كىشى ارالدىڭ ايدىنى تولعالى بەرى تەڭىزدە اۋدانداعىلاردىڭ اتا كاسىبى – بالىق شارۋاشىلىعى جاندانىپ, قازىر سۋ مارجانىن سۇزگەندەر ءونىمىن بىرنەشە شەت مەملەكەتكە ەكسپورتقا جىبەرىپ وتىر. ودان بولەك, سوڭعى جىلدارى سالانى دامىتۋعا ارنالعان باستاما اياسىندا توعان شارۋاشىلىعىن قۇرىپ, تاۋارلى بالىق وندىرىسىنە دەن قويعاندار كوپ. تۇقى بالىق وسىرەتىن وسىنداي شارۋاشىلىق ارال اۋدانىندا جۇمىسىن باستادى.
«ارال رىبتورگ» جشس باسشىسى قۋانىش ومىرزاقوۆتىڭ ايتۋىنشا قازىر 15 گەكتار اۋماقتاعى 4 توعانعا بالىق جىبەرىلىپ جاتىر.
«وتكەن ايدا 7,7 ملن بالىق جىبەرىلدى. كۇزگە دەيىن توعاندار اۋدانى 25 گەكتارعا دەيىن ۇلعايادى, سودان كەيىن قۋاتتىلىعى جىلىنا 15-20 ميلليون شاباققا ارنالعان ينكۋباتسيالىق تسەح ورناتۋدى باستايمىز. كەلەر جىلى ساتۋعا جاراپ قالاتىن بالىقتىڭ العاشقى لەگى ساۋداعا شىعارىلادى», دەيدى ول.
قۇنى 150 ملن تەڭگە بولاتىن جوبانى باستاعاندار جىلىنا 300 توننا بالىقتى ساۋداعا شىعارادى. جالپى, وسى سالادا جۇرگەندەر مەملەكەت تاراپىنان جاسالعان قولداۋدان كەيىن بالىق شارۋاشىلىعىن دامىتۋعا بەت بۇرعاندار كوبەيگەنىن ايتادى.
بالىق شارۋاشىلىعىن دامىتۋدىڭ 2021–2030 جىلدارعا ارنالعان باعدارلاماسى بويىنشا سالىق جەڭىلدىكتەرى مەن بەرىلەتىن ءتۇرلى سۋبسيديا ارقاسىندا ءىسىن دامىتىپ وتىرعاندار قاتارى ارتىپ كەلەدى.
وسى كۇنى وڭىردە سازان, اق امۋر, ءدوڭماڭداي جانە افريكالىق جايىن سەكىلدى بالىق تۇرلەرىن توعاندا ءوسىرىپ جاتقاندار بار.
قىزىلوردا