ەۋروپا چەمپيوناتىنىڭ پلەي-وفف كەزەڭى قيلى-قيلى ناتيجەسىمەن دە جانكۇيەردىڭ جادىندا ساقتالارى ءسوزسىز.
فرانتسيا فۋتبولشىلارى 2000 جىلدان بەرى جالىنان ۇستاتپاي كەلە جاتقان چەمپيوندىق اتاقتان ءۇمىتتى ەكەنىن پاش ەتتى. 24 جىل بۇرىن قۇرلىق الامانىندا چەمپيوندىق تۇعىرعا كوتەرىلگەن فرانتسيا قۇراماسى 2016 جىلى دا فينالعا شىعىپ, پورتۋگاليا قۇراماسىنا ەسە جىبەرگەن بولاتىن.فرانتسيا فۋتبولشىلارى 2000 جىلدان بەرى جالىنان ۇستاتپاي كەلە جاتقان چەمپيوندىق اتاقتان ءۇمىتتى ەكەنىن پاش ەتتى. 24 جىل بۇرىن قۇرلىق الامانىندا چەمپيوندىق تۇعىرعا كوتەرىلگەن فرانتسيا قۇراماسى 2016 جىلى دا فينالعا شىعىپ, پورتۋگاليا قۇراماسىنا ەسە جىبەرگەن بولاتىن.
ديدە دەشامنىڭ شاكىرتتەرى بيىل بايگەدە بارىنەن قارا ءۇزىپ كەلۋدەن ءۇمىتتى. شيرەك فينالعا شىعار جولدا بەلگيا قۇراماسىنا قارسى ويناپ, اۋپىرىممەن جەڭدى. بۇلاي دەۋگە نەگىز بار. 85-مينۋتتا كولو ءمۋانيدىڭ تەپكەن دوبىن بوگەيمىن دەگەن يان ۆەرتونگەن اياعىن سوزعان, ەكپىندەپ كەلگەن الا دوپ تىزەسىنە ءتيىپ باعىتىن وزگەرتتى. ايتپەسە بەلگيا قۇراماسىنىڭ تاجىريبەلى قاقپاشىسى كۇن كاستەلس ءمۋانيدىڭ ويىن وقىپ قويىپ, دوپتىڭ ۇشۋ باعىتىن دا باعامداپ مىسىقشا اتىلعان. بەلگيا قۇراماسىنىڭ بيىلعى ەۋروپا چەمپيوناتىنداعى سوڭعى ماتچىن وتكىزىپ, ءوز قاقپاسىنا اۆتوگول سوققان ۆەرتونگەننىڭ «بولىسقانى» ارقاسىندا فرانتسۋز فۋتبولشىلارى شيرەك فينالعا شىقتى.
ماتچتىڭ تاعدىرىن شەشكەن گولدىڭ سوعىلۋىنا بەلگيا قۇراماسىنىڭ باس باپكەرى دومەنيكو تەدەسكو قاقپاشىنىڭ ەش ايىبى جوق ەكەنىن باسا ايتتى. راسىندا دا, بيىل ەۋروپا چەمپيوناتىندا بەلگيا فۋتبولشىلارى توپتىق كەزەڭنەن شىققاننىڭ ءوزىن وراسان جەتىستىك سانار بولسا, سول بيىككە جەتۋگە زور ۇلەس قوسقان ويىنشىنىڭ ءبىرى – وسى قاقپاشى كاستەلس.
ۇلتتىق قۇرامانىڭ كاپيتانى كەۆين دە بريوينە ءۇشىن بۇل سوڭعى ەۋروپا چەمپيوناتى بولۋى عاجاپ ەمەس. 33 جاستاعى ساقا فۋتبولشى 2028 جىلى بەس ەل بىرىگىپ وتكىزەتىن قۇرلىق دوداسىن كۇتپەۋى ابدەن مۇمكىن. الەمنىڭ تاڭداۋلى فۋتبولشىلارىنىڭ قاتارىنداعى رومەلۋ لۋكاكۋ ەۋروپا چەمپيوناتىندا ەنشىسىنە گول جازا الماي پۇشايمان كۇيدە كەتتى.
باس باپكەر دومەنيكو تەدەسكو توپتان شىعۋ جولىندا شاكىرتتەرىنىڭ از كۇش جۇمساماعانىن ايتتى. «پلەي-وفف كەزەڭىندە ءبىز فرانتسيا قۇراماسىنا قارسى الاڭعا شىعاردا ولاردىڭ قورعانىسىندا ايتارلىقتاي ماسەلە بار ەكەنىن باعامدادىق, سوندىقتان دا ءۇش شابۋىلشىمەن سۇعىنا ەنىپ, گول سوعامىز دەپ ويلادىق. ءارى قورعانىستاعى جىگىتتەر ولاردىڭ شابۋىلدى ورىستەتەتىن ۆينگەرىن ماتاپ, ادىم اشتىرماۋدى مىندەتىنە الدى. بىراق اۆتوگول ماتچ تاعدىرىن شەشتى», دەدى مامان.
بۇعان دەيىن ەۋروپا چەمپيونى اتانعان, قۇرلىق دوداسىنىڭ كۇمىسىن دە, قولاسىن دا قانجىعاسىنا بوكتەرگەن پورتۋگاليا فۋتبولشىلارىنىڭ ەكپىنىنە سلوۆەنيا قۇراماسى ەكى تايمدا دا توتەپ بەرەدى دەگەنگە كوپشىلىكتىڭ كوڭىلى سەنبەگەن دە ەدى. بۇعان دەيىن رەسمي ماتچتا قوس قۇرامانىڭ جولى تۇيىسپەگەن, تەك وسى بيىل ناۋرىز ايىندا وتكەن جولداستىق ويىندا 2:0 ەسەبىمەن ماتياج كەكتىڭ شاكىرتتەرى باسىم تۇسكەن-ءدى. بىراق بۇل جولى سلوۆەنيا فۋتبولشىلارى ءوز وتىنا ءوزى جانىپ كەتكەندەي ءارى-ءسارى كۇي كەشتى. نەگىزگى ۋاقىتتا تەڭ ءتۇسىپ, ەكسترا تايمدا رونالدۋدىڭ پەنالتيدەن تەپكەن دوبىن قايتارعان قاقپاشى يان وبلاكتىڭ باتىلدىعى دا قۇراماداعى جىگىتتەردىڭ جىگەرىن جاني المادى. ماتچتان كەيىنگى پەنالتي سەرياسىندا يوسيپ يليچيچ, يۋرە بالكوۆەتس, بەنيامين ۆەربيچتىڭ تەپكەن دوبىن پورتۋگاليا قاقپاشىسى ديوگو كوشتا تويتاردى. سلوۆەنيا قۇراماسىنىڭ كاپيتانى يان وبلاكتى پەنالتي سەرياسىندا سىنىپ كەتتى دەپ سوگۋدىڭ قاجەتى جوق. بار قايراتىن سالىپ, 90 مينۋت بويى ەكسترا تايمدا دا قانشاما جويقىن سوققىلاردى تويتاردى. ەۋروپا چەمپيوناتىنىڭ فينالدىق كەزەڭىنە 30 جىلدىڭ ىشىندە ەكىنشى مارتە قاتىسقان سلوۆەنيا قۇراماسى پلەي-وففقا تۇڭعىش رەت شىعىپ وتىر. 2000 جىلى وتكەن ەۋروپا چەمپيوناتىنىڭ توپتىق كەزەڭىندە ءتۋرنيردىڭ سوڭعى ساتىسىن مىسە تۇتىپ, تاۋى شاعىلىپ قايتقان سلوۆەنيا فۋتبولشىلارى ارادا شيرەك عاسىر وتكەندە تاريحي ناتيجە تىركەپ توپتان شىققان. ءتىپتى پورتۋگاليا قۇراماسىن دا ەكى بۇكتەپ جىبەرەتىن مۇمكىندىك بولدى. بىراق مىقتىنىڭ مىسى ءبارىبىر باسىم تۇراتىنىن قارسىلاستارى اڭعارتتى.
پەنالتي سەرياسىندا 3:0 ەسەبىمەن وزعان پورتۋگاليا قۇراماسىنىڭ كاپيتانى, قيت ەتسە, كوزىنە مەيمىلدەپ ءجيى جاس تۇناتىن كريشتيانۋ رونالدۋدىڭ ەنشىسىنە تاعى ءبىر دەرەك تىركەلدى. ول ەۋروپا چەمپيوناتتارىنىڭ پەنالتي سەرياسىندا گول سوققان ەڭ ەگدە فۋتبولشى اتاندى. سلوۆەنيا قاقپاسىنا بيىلعى ەۋروپا چەمپيوناتىنداعى العاشقى گولىن سوققان رونالدۋ كەشە 39 جاستان 147 كۇن استى.
پورتۋگاليا قۇراماسىنىڭ باس باپكەرى روبەرتو مارتينەس قاقپاشى ديوگو كوشتانى كوماندانىڭ قۇپيا ويىنشىسى دەدى. «سلوۆەنياعا قارسى ماتچتا ول ءبىر ەمەس, ءۇش سەيۆ جاساپ, پەنالتيدىڭ بارلىعىن دا قايتاردى. كوشتانىڭ بۇل ەڭبەگىن قالاي باعالامايسىڭ؟ ءبىز مۇنىمەن ماقتانۋعا ءتيىسپىز», دەدى باس باپكەر.
ەۋروپا چەمپيوناتتارىنىڭ تاريحىندا بۇعان دەيىن مۇنداي دەرەك تىركەلگەن جوق. ديوگو كوشتا 1960 جىلدان بەرى وتكىزىلىپ كەلە جاتقان قۇرلىق دوداسىنىڭ پەنالتي سەرياسىندا بارلىق سوققىنى قايتارعان العاشقى قاقپاشى اتاندى.
شيرەك فينالدا پورتۋگاليا قۇراماسى فرانتسيا فۋتبولشىلارىنا قارسى الاڭعا شىعادى.