دامىعان ەلدەردە تيىمدىلىگىن كورسەتكەن ءمامس جۇيەسى بىزدە دە جىل وتكەن سايىن شيراپ كەلەدى. سالانى قارجىلاندىرۋ كولەمى ۇلعايىپ, ەسەسىنە بۇرىن اقىلى بولعان مەديتسينالىق قىزمەتتەردىڭ كوبى ساقتاندىرۋ ەسەبىنەن تولەنە باستادى.
قوردىڭ قارجىسىنا نەبىر كۇردەلى وپەراتسيالار جاسالدى. مەديتسينا مەكەمەلەرى جاڭا قۇرال-جابدىقتارمەن تولىقتى. قىسقاسى, قورعا اۋدارعان قارجى بۇگىن وزگەنى جارىلقاسا, ەرتەڭ وزىڭىزگە, جاقىندارىڭىزعا ءتيۋى مۇمكىن. ءيا, مەديتسينالىق كومەكتىڭ ساپاسىنا كەلگەندە كوڭىل تولمايتىن تۇستار كوپ. قورعا قارجى اۋدارىپ, ساپالى قىزمەت الماعان تۇرعىنداردىڭ سىنى دا ورىندى. سوندىقتان قور باسشىلىعى مەديتسينالىق كومەكتىڭ ساپاسىنا قاتىستى قاتە-كەمشىلىكتەردى باقىلاۋعا, رەتتەۋگە كۇش سالىپ كەلەدى. مىسالى, جاقىندا الەۋمەتتىك مەديتسينالىق ساقتاندىرۋ قورىنىڭ باسشىسى ابىلقايىر سقاقوۆ الماتىدا دەنساۋلىق ساقتاۋ ارداگەرلەرىمەن, ساراپشىلارمەن جۇزدەسىپ, جۇيەنى دامىتۋ تەتىكتەرىن تالقىلادى.
كەزدەسۋدە باسقارما توراعاسى 2024–2025 جىلدارعا ارنالعان قوردى دامىتۋدىڭ پەرسپەكتيۆالىق جوسپارىن تانىستىردى. وندا ءمامس تۇراقتىلىعىن قامتاماسىز ەتۋ, حالىقتى جۇيەگە تارتۋ, مونيتورينگ ساپاسىن ارتتىرۋ سىندى ماسەلەلەر قامتىلىپتى. سونداي-اق تسيفرلاندىرۋ, قوردىڭ اشىقتىق دارەجەسىن كوتەرۋ سىندى ۇسىنىستار دا جوسپاردا بار ەكەن.
باسقوسۋدا دارىگەرلەردىڭ جۇكتەمەسىن ەسكەرگەن سالا ساراپشىلارى مەديتسينا قىزمەتكەرلەرىن كومپيۋتەرلىك جۇمىستان بوساتۋ تۋرالى ۇسىنىس تاستادى. جەكە مەديتسينالىق ورتالىقتار باس تارتاتىن اۋىر ناۋقاستاردى قابىلداۋعا ءماجبۇر بولعان مەملەكەتتىك اۋرۋحانالاردى قولداۋدى ۇسىندى.
ىزىنشە قور باسشىسى قالاداعى مەديتسينالىق ۇيىمداردىڭ باسشىلارىمەن كەزدەستى. وندا مەكەمەلەردى ۋاقتىلى قارجىلاندىرۋ جانە بىرلەسىپ ورىنداۋشىلارمەن قارىم-قاتىناس ءجونى تالقىلاندى.
«بيىل الماتىلىقتار ءۇشىن مەديتسينالىق كومەك كورسەتۋگە 334,7 ملرد تەڭگە ءبولىندى. ونىڭ ىشىندە ءمامس بويىنشا – 159,6 ملرد تەڭگە, تمككك شەڭبەرىندە 175,1 ملرد تەڭگە قارالدى. جىل باسىنان بەرى تولەم ۇدەرىستەرىن اۆتوماتتاندىرۋ بويىنشا جۇرگىزىلىپ جاتقان جۇمىستاردى جانە حالىققا ۇزدىكسىز مەديتسينالىق كومەك كورسەتۋ قاجەتتىگىن ەسكەرە وتىرىپ, ءبىز اۆانستاۋدى جىلدىق بيۋدجەتتىڭ 30%-دان 70%-عا دەيىن ارتتىرۋ جونىندە بۇرىن-سوڭدى بولماعان شەشىم قابىلدادىق», دەدى كەزدەسۋدە ءا.سقاقوۆ.
وسىدان سوڭ ول مەديتسينالىق مەكەمەلەردىڭ باسشىلارىنا قوردا بيىل ناۋرىزدان باستاپ اۋقىمدى دەرەكتەردى جەدەل تالداۋ جانە باسقارۋشىلىق شەشىمدەردى ءتيىمدى قابىلداۋ ءۇشىن قۇرىلعان سيتۋاتسيالىق-تالدامالىق ورتالىقتىڭ جۇمىسىن كورسەتتى. وندا 18 دەرەكقوردىڭ 500-گە جۋىق كورسەتكىشى مىڭنان اسا داشبوردتا – شارتتار, قىزمەتتەر, مونيتورينگ قورىتىندىلارى مەن شاعىمدار سانى, حالىقتىڭ ۇلەسى جانە ءمامس جۇيەسىمەن قامتۋ دەڭگەيى تۋرالى جانە باسقا دا اقپارات قامتىلعان. ءبىر سوزبەن ايتقاندا, سيتۋاتسيالىق-تالدامالىق ورتالىقتىڭ جۇمىسىن قارجىلاندىرۋ كەزەڭدەرى اشىقتىقتى قامتاماسىز ەتۋگە, ءتيىمدى باسقارۋ شەشىمدەرىن قابىلداۋعا مۇمكىندىك بەرەدى ەكەن.
كەزدەسۋ بارىسىندا ءا.سقاقوۆ دەنساۋلىق ساقتاۋ جۇيەسىنىڭ قاتىسۋشىلارى اراسىندا سىندارلى جانە تىعىز ديالوگ ورناتۋدىڭ ماڭىزدىلىعىن تاعى ءبىر مارتە ەسكە سالدى. ول كوپ كەشىكپەي №5 قالالىق كلينيكالىق اۋرۋحاناعا بارىپ, مەديتسينالىق ۇيىمداعى مەنەدجمەنت ماسەلەلەرىنە, پاتسيەنتتەردى قولداۋ قىزمەتتەرىنىڭ جۇمىسىنا جانە پاتسيەنتتەرمەن كەرى بايلانىس جايىنا ەرەكشە نازار اۋداردى. سونداي-اق قور باسشىسى قوردىڭ ورتالىق اپپاراتىنىڭ قىزمەتكەرلەرىنە جەرگىلىكتى جەرلەردەگى احۋالمەن تانىسۋ ءۇشىن «دوستار مەد» كوپسالالى مەديتسينالىق ورتالىعىنا بارۋدى تاپسىردى.
ء«مامس جۇيەسىنە قاتىساتىن جەكە كلينيكالار پاتسيەنت الدىنداعى جاۋاپكەرشىلىكتى سەزىنۋگە ءتيىس. ول ءۇشىن مەديتسينالىق قىزمەتتىڭ ساپاسى مەن قولجەتىمدىگىنە باسا ءمان بەرۋ قاجەت. سول كەزدە پاتسيەنتتەر مەديتسينالىق قىزمەتتىڭ ساپاسىنا جاقسى باعا بەرەدى. ەگەر شاعىمدار بولماسا, وتانداستارىمىز كورسەتىلگەن قىزمەتتەرگە قاناعاتتانسا, قور تاراپىنان مەديتسينالىق ۇيىمدارعا دا ماسەلە بولمايتىنىن ءتۇسىنۋ قاجەت», دەدى ءا.سقاقوۆ مەديتسينالىق مەكەمە باسشىلارىنا.
بۇگىندە الماتىدا قورمەن 215 مەديتسينالىق ۇيىم جۇمىس ىستەسە, ونىڭ 124-ءى جەكەمەنشىك ەكەن. جوعارىدا ايتقانداي, قور باسشىلىعىنا تۇرعىنداردان تۇسكەن ارىز-شاعىمدارعا بايلانىستى مەديتسينالىق مەكەمەلەرگە دە سالماق ءتۇسىپ وتىر. ال مەديتسينالىق كومەكتىڭ ساپاسى مامانداردى قولداۋ تەتىكتەرى ارقىلى جۇيەلەنەدى. مۇنى جاقسى بىلەتىن قور باسشىلىعى جۋىقتا ەلدىڭ باسقا وڭىرلەرىن شارلاپ, مەديتسينالىق كومەك ساپاسىن باقىلاۋعا نيەتتى.