وتكەن جىلدان بەرى وسكەمەندە كوپقاباتتى تۇرعىن ۇيلەردىڭ قابىرعالارىنا ءماندى, ماعىنالى سۋرەتتەر سالۋ داستۇرگە اينالعان. ءداستۇر عانا ەمەس, ەلدىك تۇرعىدا ۇلكەن جۇمىس اتقارىلىپ جاتقانى انىق.
جاسىرىپ, جابارى جوق, وسكەمەن بەرتىنگە دەيىن ۋست-كامەنوگورسك بولىپ كەلگەن. بۇل سوزگە اۋىلدان كەلگەن قازاقتىڭ بالاسىن قويىپ, قالادا وسكەن ورىس ۇلتىنىڭ ءتىلى ازەر كەلەر ەدى. سول ءۇشىن دە «ۋستكامان» دەسىپ جۇرگەن. قازاقتار تىلدەرىنە يكەمدەپ, وسكەمەن دەپ كەتكەن. سوڭعى جىلدارى عانا «وسكەمەن» بولىپ جالپى حالىقتىڭ ساناسىنا ءسىڭىپ كەتتى. ءاپ-ادەمى اتاۋ. ول ءسوزدىڭ ءتۇپ-توركىنىنە ۇڭىلگەن عالىمدار ءتۇرلى دالەلدەر مەن مىسالدار كەلتىرگەن...
ايتپاعىمىز, باسقا. سۋرەتشىلەر بىرقاتار مۇرالدىڭ ماڭدايىنا «وسكەمەن» دەگەن جازۋدى جاپسىرىپ, يدەولوگيالىق باعىتتاعى جۇمىستى كۇشەيتىپ جاتقانداي كورىندى. سوڭعى كۇندەرى عانا مىزى كوشەسىندەگى ءۇيدىڭ بىرىنە كىشكەنتاي قىزدىڭ «وسكەمەن» دەپ جازىپ تۇرعان سۋرەتى باسىلسا, قازاقستان مەن قابانباي كوشەلەرىنىڭ قيىلىسىنداعى بەس قاباتتى ءۇيدىڭ بۇيىرىنە دە ەرەكشە كومپوزيتسيا بەينەلەندى. كۇنى كەشە عانا ورتالىق داڭعىلداردىڭ بىرىندەگى ۇيگە ۇلت ۇستازى – احمەت بايتۇرسىن ۇلىنىڭ پورترەتى ءتۇستى. ايبارلى, قايراتتى سۋرەت بۇگىنگى ۇرپاققا ۇلگى بولاتىنداي كورىندى. سۋرەتتىڭ ءبىر بۇرىشىنا ۇستازدىڭ ء«بىزدىڭ زامانىمىز – وتكەن زاماننىڭ بالاسى, كەلەر زاماننىڭ – اتاسى» دەگەن ءسوزى جازىلعان. ۇلتىم دەگەن ۇلتجاندى ازاماتقا وي سالاتىنداي ءسوز. بۇگىنگى بالا كەلەر زاماننىڭ اتاسى بولا الا ما دەگەن سۇراق سانانى تۇرتپەكتەيدى.
قالا اكىمدىگى باسشىلارىنىڭ ايتۋىنشا, مۇرال سالۋ جۇمىسى مۇنىمەن توقتامايدى. سالماقتى سۋرەتتەر ءالى دە بىرنەشە ءۇيدىڭ قابىرعاسىنان كورىنىس تابادى.
وسكەمەن