سۋعا شومىلۋ ماۋسىمى باستالعاننان-اق ونسىز دا جۇمىسى قاۋىرت قۇتقارۋشىلار تىنىم تاپپاي كەتەدى. سۋ جاعالاپ, جۇرتتى قاۋىپسىزدىك شارالارىن ساقتاۋعا شاقىرادى, ايدىندا رەيد جۇرگىزەدى. ايتەۋىر ءتىلسىز جاۋدىڭ قۇرباندارىنىڭ قاتارىن كوبەيتپەۋگە بارىن سالادى. بىراق ەسكەرتۋدى ەلەپ جاتقاندار از. سالدارىنان جىل باسىنان بەرى ون شاقتى ادام سۋعا كەتتى. ولاردىڭ قاتارىندا بوي جەتپەيتىن تەرەڭگە بايقاماي قويىپ كەتىپ, قايتىپ شىعا الماي قالعان بالالار دا بار.
جاقىندا عانا وبلىس ورتالىعىنداعى «مۇراگەر» مەكتەبىنىڭ 4-سىنىپ وقۋشىسى ايسۇلتان حۇسايىن تەرەڭگە شىم باتىپ بارا جاتقان ەكى جاسار بالانى قۇتقارىپ, ەرلىك تانىتتى.
«سول كۇنى اۋلەتىمىزبەن قالا سىرتىنداعى «سابالاق» ساياجايىندا قۇرباندىق شالىپ, ارۋاقتارعا قۇران وقىتقانبىز. بالا, نەمەرەلەردىڭ باسى قوسىلعان سوڭ ۆولەيبول, فۋتبول ويناپ, دۋىلداسىپ جاتتىق. باسسەين جاعالاپ جۇرگەن كىشكەنتايلاردى كوزدەن تاسا قالدىرماۋعا تىرىستىق. ەندى قايتۋعا قام جاساپ جاتقانىمىزدا جۇرت شۋلاپ كەتتى. سويتسەك, ەكى جاسار ءسابي ەرەسەكتەرگە ارنالعان باسسەينگە ءتۇسىپ كەتىپتى. سۋ تۇبىنە كەتە باستاعان بالانى كىشكەنتاي نەمەرەم جانسۇلتان العاش بايقاپ, جۇرتتى كومەككە شاقىرا باستاعاندا ايسۇلتان ءجۇزىپ جەتىپ, ۇرلەمەلى باللونعا سالىپ جاعاعا الىپ شىعىپتى. جەدەل قۇتقارىلعاندىقتان, كىشكەنتاي حانتورەگە مەديتسينالىق كومەكتىڭ دە قاجەتى بولمادى. قۋانىشتان كوزدەرىنە جاس العان اتا-اناسى ايسۇلتانعا العىسىن جاۋدىردى», دەيدى ايسۇلتاننىڭ اتاسى حۇسايىن قورازباەۆ.
ءبىر قىزىعى, ايسۇلتاننىڭ اتاسى, قۇقىق قورعاۋ سالاسىنىڭ ارداگەرى حۇسايىن قورازباەۆ ەڭبەك جولىن توتەنشە جاعداي سالاسىندا باستاپتى. ءورت سەبەپتەرىن انىقتاۋشى بولىپ باستالعان قىزمەتى كەيىن پوليتسيادا جالعاستى. بالانىڭ اكەسى ارداق تا قازىر كاسىپكەرلىك سالاسىنا ويىسقان بۇرىنعى پوليتسيا قىزمەتكەرى.
توعىز جاسار ايسۇلتان – ەگىزدىڭ سىڭارى. باۋىرى ەرسۇلتان دا وزىمەن بىرگە دارىندى بالالارعا ارنالعان «مۇراگەر» مەكتەبىندە وقيدى. ەكەۋى دە وقۋ وزاتى. ساباقتان تىس ۋاقىتتا «ەۆرازيا» سپورت كەشەنىندەگى ءجۇزۋ سەكتسياسىنان, شاحمات كلۋبىنان قالمايتىن ايسۇلتان جۋىردا قالالىق جارىستا champion_kzo تۋرنير قورىتىندىسى بويىنشا 4 سپورتتىق رازرياد نورماسىن ورىنداپ, 1-ورىن يەلەندى.
«جان-جاقتى بولىپ ءوسىپ كەلە جاتقان ايسۇلتان قيىن ساتتە شۇعىل شەشىم قابىلداي الاتىنىن كورسەتتى. تەز قيمىلداپ, ءسابيدىڭ ءومىرىن قۇتقارىپ قالدى. مەن نەمەرەمدى ماقتان ەتەمىن», دەيدى اتاسى.
ايسۇلتاننىڭ باباسى اسان قورازباەۆ قان مايدانعا قاتىسىپ, «قىزىل جۇلدىز», «وتان سوعىسى» وردەندەرىن يەلەنگەنىن ايتا كەتكەن ءجون.
ادام ومىرىنە اراشا تۇسكەن ايسۇلتان حۇسايىننىڭ ەرلىگىن وبلىستىق توتەنشە جاعدايلار دەپارتامەنتى دە جوعارى باعالاپ, ەرجۇرەك بالاعا العىس ءبىلدىردى.
قىزىلوردا