ساتباەۆ ۋنيۆەرسيتەتىنىڭ 447 ستۋدەنتى قازاقستان ارمياسىنىڭ زاپاستاعى وفيتسەرلەر قاتارىنا قوسىلدى. ولار 17 اسكەري ماماندىق بويىنشا ارنايى دايىندىق باعدارلاماسىن اياقتادى, دەپ جازادى Egemen.kz.
انت بەرۋ راسىمىنە ۋنيۆەرسيتەت باسشىلىعى, اسكەري ءىس ينستيتۋتىنىڭ وفيتسەرلەرى, اسكەري ارداگەرلەر, ستۋدەنتتەردىڭ تۋىستارى قاتىستى. قازاقستان رەسپۋبليكاسىنىڭ مەملەكەتتىك تۋىن وفيتسەرلىك شەن العان 3-كۋرس ستۋدەنتى الماسبەك ابدەجامي كوتەردى. ول ەلىمىزدىڭ باتىسىندا سۋ تاسقىنى زارداپتارىن جويۋعا قاتىسقانى ءۇشىن ساتباەۆ ۋنيۆەرسيتەتىنىڭ التىن مەدالىمەن ماراپاتتالدى. سونداي-اق ساتباەۆ شىڭىنا شىعۋعا قاتىسقان ستۋدەنتتەر دە ۋنيۆەرسيتەت باسشىلىعى اتىنان ماراپاتقا يە بولدى.
«مەن ساتباەۆ ۋنيۆەرسيتەتىنىڭ 90 جىلدىعى جانە قانىش يمانتاي ۇلى ساتباەۆتىڭ 125 جىلدىعى تويلاناتىن مەرەيلى جىلى ساتباەۆ شىڭىنا شىعۋ ەكسپەديتسياسىنىڭ قاتىسۋ باقىتىنا يە بولدىم. 20 ماۋسىم كۇنى 4 مىڭ مەتردەن استام بيىكتىكتە بولاشاق ستۋدەنتتەرگە 10 جىلدان كەيىن ءبىزدىڭ ورلەۋىمىزدى قايتالاپ, اتى اڭىزعا اينالعان پوليتەح تۇلەكتەرىنىڭ داستۇرلەرى مەن داڭقتى ىستەرىن جالعاستىرۋلارى ءۇشىن جولداۋ قالدىردىق», دەدى اسكەري ءىس ينستيتۋتىنىڭ تۇلەگى سنەجانا كولەسنيكوۆا.
اسكەري ءىس ينستيتۋتىنىڭ وقۋ باعدارلاماسى تەوريالىق ساباقتاردى عانا ەمەس جان-جاقتى پراكتيكالىق دايىندىقتى دا قامتيدى. ەكى جىل وقۋ بارىسىندا ستۋدەنتتەر ەكىنشى ماماندىقتى مەڭگەرىپ, زاپاستاعى لەيتەنانت اسكەري اتاعىن الىپ شىعادى. سونىمەن بىرگە باسشىلىق ەتۋ قابىلەتىن ۇيرەنىپ, كوشباسشىلىق قاسيەتتەرىن شىڭدايدى.
«بۇگىن سىزدەر وتانعا ادال قىزمەت ەتۋگە انت بەردىڭىزدەر, سوندىقتان وسى اسكەري انتقا ادال بولىپ, ونى ابىرويمەن الىپ جۇرىڭىزدەر», دەدى ساتباەۆ ۋنيۆەرسيتەتىنىڭ رەكتورى مەيرام بەگەنتاەۆ.
ايتا كەتەيىك, ساتباەۆ ۋنيۆەرسيتەتتىڭ اسكەري ءىس ينستيتۋتىنىڭ تاريحى 1940 جىلدان, ياعني قازاق تاۋ-كەن مەتاللۋرگيا ينستيتۋتىندا اسكەري كافەدرا اشىلعان كەزەڭنەن باستالادى. سۇراپىل سوعىس جىلدارىندا ۋنيۆەرسيتەتتىڭ التى وكىلى كەڭەس وداعىنىڭ باتىرى اتاعىنا يە بولدى. سوعىستان كەيىنگى جىلدارى مۇندا ەكى رەت كەڭەس وداعىنىڭ باتىرى تالعات بەگەلدينوۆ ءبىلىم الىپ, كەيىن ول قازاق ۇلتتىق تەحنيكالىق زەرتتەۋ ۋنيۆەرسيتەتىنىڭ قۇرمەتتى پروفەسسورى اتاندى.