قورعانىس مينيسترلىگىنىڭ باس اسكەري كلينيكالىق گوسپيتالىنە قاراستى بۇل مەديتسينالىق بولىمشە اقمولا وبلىسىنىڭ ششۋچينسك قالاسىندا ورنالاسقان, دەپ حابارلايدى Egemen.kz.
قورعانىس مينيسترلىگىنىڭ ءباسپاسوز قىزمەتى حابارلاعانداي, وڭالتۋ ورتالىعىنىڭ اشىلۋ سالتاناتىنا بۋراباي اۋدانىنىڭ اكىمى اراي سادىقوۆ, قورعانىس مينيسترلىگى باسشىلىعىنىڭ, قارۋلى كۇشتەردىڭ باس اسكەري-مەديتسينالىق باسقارماسىنىڭ وكىلدەرى جانە ششۋچينسك گارنيزونىنىڭ جەكە قۇرامى قاتىستى.
ءىس-شاراعا قاتىسۋشىلاردى قورعانىس ءمينيسترىنىڭ تىل جانە اسكەري ينفراقۇرىلىم جونىندەگى ورىنباسارى گەنەرال-لەيتەنانت قانىش ابۋباكىروۆ قۇتتىقتادى. ول بۇل مەكەمە بىتىمگەرلىك ميسسيالار مەن توتەنشە جاعدايلاردىڭ سالدارىن جويۋعا قاتىسقان, سونداي-اق اسكەرلەردىڭ جاۋىنگەرلىك جانە كۇندەلىكتى ومىرىندە ەرەكشەلەنگەن اسكەري قىزمەتشىلەر ساناتورلىق-كۋرورتتىق جانە قالپىنا كەلتىرۋ ەمىنەن وتەتىن العاشقى وڭالتۋ ورتالىعى ەكەنىن اتاپ ءوتتى.
«مەملەكەت باسشىسى بەلگىلەگەندەي, ۇلت دەنساۋلىعىنىڭ باسىمدىعىن ەسكەرە وتىرىپ, قورعانىس ءمينيسترى قىسقا مەرزىمدە اسكەري قىزمەتشىلەردى ەمدەۋ-قالپىنا كەلتىرۋ ورتالىعىن قۇرۋ مىندەتىن قويدى. بۇگىن ءبىز وسى قۋانىشتى وقيعانىڭ كۋاسى بولىپ وتىرمىز. كاسىبي دايىندالعان ماماندارمەن جاساقتالعان جانە زاماناۋي جابدىقتارمەن جاراقتانعان ورتالىق جىل سايىن جۇرەك, تىنىس الۋ, جۇيكە جۇيەسى جانە تىرەك-قيمىل اپپاراتى اۋرۋلارى بار مىڭ جارىمنان استام اسكەري قىزمەتشىنى مەديتسينالىق وڭالتۋعا مۇمكىندىك بەرەدى», دەدى ءمينيستردىڭ ورىنباسارى.
باس اسكەري-مەديتسينالىق باسقارماسىنىڭ باستىعى - مەديتسينا قىزمەتىنىڭ پولكوۆنيگى ەرجان سمايىلدىڭ ايتۋىنشا, ون تاۋلىككە سوزىلاتىن ەم قابىلداۋدا مۇندا ءبىر لەكپەن 60 ادام وڭالتۋدان وتە الادى. پاتسيەنتتەر ەمدىك دەنە شىنىقتىرۋمەن اينالىسىپ, فيتو, فيزيوتەراپيا الادى. ونىڭ ىشىندە ەلەكتر جارىعى, ماگنيتوتەراپيا, پارافينمەن ەمدەۋ جانە ەلەكتروسون, سۋمەن ەمدەۋ كەشەنى, ەمدىك-پروفيلاكتيكالىق ماسساج, ينگالياتسيا جانە اەروتەراپيا بار.
جاقىندا وڭالتۋ بولىمىنە 30 اسكەري قىزمەتشى كەلىپ ورنالاستى. الداعى ايلاردا ورتالىق تولىق جۇمىس قارقىنىنا كوشەدى دەپ جوسپارلانىپ وتىر.