شىمكەنتتىڭ ءسانىن كەتىرگەن كەلەڭسىزدىك

قوقىس ۇيىلگەن جەردەن شايىندى سۋ كەشەنىنىڭ باسشىسى مەن جەرگىلىكتى اۋىل بەلسەندىسى جانۋارلاردىڭ ولەكسەسىن كورگەن. كۇننىڭ ىستىعىندا قولقانى قابار يىستەن ەلدى مەكەن حالقى زارداپ شەگىپ وتىر. تازارتۋ قوندىرعىلارى كەشەنىنىڭ زەرتحاناسىندا قوقىستان شىعاتىن ءيىستىڭ قۇرامى تەكسەرىلدى. ناتيجەسىندە, اۋادا زياندى زاتتار بەلگىلەنگەن مولشەر­دەن ەداۋىر اسىپ كەتكەنى انىقتالدى.

ءتيىستى شارا كورۋ ءۇشىن جەرگىلىكتى تۇرعىندار جۇك كولىكتەرىنىڭ نومىرلىك بەلگىلەرىن سۋرەتكە ءتۇسىرىپ قۇزىرەتتى ورگاندارعا جىبەرگەن. نەگە ەكەنى بەلگىسىز, قوقىس ۇيىلگەن الاڭعا باراتىن جولعا بىرەۋلەر ارىقتار قازىپ, ەدەن پليتالار توسەگەن. جاعىمسىز ءيىس ءبىر بولەك, تۇرمىستىق قالدىقتار اۋىل حالقىنا تاعى ءبىر پروب­لەما تۋىنداتىپ وتىر. بۇل – ءورتتىڭ شىعۋى. قوقىس الاڭىندا وسىعان دەيىن 2-3 رەت ءورت بولعان. قىزىل جالىن ىنتىماق-2 شاعىن اۋدانىنداعى ۇيلەر مەن تازارتۋ قۇرىلىسى كەشەنىنە قاۋىپ ءتوندىرىپ تۇر. وسىعان بايلانىستى ءورت سوندىرۋشىلەر دە سول ماڭايدى قايتا-قايتا تەكسەرىپ ءجۇر.

بۇرىندارى ىنتىماق-2 شاعىن اۋدانىنىڭ حال­قىنا كارىز سۋلارى جينالاتىن ورىننان شىققان ءيىس ىڭ­عايسىزدىق تۋدىراتىن. قالانى اۋىزسۋمەن قامتاماسىز ەتەتىن مەكەمە «سۋ رەسۋرستارى-ماركەتينگ» جشس وسى پروبلەمانى شەشۋ ءۇشىن قوماقتى قارجى جۇمساپ ydro Process بيوتەحنولوگياسىن ەنگىزدى. ول – اعىندى سۋداعى ارتىق لاي مەن جاعىمسىز ءيىستى جوياتىن ميكروورگانيزمدەر. وسىدان كەيىن جەرگىلىكتى تۇرعىندار ك ۇلىمسى يىستەن ارىلعانىن ايتقان ەدى.

«شايىندى سۋدان شىعاتىن ءيىس قازىر جوق. بىراق اۋىل­دى مازالاپ تۇرعان پروبلەما زاڭسىز قوقىس الاڭى بولىپ تۇر. وتكەندە سول جەرگە بارىپ قاراسام, ءبىر ادامدى قاراۋىل ەتىپ قويىپتى. قوقىستى توگۋگە رۇقساتتى سول بەرەتىن كورىنەدى. سوعان قاراعاندا بۇل جەردى بىرەۋلەر ساتىپ العان با دەپ كۇدىكتەنەم. شۋلاسىپ ءجۇرىپ, قوقىس توگۋدى توقتاتقانداي بولدىق. سول ءۇشىن قالدىقتار ۇيىلگەن جەردىڭ اينالاسىن قازىپ تاستادىق. بۇل جەردى بىرەۋ يەلەنىپ السا, ەرتەڭ اينالامىز قوقىس پوليگونى بولىپ كەتپەي مە دەپ تاعى قاۋىپتەنىپ وتىرمىز», دەدى ىنتىماق-2 شاعىن اۋدانىنىڭ تۇرعىنى سەرىك دۇيسەنوۆ.

«سۋ رەسۋرستارى-ماركەتينگ» كومپانياسىنىڭ ءباسپاسوز وكىلى اسقار ساتپاەۆتىڭ ايتۋىنشا, تازارتىلعان شايىندى سۋلار جاعىمسىز ءيىس تۋدىرماس ءۇشىن قوسىمشا شارالار قابىلداندى. ماسەلەن, 2022 جىلى ءبورجار سۋ جيناقتاعىشىنا العاش رەت حلورەللا سەبىلدى. بۇل ميكروورگانيزمدەر شايىندى سۋداعى زياندى زاتتارمەن قورەكتەنەدى, ءسويتىپ, كوپ مولشەردە وتتەگى ءبولىپ شىعارادى. ەكى جىل ىشىندە سۋ جيناقتاعىشىنا تاعى ءۇش رەت حلورەللا جىبەرىلدى. قازىر جيناقتاعىشتاعى سۋ تاپ-تازا, سونىمەن بىرگە وندا بالىق تا ءوسىرىلىپ وتىر.

ا.ساتپاەۆتىڭ ايتۋىنا قاراعاندا, «سۋ رەسۋرستارى-ماركەتينگ» جشس تاراپىنان ەكولوگيالىق جاعدايدى جاقسارتۋ ءۇشىن كوپ جۇمىس اتقارىلدى. بىراق ءبورجار سۋ قويماسىنىڭ ارتىندا شوشقا فەرماسى بار ەكەن. ودان دا ك ۇلىمسى ءيىس توڭىرەككە تارايدى. اۋانى ولشەۋ بارىسىندا اتموسفەراعا اممياك شىعارىندىلارىنىڭ شەكتى مولشەردەن بىرنەشە ەسە اسىپ كەتكەنى انىقتالعان. وسىعان بايلانىستى شوشقا فەرماسىنىڭ جاي-كۇيىن ونىڭ سانيتارلىق, ەكولوگيالىق نورمالارعا سايكەستىگىن ءتيىستى قۇزىرلى ورگاندار تەكسەرسە دەگەن تىلەك بار.

شىمكەنت