قازاق زاعيپتار قوعامىنىڭ «اقتوبە وقۋ-وندىرىستىك كومبيناتى» جشس قورشاعان ورتانى لاستامايتىن قاعاز وراۋىشتار شىعارۋمەن 2019 جىلدان بەرى اينالىسادى. بەس جىلدان بەرى ساپالى دا ءساندى كرافت-وراۋىش شىعارۋدى جولعا قويعان سەرىكتەستىك ماماندارى ءونىم تۇرلەرىن كوبەيتىپ, ساتىلىم ارنالارىن كەڭەيتتى.
زاعيپ جاندار قولىنان شىققان ءبىر قاپتاما ديزاينى مەن كولەمىنە قاراي 5–25 تەڭگە اراسىندا باعالانادى. ساپالى قاعازدان جاسالعان ءساندى كرافت-وراۋىشتاردى كوبىنە اقتوبەدەگى سىيلىق دۇكەندەرى, ويىن-ساۋىق وتكىزۋگە ماماندانعان شاعىن ورتالىقتار ساتىپ الادى. ءبىر-بىرىنە ۇقسامايتىن ديزاينى بار قاعاز پاكەتتەر تاعام ونىمدەرى مەن باسقا دا تۇرمىستىق زاتتاردى سالۋعا, سىيلىق وراۋعا جانە اۆتوپوليكتەرگە لايىقتالعان. قاعازداردى وراۋىش پىشىنىنە كەلتىرۋگە وندىرىستە ۇن مەن كراحمالدان جاسالىنعان جەلىم قولدانىلادى. كرافت-وراۋىشتار ادامعا جاعىمسىز اسەر تۋدىرمايدى ءارى ونىڭ ەڭ باستى ارتىقشىلىعى – بىرنەشە رەت قايتا وڭدەۋگە بولادى.
باس كەڭسەسى الماتىدا ورنالاسقان قازاق زاعيپتار قوعامى ەلىمىز تاۋەلسىزدىك العان جىلدارداعى قيىنشىلىقتارعا قاراماستان, وڭىرلەردەگى وقۋ-كومبيناتتارىن ساقتاپ قالدى. اقتوبەدەگى وقۋ كومبيناتى دا جۇمىس كولەمى بولماي, تاپسىرىس تۇسپەگەندىكتەن ءبىراز جىل قاڭىراپ بوس تۇردى. فيليال ديرەكتورى ءوزى جۇگىرىپ, ءار جەردەن تاپسىرىس الىپ, شەبەرحانانىڭ جابىلۋىنا جول بەرگەن جوق. كومبينات تىگىن تسەحىنىڭ ارقاسىندا جابىلعان جوق دەپ ايتۋعا بولادى. تسەح تىگىنشىلەرى مەملەكەتتىك-قازىناشىلىق كاسىپورىندارعا توسەك جايماسىن, دارىگەر حالاتىن, قولعاپتار تىكتى.
تەپسە تەمىر ۇزەتىن ەر ازاماتتار جۇمىس تابا الماي جاتقان شاقتا, دەنساۋلىعىندا كىناراتى بار جاندارعا نارىققا بەيىمدەلۋ وڭايعا تۇسپەدى. ادامدارىمىز قاتتى قينالدى. كوبىنىڭ بالا-شاعاسى بار. زاعيپ جاندار اۋىر زاتتى كوتەرە المايدى, كولىك جۇرگىزە المايدى, تەك ءبىر ورىندا وتىرىپ جۇمىس ىستەيدى. اقتوبە وبلىستىق كاسىپكەرلەر پالاتاسى كومەگىمەن قاعاز پاكەتتەر شىعارۋ ءىسىن بەس جىل بۇرىن باستادىق. الەۋمەتتىك كاسىپكەرلىككە جاتاتىن وسى جوبامىزدىڭ باستى ماقساتى – مۇگەدەكتەردى جۇمىسپەن قامتۋ, وتاندىق تاۋار ءوندىرۋشىنى قولداۋ, قورشاعان ورتانى لاستامايتىن ءونىم شىعارۋ. مەملەكەتتەن گرانت العان سوڭ اسىقپاي سىرتقى نارىقتى زەرتتەدىك. شەتەلدەن ساپالى قاعازدار الدىردىق, ءونىمدى ءتۇرلى ديزاينمەن ورنەكتەيتىن قۇرال-جابدىقتار ساتىپ الدىق. ءسويتىپ, بىرتە-بىرتە اياققا تۇردىق. ءبىزدىڭ سەرىكتەستىك شىعارعان بارلىق ونىمدە ساپا مەنەدجمەنتى جانە ەكولوگيالىق قاۋىپسىزدىك سەرتيفيكاتى بار», دەيدى «قازاق زاعيپتار قوعامىنىڭ اقتوبە وقۋ-وندىرىستىك كاسىپورنى» جشس ديرەكتورى دامەتكەن جولماعامبەتوۆا.
كاسىپورىننىڭ پلاستيك پاكەت ورنىنا قاعاز پاكەت ءوندىرىسىن قولعا الۋ سەبەبى – الەمدە ءجۇرىپ جاتقان پوليەتيلەننەن جاسالعان قاپتاما, وراۋىشتاردان باس تارتۋ, ەكوقاپتامالارعا كوشۋ ءۇردىسى.
ەگەر ءبىر پلاستيك پاكەت نەمەسە ءبىر پلاستيك قۇتىنىڭ ىدىراۋىنا 100 جىلدان ۇزاق ۋاقىت كەتەتىنىن ەسكەرسەك, جەر بەتىن ادامداردىڭ قانشالىقتى دەڭگەيدە لاستاعانىن توپشىلاۋعا بولادى. ادامدار ەكولوگيالىق ساپالى ماتەريالدان جاسالعان وراۋىشتاردى, قاتتى ماتەريالدان تىگىلگەن سومكەلەردى قولدانۋ مادەنيەتىنە كوشكەنى ءجون. ءبىز تۇتىنۋشىعا ەكو-قاپتامانى ۇسىنۋ ارقىلى قورشاعان ورتاعا شاما-شارقىمىزشا قامقورلىق جاسايمىز», دەيدى دامەتكەن جولماعامبەتوۆا.
كاسىپورىن باسشىلىعى الداعى ۋاقىتتا بارلىق ساۋدا جەلىسىندە ساتىپ الۋشىلارعا پلاستيكتىڭ ورنىنا قاعاز پاكەتتەر ۇسىنىلادى دەپ ۇمىتتەنەدى. قورشاعان ورتانى بۇلدىرمەيتىن, ەڭ كوپ قولدانىلاتىن, باعاسى ارزان ونىمدەردى شىعاراتىن كاسىپورىندارعا مەملەكەتتىك قولداۋ ارتىپ, سىرتتان اكەلىنەتىن پلاستيكتەرگە شەكتەۋ قويىلسا, وتاندىق ءوندىرىستىڭ وسى ءبىر ءتۇرى اياققا تەز تۇرادى دەگەن سەنىم بار.
اقتوبە وبلىسى