«تازا قالا – تازا جاعالاۋ» اكتسياسى اياسىندا شالقار اۋدانىنىڭ جاستارى شالقار كولىنىڭ جاعالاۋىن قوقىستار مەن تۇرمىستىق قالدىقتاردان تازارتىپ, ەلىمىزدە ءوتىپ جاتقان «يگى ىستەر» مارافونىنا ۇلەس قوستى.
جۇما كۇنى ەرتەڭگىلىك جازعى كانيكۋل كەزىندە دەمالىستا جۇرگەن ستۋدەنتتەر, «جاسىل ەل» جاساعى مەن ۆولونتەرلىك ۇيىم مۇشەلەرى شالقار كولىنىڭ جاعاسىنا كەلىپ, توپ-توپقا ءبولىنىپ, تازالاۋ جۇمىستارىن باستادى. ولار قۋراپ جاتقان بىلتىرعى قامىس-شوپتەردى تىرمالاپ, ءار جەردە ۇيىلگەن تۇرمىستىق قالدىقتار مەن دەمالۋشىلار تاستاعان قوقىستاردى جيناپ, «ۇلكەن بورسىق» ورمان جانە جانۋارلار دۇنيەسىن قورعاۋ مەكەمەسىنىڭ تراكتورىنا تيەدى. شالقار كولىنىڭ اۋماعى وتە ۇلكەن بولعاندىقتان, جاستار ەڭ الدىمەن كوپتەن تازالانباعان جاعالاۋىن جيناۋدى ءجون كوردى. «ۇلكەن بورسىق» ورمان جانە جانۋارلار دۇنيەسىن قورعاۋ مەكەمەسىنىڭ ماماندارى اكتسياعا قاتىسۋشىلارعا كۇرەك, تىرما, سىپىرعى, قاپشىق, قولعاپتار تاراتتى.
«بيىل شالقار اۋدانى بويىنشا «جاسىل ەل» جاساعىنا 120 جاستى قامتۋ جوسپارلانسا, مامىر ايىندا 9, ماۋسىمدا 33 بالا جۇمىس ىستەپ كەتتى. شىلدە ايىندا جاساقتىڭ 35 مۇشەسى «تازا قالا – تازا جاعالاۋ», «بۇلاق كورسەڭ, كوزىن اش» اكتسيالارىنا قاتىستى. وسى جۇمىستار تامىز, قىركۇيەك, قازان ايلارىندا دا جالعاسادى. بىرنەشە جاس ستۋدەنتتىك قۇرىلىس وتريادى شەڭبەرىندە «قولعانات-قۇرىلىس» جانە «كۆارتس-سپەتس سەرۆيس» جشس-ىندا جۇمىس ىستەپ جاتىر. ايتا كەتۋ كەرەك, «تازا قالا – تازا جاعالاۋ», «بۇلاق كورسەڭ, كوزىن اش» ەكولوگيالىق اكتسيالارىنا «جاسىل ەل» جاساعى مۇشەلەرىمەن بىرگە «Amanat» پارتياسىنىڭ «جاستار رۋحى» جاستار قاناتى دا قوسىلىپ, شالقار قالاسى كوشەلەرىن تازالاپ, ساياباقتاردى رەتتەۋ مەن كوگالداندىرۋعا قاتىستى. ماسەلەن, مامىر ايىندا بالالار «مەنىڭ اتاۋلى اعاشىم» اتتى اكتسياسى شەڭبەرىندە كوشەلەرگە اعاش ەكسە, ماۋسىمدا «ارداگەرلەردى ارداقتايىق», «تازا قالا – تازا جاعالاۋ» اكتسياسىندا بەلسەندىلىك تانىتتى», دەيدى شالقار اۋداندىق جاستار رەسۋرستىق ورتالىعىنىڭ باسشىسى ايبەك ەمبەرگەنوۆ.
ايتا كەتۋ كەرەك, كەيىنگى ءۇش جىلدان بەرى شالقار اۋدانىنداعى «جاسىل ەل» جاساعى وبلىستا بەلسەندى, ەڭ باستاماشىل, ەڭ ءتارتىپتى وترياد رەتىندە تانىمال بولىپ ءجۇر. بەرىلگەن مىندەتتەمەلەردى ۋاقتىلى ءارى ساپالى ورىنداپ, ناتيجە كورسەتكەنى ءۇشىن اۋداندىق وترياد مۇشەلەرى وتكەن جىلى وڭىردەگى «جاسىل ەل» جاساعىنىڭ «جىل سەرپىنى» ماراپاتىنا قول جەتكىزدى.
اقتوبە وبلىسى