«تازا قازاقستان» رەسپۋبليكالىق ەكواكتسياسى اياسىندا سىر بويىندا 8 مىڭ توننادان استام قوقىس شىعارىلىپ, 24 مىڭنان استام اۋلا مەن كوشە بويى تازارتىلدى. ءوڭىر كليماتىن «جاتسىنبايتىن» اعاش كوشەتتەرىنىڭ 130 مىڭعا جۋىعى ەگىلدى.
وبلىس اكىمدىگىندە وتكەن ارنايى ماجىلىستە «تازا قازاقستان» رەسپۋبليكالىق ەكولوگيالىق اكتسياسىن جۇيەلى تۇردە جالعاستىرۋ جوسپارى تالقىلاندى.
جيىندا وبلىس اكىمىنىڭ ءبىرىنشى ورىنباسارى دانيار جانالينوۆ مەملەكەت باسشىسىنىڭ باستاماسىمەن قولعا الىنعان اكتسيا اياسىنداعى جۇمىستار ءىرى قالالاردا عانا ەمەس, اۋداندار مەن اۋىلداردا دا ۇدايى ۇيىمداستىرىلۋى كەرەكتىگىن اتاپ ءوتتى.
«وسىعان وراي اكتسيانى جالعاستىرۋدىڭ وبلىستىق ءىس-شارالار جوسپارى بەكىتىلىپ وتىر. قىزىلوردا قالاسى اۋماعىنداعى سانيتارلىق تازالىق جۇمىسىنىڭ ءبولىنىسى جاسالدى. بۇل باعىتتا الەۋمەتتىك جانە كاسىپكەرلىك نىسانداردىڭ قاسبەتىن قالىپقا كەلتىرىپ, كوشە, جول بويى تازالىعىن قامتاماسىز ەتۋ, جول بەلگىلەرىن تۇزەتۋ قولعا الىنادى. بارلىق جۇمىس بەكىتىلگەن ءىس-شاراعا سايكەس ساپالى اتقارىلۋعا ءتيىس», دەدى وبلىس اكىمىنىڭ ءبىرىنشى ورىنباسارى.
بۇل جۇمىستارعا بيۋدجەتتىك سالا, كاسىپورىندار قىزمەتكەرلەرى, بەلسەندى جاستار ۇيىمدارى وكىلدەرى جۇمىلدىرىلادى. ورتاق ىسكە قوسار ۇلەسى كوپ ۆولونتەرلەر دە ەكوشارالار ورتاسىنان تابىلماق. ەلدى مەكەندەردىڭ كوركەيۋى مەن كوگالداندىرىلۋى, سانيتارلىق تازالىعىنىڭ ساقتالۋى باعىتىنداعى جۇمىستاردان مەكەمەلەر وكىلدەرىمەن قاتار قاراپايىم تۇرعىندار دا شەت قالمايدى.
قىزىلوردا