ۇزدىكتەرىمىز وليمپياداعا اتتاندى

تورتجىلدىقتىڭ باستى دوداسى 26 شىلدە مەن 11 تامىز ارالىعىندا پاريج قالاسىندا وتەدى. فرانتسيا استاناسىندا قازاقستان قۇراماسى ساپىنان 80 سپورتشى سپورتتىڭ 25 تۇرىنەن باق سىناپ, 81 مەدال جيىنتىعى بويىنشا دوداعا تۇسەدى. سپورتشىلارىمىز 1991 جىلدان بەرى سەگىزىنشى مارتە جازعى وليمپياداعا قاتىسپاق.

سالتاناتتى ءىس-شارادا تۋريزم جانە سپورت ءمينيسترى ەرمەك مارجىقپاەۆ سپورتشىلار جانە جاتتىقتىرۋشىلارعا ساتتىلىك تىلەپ, قالىڭ جانكۇيەردىڭ ءۇمىتىن اقتاۋ ماڭىزدى ەكەنىن ايتتى.

«سىزدەردىڭ الدىڭىزدا ەلىمىزدى پاريج وليمپياداسىندا تانىس­تىرۋ, ەل نامىسىن ابىرويمەن قورعاۋ سياقتى ماڭىزدى ءارى وتە جاۋاپتى مىندەت تۇر. چەمپيوندىق مىنەز, تاباندىلىق, جەڭىسكە دەگەن ەرىك-جىگەر, جيعان تاجىريبە ءھام جاتتىقتىرۋشىلاردىڭ, دارى­گەرلەردىڭ, ماسساج جاساۋ­شى­­لاردىڭ قاجىرلى ەڭبەگىنىڭ ارقاسىندا ۇلكەن ناتيجەگە جەتە­تىنىمىزگە سەنىمدىمىن. تاۋەلسىز­دىك جىلدارىندا قازاقستان جازعى جانە قىسقى وليمپيا ويىندارىنىڭ 79 جۇلدەسىن ولجالادى. ونىڭ ىشىندە 15 وليمپيادا چەمپيونى جارقىراپ كورىندى. وليمپياداداعى ءار جەتىستىك – بۇكىل ەلدىڭ الەمدەگى ءيميدجى, مەملەكەتتىڭ ءال-اۋقاتىنىڭ كور­سەتكىشى», دەدى ە.مارجىقپاەۆ.

قازاقستان سپورتشىلارىنىڭ اراسىندا العاش رەت وليمپيادا باعدارلاماسىنا ەنگەن برەيكينگ جانە بادمينتون سياقتى سپورت تۇرلەرىنەن ونەر كورسەتەدى. برەيكينگتەن ءامىر زاكيروۆ سا­يىسقا تۇسسە, بادمينتون سپورتىنان دميتري پانارين باق سىنايدى. 205 ەلدەن 10 مىڭنان اسا سپورتشى قاتىساتىن جازعى وليمپيادانىڭ سالتاناتى اشىلۋ ءىس-شاراسى سەنا وزەنىندە وتەدى.