ۇلتتىق بىرىڭعاي تەستىلەۋ باستالعالى بەرى قارماقشى اۋدانىنداعى №121 مەكتەپ وقۋشىسى ماقسات قۋانىشبەك پەن جاڭاقورعانداعى №54 مەكتەپ تۇلەگى ارۋجان شازات 136 بالل يەسى اتانىپ, ءبىلىم بايگەسىندەگى العاشقى ورىندا تۇرعان ەدى. سىناقتىڭ اياقتالۋىنا 1 كۇن قالعاندا قازالى اۋدانىندا ەڭ جوعارى ۇپاي تىركەلدى. اۋدان ورتالىعى ايتەكە بي كەنتىندەگى №204 مەكتەپتىڭ تۇلەگى نۇربولات جۇباتقان 139 بالل جينادى.
وبلىس بويىنشا 16 مامىر – 5 شىلدە ارالىعىنداعى سىناققا 8 240 تۇلەكتىڭ 89,7% قاتىستى. وبلىستىق ءبىلىم باسقارماسىنىڭ دەرەگىنشە, تەستىلەۋدىڭ سوڭعى كۇندەرى 100-دەن جوعارى ۇپاي جيناپ, ۇستازدارى مەن اتا-انالارىنىڭ ءۇمىتىن اقتاعان وقۋشى كوپ. كوش باسىندا وسىعان دەيىن حيميا پانىنەن اۋداندىق, وبلىستىق, رەسپۋبليكالىق ءپان وليمپيادالارىنىڭ جەڭىمپازى اتانعان قازالىلىق نۇربولات جۇباتقان تۇر.
نۇربولات – مەكتەپتى «التىن بەلگىمەن» اياقتاپ وتىرعان ەكى وقۋشىنىڭ ءبىرى. بيىلعى وقۋ جىلىنىڭ وزىندە XVI پرەزيدەنتتىك وليمپياداسى مەن «التىن تۇلەك» ماتەماتيكا وليمپياداسىنىڭ وڭىرلىك كەزەڭىندە توپ جارعان تالانتتى تۇلەكتىڭ تاڭداۋ ءپانى حيميا-بيولوگيا بولىپ تۇر.
دارىندى شاكىرتتىڭ بۇل جەڭىسى العاشقى مۇعالىمى جادىرا ءداليۆادان باستاپ, كەيىن تالابىن ۇشتاعان شاكيزادا ەسەنوۆا, جاڭاگۇل وتەناليەۆا, گۇلنۇر كەنجەعاراەۆا, ايمان اياپوۆا, نۇرگۇل جۇماحانوۆا سەكىلدى ۇستازدار ەڭبەگىنىڭ جەمىسى.
قىزىلوردا وبلىسى, قازالى اۋدانى