قازاقستان ۇلتتىق بانكى «ەستە قالاتىن وقيعالار مەن ءبىرتۋار ادامدار» سەرياسىمەن «Qanysh Sátbaev. 125 jyl» كوللەكتسيالىق مونەتالارىن اينالىمعا شىعارادى.
قازاقستان ۇلتتىق بانكىنىڭ حابارلاۋىنشا, مونەتالار شىعارىلىمى گەولوگ-عالىم, عىلىم جانە قوعام قايراتكەرى, پروفەسسور, قازاق كسر عىلىم اكادەمياسىنىڭ تۇڭعىش پرەزيدەنتى قانىش ساتباەۆتىڭ 125 جىلدىعىنا ارنالعان. اكادەميكتىڭ داڭقتى ەسىمى قالا, ۋنيۆەرسيتەت, تاۋ-كەن مەتاللۋرگيا كومبيناتى, مەموريالدىق مۋزەي, ينستيتۋتتار, مەكتەپتەر مەن كوشەلەردىڭ اتاۋلارىندا ماڭگى ساقتالعان. ونىڭ قۇرمەتىنە ەلىمىزدىڭ كوپتەگەن قالاسىندا ەسكەرتكىشتەر ورناتىلدى. ءتىپتى عالىمنىڭ اتىنداعى عالامشار بارىن دا جاقسى بىلەمىز. ال ساتباەۆ مونەتاسىنىڭ اينالىمعا شىعۋى نۇر ۇستىنە نۇر ەمەس پە؟
مونەتا نومينالى 2000 تەڭگەلىك جانە 200 تەڭگەلىك بولىپ ەكى تۇردە شىعادى. تارالىمى – 300 دانامەن شىعاتىن 2000 تەڭگەلىك مونەتادا مارگانەتس رۋداسىنىڭ, مينەرالدىڭ ءتۇسىن بىلدىرەتىن كۇرەڭ قىزىل تۇسكە يە تانتال ساقيناسى بار. ايتا كەتەيىك, قانىش ساتباەۆ جەزدى اۋىلىنىڭ ماڭىنان مارگانەتس رۋداسىن تاۋىپ يگەرگەن. بۇل مەتالل ەكىنشى دۇنيەجۇزىلىك سوعىس كەزىندە بروندى تەحنيكاعا ارنالعان بولات قورىتپالار وندىرىسىندە كەڭىنەن قولدانىلعان.
ال مەلحيور قوسپاسىنان دايىندالعان 200 تەڭگەلىك مونەتا 5000 دانامەن شىعادى. مونەتانىڭ ماسساسى – 15 گرامم, ديامەترى – 33 مم, ساپاسى – brilliant uncirculated.
ايتا كەتەيىك, مونەتانىڭ بارلىق ءتۇرىن ەلىمىزدىڭ بۇكىل اۋماعىندا ءوزىنىڭ بەلگىلەنگەن قۇنىمەن تولەمنىڭ كەز كەلگەن تۇرىندە قابىلداۋعا, بانك شوتتارىنا ەسەپكە الۋعا, اۋدارۋعا, ۇساقتاۋعا جانە ايىرباستاۋعا بولادى.