ قىزمەتى جانە زاڭ قىزمەتتەرىن ۇيىمداستىرۋ كوميتەتى زاڭدى تۇلعالاردى تىركەۋ, جىلجىمايتىن م ۇلىككە قۇقىق, نوتارياتتىق جانە ادۆوكاتتىق قىزمەتتى رەتتەۋ سالاسىنداعى باقىلاۋدى جۇزەگە اسىرادى.