قازاقستاننىڭ ەكى وبلىسىندا كامەلەتكە تولماعانداردان اقشا بوپسالاعان ۇيىمداسقان قىلمىستىق توپ مۇشەلەرى ۇستالدى, دەپ حابارلايدى Egemen.kz.
ىشكى ىستەر مينيسترلىگىنىڭ مالىمەتىنشە, كۇدىكتىلەر وزگەلەردى قورقىتۋ جانە وزدەرىنىڭ باسىمدىلىعىن كورسەتۋ ماقساتىندا زورلىق-زومبىلىق ارەكەتتەرىن بەينەجازباعا ءتۇسىرىپ وتىرعان.
« ۇلىتاۋ وبلىسىندا ۇيىمداسقان قىلمىسقا قارسى كۇرەس باسقارماسىنىڭ قىزمەتكەرلەرى 18-20 جاس ارالىعىنداعى جاستار توبىن قولعا ءتۇسىردى. ولار جەرگىلىكتى كوللەدجدىڭ كامەلەتكە تولماعان ستۋدەنتتەرىن قورقىتىپ, اقشا بوپسالاعان. بوپسالاۋ جانە بۇزاقىلىق فاكتىلەرى بويىنشا قىلمىستىق ىستەر قوزعالىپ, سوتقا جولداندى», دەدى قر ءىىم ۇيىمداسقان قىلمىسقا قارسى كۇرەس دەپارتامەنتىنىڭ وكىلى قۋاندىق الپىس.
پاۆلودار وبلىسىنىڭ پوليتسيا دەپارتامەنتى ۇيىمداسقان قىلمىسقا قارسى كۇرەس باسقارماسى پروكۋراتۋرانىڭ ۇيلەستىرۋىمەن 2024 جىلدىڭ مامىر ايىندا جاستاردى بوپسالاۋمەن اينالىسقان توپتىڭ ارەكەتىنە توسقاۋىل قويدى.
توپ مۇشەلەرىنە وسىنداي 10 فاكتىگە قاتىسى بار دەگەن ايىپ تاعىلىپ وتىر. ولار جابىرلەنۋشىلەردى قورقىتىپ, 2 ملن تەڭگەگە دەيىن العان. جابىرلەنۋشىلەر قىلمىسكەرلەردەن قورقىپ, قۇقىق قورعاۋ ورگاندارىنا جۇگىنبەگەن.
زاڭسىز ارەكەتتەردىڭ سالدارىنان جابىرلەنۋشىلەر سۋيتسيد جاساۋعا دا بەل بۋعان. وسىنداي وقيعالاردىڭ بىرىندە قورلىق پەن سوققىعا شىداماعان 22 جاستاعى جىگىت ءوزىن-ءوزى ولتىرۋگە وقتالعان. توپ مۇشەلەرىن ۇستاۋ كەزىندە ولاردان تراۆماتيكالىق جانە سۋىق قارۋ, سونداي-اق سينتەتيكالىق ەسىرتكى تاركىلەندى. بارلىق كۇدىكتى قاماۋعا الىندى. جابىرلەنۋشىلەرگە قاتىستى قاۋىپسىزدىك شارالارى قابىلداندى. قىلمىستىق كودەكستىڭ بىرنەشە بابى بويىنشا سوتقا دەيىنگى تەرگەپ-تەكسەرۋ جۇرگىزىلىپ جاتىر.