جاڭا ينۆەستجوبا – اتىراۋ ۆاگون قۇراستىرۋ زاۋىتى اشىلدى. مۇندا جىل سايىن 6 000 ۆاگون قۇراستىرۋ جوسپارلانىپ وتىر. زاۋىتتىڭ اشىلۋ راسىمىنە وبلىس اكىمىنىڭ ورىنباسارى مارات مۋرزيەۆ قاتىستى, دەپ حابارلايدى Egemen.kz وڭىرلىك كوممۋنيكاتسيالار قىزمەتىنە سىلتەمە جاساپ.
«وڭىرىمىزدە 1000-نان اسا جوعارى بىرىككەن جانە شەتەل كاسىپورنى قۇرىلىپ, جۇمىس ىستەپ جاتىر. ماشينا جاساۋ سالاسىندا 150 ءىرى, ورتا جانە شاعىن بيزنەس نىسانى بار. ايماقتاعى مۇناي-حيميا ونىمدەرىن وڭدەۋ باعىتىنداعى ءىرى جوبالارمەن قاتار ماشينا جاساۋ ءىسىنىڭ دە وسىنداي اۋقىمعا يە بولا باستاعانى قۋانتارلىق جاعداي. ءبىز ءوز تاراپىمىزدان وندىرىسكە جان-جاقتى قولداۋ كورسەتەتىنىمىزدى اتاپ وتكىم كەلەدى», دەدى م.مۋرزيەۆ. كومپانيادا مۇناي مەن گازدى تاسىمالداۋعا ارنالعان ۆاگوندار مەن تسيستەرنالار شىعارىپ, جوندەۋ جانە تەحنيكالىق قىزمەت كورسەتۋگە ارنالعان بارلىق ينفراقۇرىلىمدى قامتيتىن ۆاگون جاساۋ كلاستەرىن دامىتادى. جالپى قۇرىلىس جۇمىستارىنا نەمىس ستانوكتارى مەن ەلىمىزدە وندىرىلەتىن ماتەريالدار قولدانىلادى. كەيىن وندىرىستىك ونىمدەر ەۋروپا جانە بالتىق ەلدەرىنە ەكسپورتتالادى. كومپانيالار توبىنىڭ باسشىسى شوتا ابحازوۆ الداعى 10 جىلدا ەلىمىزدىڭ جۇك ۆاگوندارى پاركى 54 مىڭ بىرلىككە قىسقاراتىنىن اتاپ ءوتتى. ء«بىز ورتالىق ازيادا جۇك بازاسىنىڭ ءوسۋ الەۋەتىن ەسكەرە وتىرىپ, شىعاتىن ۆاگونداردى جاڭا ونىممەن وتەۋگە جانە سونىڭ سالدارىنان قوسىمشا ۆاگوندار پاركىنە قاجەتتىلىك ءۇشىن دۇرىس جۇمىس ىستەۋىمىز كەرەك. وسىلايشا, بىزدە وتاندىق ءوندىرىستى دامىتۋعا جاقسى مۇمكىندىك بار», دەدى ش.ابحازوۆ. ءوندىرىس الاڭى - 17 000 شارشى مەتر. الداعى ۋاقىتتا اتالعان اۋماق 62 000 شارشى مەترگە دەيىن ۇلعايتىلماق. قازىرگى ۋاقىتتا ءوندىرىس ورنىندا 70-تەن استام مامان جۇمىس ىستەپ جاتىر. جىل سوڭىنا دەيىن 180, ال 2027 جىلعا قاراي 2 700 مامان تۇراقتى جۇمىسپەن قامتىلماق. وعان جەرگىلىكتى تۇرعىندار دا تارتىلادى.