الماتى مەملەكەتتىك قۋىرشاق تەاترى كانادانىڭ وتتاۆا قالاسىندا وتكەن ءى حالىقارالىق «وتتاۆا» قۋىرشاق تەاترلار فەستيۆالىنە قاتىسىپ, «رومەو مەن دجۋلەتتا» قويىلىمى ءۇشىن گران-پري جۇلدەسىنە يە بولدى.
كوركەمدىك دەڭگەيىنىڭ جوعارى بولۋىنا بايلانىستى كانادالىق كورەرمەن نازارىنا ۇسىنىلعان بۇل قويىلىم مەملەكەت استاناسىنىڭ ورتالىعىندا ورنالاسقان وتتاۆا ۋنيۆەرسيتەتىنىڭ «Academic Hall» ساحناسىندا 3-4 شىلدە كۇندەرى ساحنالاندى. كانادا كورەرمەندەرىنە دۇنيەجۇزىنىڭ قۋىرشاق ونەرىن تانىستىرىپ, حالىقارالىق شىعارماشىلىق پەن ىنتىماقتاستىقتى كوزدەگەن مادەني ءىس-شاراعا ەلىمىزدىڭ كوك تۋىن ۇستاپ قاتىسقان العاشقى قازاقستاندىق ونەر ورداسى الماتى مەملەكەتتىك قۋىرشاق تەاترى بولدى. الماتى تەاترىنىڭ شىعارماشىلىق ۇجىمى فەستيۆال اياسىندا كانادالىق كورەرمەندەردىڭ نازارىنا ءوز رەپەرتۋارىنداعى ەرەكشە قويىلىمداردىڭ ءبىرى, اعىلشىن دراماتۋرگى ۋيليام شەكسپيردىڭ ايگىلى تراگەدياسى جەلىسىمەن ساحنالانعان, نازىك تە تازا ماحابباتتىڭ قۇدىرەتىن سەزدىرەتىن «رومەو مەن دجۋلەتتا» سپەكتاكلىن ۇسىندى. كانادالىق ازاماتتار دا, وسى ەلدە تۇرىپ جاتقان وتانداستارىمىز بەن قانداستارىمىز دا سپەكتاكلدى تاماشالاپ, قويىلىم سوڭىنان زور قوشەمەتى مەن جىلى لەبىزىن جارىسا ءبىلدىرىپ جاتتى.
قۋىرشاق تەاترىنىڭ رەپەرتۋارىنداعى «رومەو مەن دجۋلەتتا» سپەكتاكلى 2019 جىلى بەلگىلى رەجيسسەر دينا جۇماباەۆانىڭ جەتەكشىلىگىمەن ساحناعا جول تارتقان ەدى. ەرەسەكتەرگە ارنالعان بۇل قويىلىم پرەمەراسى وتكىزىلگەن كۇننەن باستاپ ءوزىنىڭ ەرەكشە قۋىرشاقتارىمەن جانە تىڭ ساحنالىق شەشىمدەرىمەن كورەرمەندەر مەن تەاتر سىنشىلارىنىڭ جوعارى باعاسىن يەلەنگەن ەدى. ءبىرتالاي حالىقارالىق جانە رەسپۋبليكالىق دەڭگەيدەگى تەاتر فەستيۆالدەرىندە دە باق سىناعان بۇل قويىلىم قۋىرشاق تەاترىنىڭ ابىرويىن اسقاقتاتىپ كەلەدى. مىسالى, 2022 جىلى «رومەو مەن دجۋلەتتا» بولگاريانىڭ ۆارنا قالاسىندا وتكەن حالىقارالىق «التىن دەلفين» قۋىرشاق تەاترلار فەستيۆالىندە ۇزدىك دەپ تانىلىپ «گران-پري» جۇلدەسىنە, «ەڭ ۇزدىك ەر ادام» جۇلدەسىنە, «ەڭ ۇزدىك دەبيۋت» جۇلدەسىنە لايىقتى بولعان. ال وعان دەيىن 2021 جىلى قاراعاندى قالاسىندا وتكىزىلگەن جانە كوبىنە وتاندىق درامالىق تەاتر ۇجىمدارى قاتىسقان اشىربەك سىعاي اتىنداعى «سىن – شىن بولسىن» رەسپۋبليكالىق تەاترلار فەستيۆالىندە ءى-ورىندى جەڭىپ العان. سونىمەن قاتار «رومەو مەن دجۋلەتتانىڭ» وزگە دە فەستيۆالدەردە يەلەنگەن جەتىستىكتەرى مەن جەڭىستەرىنىڭ ءوزى ءبىر شوعىر.
قازاقستان رەسپۋبليكاسىنىڭ كاناداداعى توتەنشە جانە وكىلەتتى ەلشىسى داۋلەتبەك قۇسايىنوۆ فەستيۆال اياسىندا قۋىرشاق تەاترىنا قولداۋ ءبىلدىرىپ, «رومەو مەن دجۋلەتتا» سپەكتاكلىن تاماشالاپ: ء«بىزدىڭ جاستارىمىز وتە جوعارى دەڭگەيدە ونەر كورسەتتى جانە وتە قىزىق ماحاببات حيكاياسىن بايانداپ بەردى. ءوز دارىنىن, جالپى قازاق جاستارىنا ءتان تالانتتى كانادا حالقىنا تانىستىردى», – دەپ باعالاپ ءوتتى.
ال كانادانىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى الان حامسون بولسا: «ارتيستەردىڭ تاماشا ونەرىنە كۋا بولدىم. «رومەو مەن دجۋلەتتانىڭ» وسى ءبىر ينتەرپرەتاتسياسى ءبىزدى قاتتى تاڭعالدىردى!» – دەپ پىكىر ءبىلدىردى.
فەستيۆال سوڭىندا الماتى مەملەكەتتىك قۋىرشاق تەاترىنىڭ «رومەو مەن دجۋلەتتا» سپەكتاكلى ەڭ ۇزدىك ءارى جاڭالىعى مول قويىلىم رەتىندە تانىلىپ, «گران-پري» جۇلدەسىنە يە بولدى. ءى حالىقارالىق «وتتاۆا» قۋىرشاق تەاترلار فەستيۆالى اياسىندا قۋىرشاق تەاترىنىڭ ارتىستەرى قازاق قۋىرشاق ونەرىنىڭ, قازاق تەاترى ونەرىنىڭ, جالپى قازاق حالقىنىڭ ونەرلىلىگىن ساحنا تورىندە اسقاقتاتىپ, زور تابىسقا كەنەلدى.