قاراعاندى وبلىسىنا جۇمىس ساپارى اياسىندا «Respublica» پارتياسىنان سايلانعان ءماجىلىس دەپۋتاتى دينارا ناۋموۆا وبلىستىق كوپبەيىندى بالالار اۋرۋحاناسى مەن وبلىستىق مەكتەپ-ينتەرناتقا باردى, دەپ جازادى Egemen.kz.
2023 جىلدىڭ 1 ماۋسىمىنان باستاپ وبلىستىق كوپسالالى بالالار اۋرۋحاناسىنىڭ زاماناۋي جاڭا عيماراتى بوي كوتەردى. مەكەمە جاڭا كت جانە مرت اپپاراتتار, زاماناۋي رەنتگەن جانە ۋلترادىبىستىق قۇرىلعىلار, سونداي-اق جاپوندىق كۇيىككە قارسى توسەكتەرى بار وزىق مەديتسينالىق جابدىقتارمەن جابدىقتالعان. وپەراتسيا جاسايتىن بولىمدەردە 4K دەڭگەيىندەگى بەينە-ەندوسكوپيالىق كەشەندەر, اۆتونومدى جەلدەتكىش جانە ەڭ كۇردەلى وپەراتسيالاردى جۇرگىزۋگە مۇمكىندىك بەرەتىن نەرا-فيلترلەرى بار لامينارلى توبەلەر دە بار.
«قامقورلىق» وڭالتۋ ورتالىعىنىڭ اشىلۋى ەڭ كىشكەنتاي ناۋقاستاردى قولداۋ ءۇشىن ماڭىزدى قادام دەۋگە بولادى. بۇل جەردە بالالار تۋعاننان ءۇش جاسقا دەيىن وڭالتۋ كومەگىن الا الادى. سونداي-اق 2023 جىلدىڭ قازان ايىندا نەيروحيرۋرگيالىق جانە تراۆماتولوگيالىق جاڭا بولىمشەلەردىڭ اشىلۋى ەلدىڭ تۇكپىر-تۇكپىرىنەن كەلەتىن ءتۇرلى جاراقاتى بار بالالارعا قاجەتتى كومەكتى كەدەرگىسىز الۋعا مۇمكىندىك بەرەدى.
«بۇگىن ارىپتەستەرىممەن 18 جاستان كەيىن وڭالتۋ ماسەلەلەرىنە قاتىستى وزەكتى سۇراقتاردى تالقىلادىق. ويتكەنى وسى جاسقا دەيىنگى بالالاردىڭ جاعدايىن جاساۋ بويىنشا ايتارلىقتاي جەتىستىككە قول جەتكىزدىك. الايدا جۇيە 18 جاستان كەيىنگى جاعدايدى پىسىقتاۋدى قاجەت ەتەدى. وسى ماسەلەنى الداعى جۇمىسىمىزدا ەسكەرەمىز. ءبىز جاستاردىڭ تۇرمىس جاعدايى مەن ءومىر ساپاسىن جاقسارتۋعا كومەكتەسەتىن زاڭنامالىق باستامالاردى, باسقا دا ماسەلەلەلەردى بىرلەسىپ تالقىلاۋدى جالعاستىرامىز», دەدى دينارا ناۋموۆا.
سونىمەن قاتار دەپۋتات قاراعاندى وبلىستىق مەكتەپ-ينتەرناتىندا بولىپ, وبلىس بويىنشا 160 بالانى قامتيتىن مەكتەپ كابينەتتەرىنىڭ جۇمىسىمەن تانىستى. دەپۋتات مۇگەدەك بالالارعا قىزمەت كورسەتۋ باعىتىندا مەملەكەتتىك-جەكەمەنشىك ارىپتەستىكتى رەتتەۋ تۋرالى ينتەرنات باسشىلىعىنىڭ ۇسىنىستارىنا نازار اۋداردى.
قازىرگى ۋاقىتتا «Respublica» پارتياسى مەكتەپ-ينتەرنات پسيحولوگى ءۇشىن ارنايى كابينەت دايىنداپ جاتىر.