پاۆلوداردا سۇيىكتىسىن سوققىعا جىققان ەر ادام سوتتالدى. سوققى سالدارىنان جابىرلەنۋشى ءارتۇرلى جاراقاتتارمەن اۋرۋحاناعا جاتقىزىلعان, دەپ حابارلايدى Egemen.kz جەرگىلىكتى باق-قا سىلتەمە جاساپ.
پاۆلودار قالاسىنىڭ № 2 سوتىندا ەر ادام ايەلگە قاتىستى قك 120-بابىنىڭ 1-بولىگى, قك 107-بابىنىڭ 1-بولىگى بويىنشا زورلاۋ جانە دەنساۋلىققا قاساقانا اۋىرلىعى ورتاشا زيان كەلتىردى دەگەن ايىپپەن قىلمىستىق ءىس قارالدى.
«ايىپتالۋشى مەن جابىرلەنۋشى التى اي بويى كەزدەسكەن. جالدامالى پاتەردەگى كەزەكتى كەزدەسۋدە ولاردىڭ اراسىندا جانجال تۋىنداعان. سول ۋاقىتتا ايىپتالۋشى ايەل ادامنىڭ باسى مەن دەنەسىنە سوققىلار جاساپ, قۇلاعاننان كەيىن ونى تۇنشىقتىرا باستاعان. جابىرلەنۋشى اۋرۋحاناعا جەتكىزىلگەننەن كەيىن قۇقىق قورعاۋ ورگاندارىنا جۇگىندى», - دەلىنگەن سوتتىڭ حابارلاماسىندا.
سوتتىڭ دەنساۋلىققا زيان كەلتىرۋ جونىندەگى ايىپتاۋ بولىگىندەگى شەشىمى بويىنشا قىجك-ءنىڭ 340-بابى تارتىبىمەن پروكۋرورعا اسا اۋىر جاڭا ايىپتاۋ اكتىسىن جاساۋ ءۇشىن ۋاقىت بەرىلدى. سوت جاڭا اكت جاسالماۋ سەبەبىمەن ءىستى ايىپتاۋ شەگىندە قاراستىرا كەلە, دەنساۋلىعىنا قاساقانا ورتاشا زيان كەلتىرگەنى ءۇشىن كىنالى دەپ تاپتى.
سونداي-اق, قاراما-قايشى ايعاقتار, ساراپتامالاردىڭ تەرىس ناتيجەلەرى بويىنشا زورلاۋ ايىبى ءوزىنىڭ راستاۋىن تاپپاعاندىقتان, اقتاۋ تۋرالى شەشىم قابىلداندى.
سوت ايىپتالۋشىنىڭ ماس كۇيىندە قىلمىس جاساۋ ءارى جەكە باسىنىڭ تەرىس سيپاتتاماسىن ەسكەرە وتىرىپ, قك-ءنىڭ 1-بولىگىنىڭ 107-بابىنا سايكەس ەكى جىلعا باس بوستاندىعىنان ايىرۋ بويىنشا ماكسيمالدى جازا تاعايىندادى.
ايتا كەتەيىك, ۇكىم زاڭدى كۇشىنە ەنگەن جوق. سول سەبەپتى, تاراپتار اتالعان قىلمىس بويىنشا شاعىمدانۋى, نارازىلىق ءبىلدىرۋى مۇمكىن.